‘Yumi Mas Sakim Satan’
“Yupela i mas sakim Satan, na em bai i lusim yupela na ranawe.”—JEMS 4:7.
1. Yumi ken tok wanem long dispela graun nau yumi stap long en? Bilong wanem ol Kristen God i bin makim na ol poroman bilong ol i mas tingting gut na was i stap?
“GOD i no stap moa, tasol Satan i stap yet.” Dispela tok bilong man bilong raitim buk, em André Malraux bilong Frans, i stret tru long dispela graun yumi stap long en. I olsem ol wok bilong ol man i wankain olsem ol trik bilong Satan, na i no wankain olsem laik bilong God. Satan i wok long pulim ol man long “olgeta kain strongpela wok na ol kain kain giaman mirakel. Na long olgeta giaman bilong pasin nogut em bai i giamanim ol dispela manmeri i wokabaut long rot bilong bagarap.” (2 Tesalonaika 2:9, 10) Tasol nau long “taim bilong las de” Satan i wok strong tru long pulim ol wokboi bilong God i dediket pinis, na em i mekim pait long ol Kristen God i bin makim, em ol “i save bihainim ol lo bilong God, na ol i save autim tok bilong Jisas.” (2 Timoti 3:1; KTH 12:9, 17) Ol dispela Witnes na ol poroman bilong ol i wet long kisim laip oltaim long graun, ol i mas tingting gut na was i stap.
2. Satan i giamanim Iv olsem wanem? Aposel Pol i tingting planti long wanem samting?
2 Satan em i man bilong giamanim tru ol man. Em i mekim wok long rot bilong wanpela snek na trikim Iv na Iv i ting em inap painim bikpela amamas moa sapos em i bihainim tingting bilong em yet na God i no bosim em. (Stat 3:1-6) Inap 4,000 yia bihain, aposel Pol i tingting planti, nogut ol Kristen bilong Korin i pundaun long ol trik bilong Satan. Pol i tok: “Mi ting long dispela snek i save tumas long pasin bilong giaman, na bipo tru em i bin giamanim Iv, na mi pret, nogut wankain samting i kamap long yupela. Nogut tingting bilong yupela i paul, na yupela i lusim pasin bilong i stap klin na tingting long Krais tasol.” (2 Korin 11:3) Satan i save bagarapim na paulim tingting bilong ol man. Olsem em i bin giamanim Iv, olsem tasol em inap kirapim ol Kristen long kisim tingting kranki olsem, bilong i stap amamas ol i mas mekim ol samting Jehova na Jisas i no orait long en.
3. Jehova i givim wanem ol samting long ol wokboi bilong em na bai Satan i no ken pulim ol i go insait long umben bilong em?
3 Satan i olsem man bilong holimpas ol pisin, na em i save putim ol umben bilong holimpas ol. Bilong abrusim umben bilong Satan, yumi mas ‘i go long God Antap Tru, bilong God i ken lukautim yumi’—em i olsem ples hait Jehova i putim bilong lukautim ol man i givim bel long em olsem Nambawan Bos, na ol i daun long em long olgeta samting ol i mekim. (Song 91:1-3) Yumi mas kisim olgeta helpim God i save givim bilong lukautim yumi long rot bilong Baibel, na spirit bilong em, na oganaisesen bilong em, bambai yumi ken “sanap strong na sakim olgeta kain pasin bilong trik na giaman Satan i save hait na mekim.” (Efesus 6:11) Tru tumas, Satan i save mekim ol kain kain pasin bilong “trik” na “giaman” bilong pulim ol wokboi bilong Jehova i kam insait long umben bilong em.
Umben Bilong Satan Long Holimpas Ol Kristen
4. Long taim bilong ol Kristen bilong pastaim, i gat wanem kain pasin i stap?
4 Ol Kristen bilong pastaim i bin stap long taim Gavman Rom em strongpela gavman tru. I gat gutaim i stap long ol hap Rom i bosim, na dispela i mekim na i gat planti wok bisnis i kamap. Em nau, ol lain bikman bilong kantri i gat bikpela hap taim bilong malolo na painim ol amamas, na gavman i wokim rot bambai ol manmeri i stap aninit long en i gat ol kain kain amamas na bai ol i no ken bikhet na pait long gavman. Aninit long sampela king bilong Rom i gat planti de bilong malolo, wankain olsem ol de bilong wok. Gavman i save kisim ol takis na givim kaikai na ol kain kain amamas long ol, na bai ol i no ken tingting long bikhet long gavman.
5, 6. (a) Bilong wanem i no stret long ol Kristen i go long ol haus pilai na ol ples spot bilong ol Rom? (b) Satan i mekim wanem kain pasin trik? Olsem wanem ol Kristen inap abrusim dispela pasin trik?
5 Olsem wanem? Dispela kain pasin inap bagarapim ol Kristen? Ol tok lukaut em sampela man, olsem Tertullian, i bin raitim bihain long taim bilong ol aposel i kamapim klia olsem planti kain amamas bilong dispela taim em inap bagarapim ol Kristen tru long ol samting bilong spirit na bagarapim pasin bilong ol. Olsem: Planti bikpela bung bilong amamas i bilong litimapim nem bilong ol god haiden. (2 Korin 6:14-18) Long ol haus bung bilong mekim pilai, planti pilai i gat pasin pamuk long en na ol i save mekim pait na kapsaitim blut bilong man. Bihain ol man i les long lukim ol kain pilai olsem, na ol i senisim na putim ol pilai i no gat toktok—ol i wokim han tasol—na ol dispela pilai i gat ol pasin nogut long en. Long buk Daily Life in Ancient Rome, Jérôme Carcopino i tok: “Ol i save larim ol meri insait long ol dispela pilai i rausim olgeta klos . . . Bikpela blut i kapsait. . . . Pilai i kamapim olkain pasin nogut tru em ol lain bilong dispela biktaun i givim bel moa yet long en. Ol i no bel nogut long ol dispela pilai nogut, long wanem, inap longtaim pinis ol i bin lukim ol pait na bagarapim man long ol ples spot na bikpela blut i kapsait, olsem na bel bilong ol i strong pinis na i no inap pilim ol samting.”—Matyu 5:27, 28.
6 Long ol ples spot, ol man i save holim bainat na pait i go inap long wanpela i dai, o ol i save pait wantaim ol wel animal na kilim ol i dai o animal yet i kilim ol i dai. Ol man em kot i bin makim ol bilong i dai, na bihain ol planti Kristen tu, ol i save tromoi ol i go long ol wel animal nogut. Na wanpela trik bilong Satan long dispela taim bipo, em i laik bai ol man i lukim ol kain pilai olsem i go i go na bihain ol i no sem o bel nogut moa long pasin pamuk na pait na bagarapim man—ol i lain pinis long en na ol i laikim tru. I gat wanpela rot tasol bilong abrusim dispela umben—Kristen i mas klia olgeta long ol dispela haus pilai na ol ples spot.—1 Korin 15:32, 33.
7, 8. (a) Bilong wanem i no gutpela long Kristen i go long ol resis bilong wilka? (b) Olsem wanem Satan inap mekim wok long ol haus waswas bilong ol Rom olsem umben bilong holimpas ol Kristen?
7 Ol i bin wokim resis bilong ol wilka na i gat wanpela longpela hap graun ol i banisim bilong mekim dispela pilai. Ating ol man i kisim bikpela amamas long lukim dispela resis, tasol i no stret ol Kristen i go lukim, long wanem, planti man i save bung na planti taim i gat pait i kamap. Wanpela man bilong raitim stori, em i bin i stap olsem 200 yia bihain long Krais, em i tok, sampela man i kam lukim ol dispela resis ol i kirap pait; na Carcopino i tok, “ol man bilong lukluk long ol sta na kolim ol samting bai kamap bihain, na ol meri pamuk, ol i mekim wok bisnis bilong ol” long hap bilong ol dua bilong banis. Olsem na yumi save, i no gutpela long ol Kristen i go long ol dispela ples spot bilong ol Rom.—1 Korin 6:9, 10.
8 Olsem wanem long ol ples waswas bilong Rom em ol i gat nem? Tru, i no gat rong long waswas na bai yumi ken stap klin. Tasol ol dispela ples waswas bilong Rom em ol traipela haus i gat ol rum bilong bengim skin bilong man, na mekim olkain eksasais na spot, na pilai laki, na kaikai na dring. Tru, ol i makim taim bilong ol man i waswas na taim bilong ol meri i waswas, tasol ol i save larim ol man na meri wantaim i bung na waswas. Clement bilong Alexandria i tok: “Long ol dispela haus waswas ol i save larim ol man na meri wantaim i bung na waswas, na ol i save rausim olgeta klos na mekim pasin pamuk samting.” Olsem na ol bikpela haus bung ol man i orait long en, Satan inap mekim wok long ol olsem umben bilong holimpas ol Kristen. Ol Kristen i gat gutpela tingting ol i no bin go long ol kain ples olsem.
9. Ol Kristen bilong pastaim i mas abrusim wanem ol samting i olsem umben?
9 Taim Gavman Rom i gat bikpela strong yet, pilai laki em i nambawan bikpela amamas bilong ol man. Sapos ol Kristen bilong pastaim i no go lukim resis bilong wilka, ol inap abrusim pasin bilong betim mani long en. Ol man i bin pilai laki tu long ol rum baksait long ol haus pasindia na haus dring. Ol i save holim long han ol liklik ston o liklik raunpela bun na ol narapela i betim mani long hamas ston i stap long han. Ol man i amamas long pilai laki, long wanem, ol i ting em i gutpela rot bilong kisim mani na i no gat hatwok long en. (Efesus 5:5) Na tu, planti meri bilong tilim dring em ol meri pamuk, na dispela inap pundaunim Kristen na em i mekim pasin pamuk. Em sampela umben Satan i bin putim bilong holimpas ol Kristen i stap long ol taun Rom i bosim. Orait, yu ting long nau i narapela kain?
Ol Umben Bilong Satan Long Nau
10. Olsem wanem ol pasin bilong nau i wankain olsem pasin i bin stap long taim bilong Gavman Rom?
10 I kam inap nau, ol trik bilong Satan i no senis. Taun Korin bilong bipo i gat kain kain pasin nogut long en, na aposel Pol i laik helpim ol Kristen i sindaun long dispela taun, ‘nogut Satan i giamanim ol,’ olsem na em i tok strong long ol: “Yumi save pinis long tingting na pasin bilong [Satan].” (2 Korin 2:11) Long nau, long planti kantri i gat ol bikpela wok bisnis, i gat ol wankain pasin olsem i bin stap long taim bilong Gavman Rom. Planti manmeri ol i gat bikpela hap taim moa long malolo. Ol gavman i putim ol ples bilong baim laki tiket, na ol rabisman tu inap tingting long kisim bikpela winmani. Na i gat ol kain kain samting bilong kisim amamas na i gat liklik pe tasol. Ol manmeri i pulap tru long ol stediam bilong pilai spot, na ol man i save pilai laki, na sampela taim ol bikpela lain i bung bilong lukim spot ol i save pait, na planti taim ol man bilong pilai spot ol tu i pait. Ol manmeri i save harim ol musik nogut, na long ol haus bung na TV samting ol i save wokim ol pilai i gat pasin sem na pasin nogut long en. Long sampela kantri i gat sampela hap bilong waswas long hatwara, na ol man na meri i waswas wantaim, na long sampela nambis ol i save stap skin nating na waswas. Olsem long taim bilong ol Kristen bilong pastaim, Satan i wok strong long pulim ol wokboi Kristen bilong God long rot bilong ol amamas bilong graun.
11. Olsem wanem laik bilong kisim malolo na painim amamas em inap i stap olsem umben bilong holimpas Kristen?
11 Long nau ol hevi bilong wok samting i mekim na planti manmeri i pilim olsem ol i mas malolo na painim amamas. Tasol ol haus waswas bilong ol Rom bipo i gat ol samting inap pundaunim ol Kristen, na olsem tasol sampela ples bilong kisim malolo long nau i kamap olsem umben bilong Satan bilong pulim ol Kristen long pamuk o dring planti. Pol i bin tokim ol Kristen long Korin: “Yupela i no ken larim ol arapela man i giamanim yupela. Yupela i save long dispela tok, ‘Sapos yumi poroman wantaim ol man nogut, bai ol i bagarapim gutpela pasin bilong yumi.’ Yupela i mas lusim longlong pasin na tingting stret. Yupela i no ken mekim sin moa.”—1 Korin 15:33, 34.
12. Wanem sampela trik bilong Satan long holimpas ol wokboi bilong Jehova long nau?
12 Yumi save pinis long pasin giaman Satan i bin mekim long Iv bilong bagarapim tingting bilong em. (2 Korin 11:3) Long nau wanpela trik bilong Satan em i bilong kirapim ol Kristen long tingting olsem, sapos ol i traim olgeta rot bilong soim olsem ol Witnes Bilong Jehova i wankain olsem ol narapela manmeri, bai ol inap pulim sampela i kam long tok i tru bilong ol Kristen. Tasol sampela taim ol yet i kamap wankain olsem ol man i no bilip, na nau dispela lain yet i pulim ol i go. (Hagai 2:12-14) Narapela trik bilong Satan, em bilong kirapim ol Kristen i dediket pinis—ol yangpela na ol bikpela wantaim—long mekim hait sampela pasin nogut na “givim bel hevi long Holi Spirit bilong God.” (Efesus 4:30) Sampela i bin pundaun insait long dispela umben long rot bilong Intenet.
13. Wanem wanpela trik bilong Satan i olsem umben i hait i stap? Wanem tok bilong Buk Sindaun i stret tru long dispela?
13 Narapela trik bilong Satan, em ol samting bilong ol spirit nogut i no stap ples klia. Yumi save, ol Kristen tru i no inap mekim sampela wok bilong ol spirit nogut long laik bilong ol yet, o mekim sampela pasin bilong lotuim Satan. Tasol sampela i no bin was gut long ol piksa i save kamap long TV, o ol video-gem, o ol buk bilong ol pikinini na ol buk komik i gat ol pait na pasin bilong bagarapim man o ol samting bilong ol spirit nogut. Olgeta samting i luk olsem em i wok bilong ol spirit nogut, yumi mas i stap longwe long en. Wanpela savetok i tok olsem: “Olkain samting bilong mekim man i pundaun na bagarap, i stap long rot bilong ol man bilong mekim pasin nogut. Sapos man i laik i stap gut, em i mas was gut long wokabaut bilong en na abrusim ol dispela kain samting nogut.” (Sindaun 22:5) Satan em i “god bilong dispela graun,” olsem na ol samting ol man i save laikim tumas, yumi mas was gut long en, nogut wanpela umben bilong Satan i hait insait long en.—2 Korin 4:4; 1 Jon 2:15, 16.
Jisas i Bin Sakim Satan
14. Olsem wanem Jisas i sakim namba wan traim bilong Satan?
14 Jisas i stap olsem gutpela piksa long sakim Satan na mekim em i ranawe. Taim Jisas i baptais pinis na em i no kaikai inap 40 de, Satan i kam traim em. (Matyu 4:1-11) Long namba wan traim, Satan i laik traim Jisas long bikpela hangre bilong em, olsem em i no bin kaikai inap longtaim. Satan i tokim Jisas long wokim namba wan mirakel bilong em na kamapim kaikai bilong pinisim hangre bilong em. Jisas i kamapim tok bilong Lo 8:3 na em i no orait long wokim mirakel bilong helpim em yet. Em i putim kaikai bilong spirit i go pas long kaikai bilong skin.
15. (a) Satan i bin mekim wok long wanem laik bilong yumi ol man long traim Jisas? (b) Wanem wanpela trik bilong Satan long pundaunim lain bilong God long nau? Tasol olsem wanem yumi inap sakim em?
15 Yumi ken tingim wanpela samting bilong dispela traim: Satan i no laik kirapim Jisas long mekim pasin pamuk. Taim man i hangre em i gat bikpela laik long kisim kaikai, na Satan i ting dispela em bikpela laik tru bilong Jisas long dispela taim, olsem na em i mekim wok long en bilong traim Jisas. Orait Satan i save mekim wok long wanem kain traim bilong pulim lain bilong God long nau? I gat kain kain traim, tasol pasin pamuk em i wanpela bikpela rot bilong em long pundaunim lain bilong Jehova na ol i no stap gut moa long Em. Sapos yumi bihainim pasin bilong Jisas yumi inap sakim Satan na sakim ol traim. Bilong daunim dispela tok bilong Satan, Jisas i kamapim sampela skripsa i stret long dispela traim, na olsem tasol, taim Satan i traim yumi long mekim pasin pamuk, yumi ken tingim sampela skripsa olsem Stat 39:9 na 1 Korin 6:18.
16. (a) Olsem wanem Satan i traim Jisas long namba tu taim? (b) Ating Satan bai traim yumi long wanem ol rot na bai yumi traim Jehova?
16 Orait nau Satan i kisim Jisas na putim em antap tru long tempel na tokim em long kalap i go daun na traim strong bilong God long lukautim em long rot bilong ol ensel bilong Em. Orait Jisas i kamapim tok bilong Lo 6:16 na em i no traim Papa bilong em. Tru, ating Satan i no ken tokim yumi long sanap antap long wanpela tempel na kalap i go daun, tasol em inap traim yumi na bai yumi kirap na traim Jehova. Olsem wanem? Yumi gat tingting long i go klostu tru long mak bilong bihainim ol stail bilong dispela graun long klos na bilas na yumi no kisim sampela tok bilong stretim yumi? Yumi save larim sampela kain amamas bilong dispela graun i traim yumi? Sapos olsem, ating yumi traim Jehova. Sapos yumi gat ol kain tingting olsem, Satan i no ken lusim yumi na ranawe—ating em bai stap klostu long yumi na traim long pulim yumi long wok wantaim em long birua long God.
17. (a) Olsem wanem Satan i traim Jisas long namba tri taim? (b) Olsem wanem tok bilong Jems 4:7 inap kamap tru long yumi?
17 Orait nau Satan i tokim Jisas olsem em bai givim olgeta kingdom bilong graun long Jisas sapos em i brukim skru na lotu long em wanpela taim tasol, na long dispela taim tu Jisas i kamapim wanpela skripsa na em i sakim Satan na sanap strong long lotuim Papa bilong em tasol. (Lo 5:9; 6:13; 10:20) Tru, ating Satan i no ken tok long givim ol kingdom bilong graun long yumi, tasol oltaim em i save traim yumi long ol mani kago na yumi tingting long kisim gutpela sindaun, i olsem yumi gat liklik kingdom bilong yumi yet. Olsem wanem? Yumi save bihainim pasin bilong Jisas na lotuim Jehova wanpela tasol? Sapos olsem, orait samting i bin painim Jisas bai painim yumi tu. Baibel i tok: “Satan i lusim em.” (Matyu 4:11) Satan bai lusim yumi sapos yumi tingim ol stiatok bilong Baibel i stret long dispela traim na yumi bihainim, na long dispela rot yumi sakim Satan. Disaipel Jems i tok: “Yupela i mas sakim Satan, na em bai i lusim yupela na ranawe.” (Jems 4:7) Wanpela Kristen i raitim pas long brens-ofis bilong ol Witnes long Frans olsem: “Satan i save tumas long pasin bilong trik. Mi save hatwok tru long bosim ol tingting na laik bilong bel, maski mi tingting strong long mekim olsem. Tasol mi strongim bel na mi no les, na bikpela samting tru, Jehova i helpim mi, olsem na mi stap gut long em na holimpas tok i tru.”
Olgeta Samting Bilong Sakim Satan
18. Wanem ol klos pait bilong spirit i save helpim yumi long sakim Satan?
18 Jehova i bin givim olgeta klos pait bilong spirit long yumi na bai yumi “inap long sanap strong na sakim olgeta kain pasin bilong trik na giaman Satan i save hait na mekim.” (Efesus 6:11-18) Yumi laikim tumas tok i tru na yumi pasim olsem let long bel bilong yumi, olsem yumi redi long mekim wok Kristen. Yumi strong long holimpas ol lo bilong Jehova long stretpela pasin na dispela bai stap olsem siot kapa i lukautim bros bilong yumi. Sapos yumi pasim gutnius olsem su long lek bilong yumi, long olgeta taim bai yumi go autim tok, na dispela bai strongim na lukautim yumi long ol samting bilong spirit. Strongpela bilip bilong yumi bai stap olsem traipela plang bilong sakim ‘olgeta spia paia dispela man nogut Satan i save sutim i kam long yumi,’ em ol trik na giaman em i save mekim bilong traim yumi. Yumi bilip na wetim Jehova i truim ol tok promis bilong em na dispela bai stap olsem hat kapa i lukautim tingting bilong yumi na em i stap isi. (Filipai 4:7) Sapos yumi lain na save gut long mekim wok long Baibel, em bai stap olsem bainat yumi ken mekim wok long en bilong helpim ol man long lusim kalabus bilong Satan. Na yumi ken mekim wok long dispela bainat bilong lukautim yumi yet, olsem Jisas i bin mekim taim Satan i traim em.
19. Yumi mas “sakim Satan,” tasol yumi mas mekim wanem samting moa?
19 Sapos oltaim yumi pasim “olgeta klos pait God i save givim long yumi” na yumi beten oltaim, yumi inap bilip tru olsem Jehova bai lukautim yumi taim Satan i traim yumi. (Jon 17:15; 1 Korin 10:13) Tasol Jems i soim yumi olsem sapos yumi “sakim Satan” na em tasol, dispela i no inap. Yumi mas mekim tu wanpela bikpela samting tru, olsem “daunim [yumi] yet na i stap aninit long God,” em i save tingim yumi. (Jems 4:7, 8) Long stori i kamap bihain long dispela, bai yumi toktok long olsem wanem yumi ken mekim olsem.
Bai Yu Bekim Olsem Wanem?
• Ol Kristen bilong pastaim i mas abrusim wanem ol samting i olsem umben bilong Satan?
• Long nau Satan i save mekim wanem ol pasin trik bilong holimpas ol wokman bilong God long umben bilong em?
• Olsem wanem Jisas i sakim ol traim bilong Satan?
• Wanem ol klos pait bilong spirit i helpim yumi long sakim Satan?
[Piksa long pes 8, 9]
Jisas i sakim strong Satan
[Ol Piksa long pes 10]
Ol Kristen bilong pastaim i bin sakim ol amamas i gat pait na pasin pamuk long en
[Kredit Lain]
The Complete Encyclopedia of Illustration/J. G. Heck