Askim
Olsem wanem? Tok bilong KTH 20:8 i makim olsem Satan bai giamanim bikpela lain manmeri tru long taim bilong laspela traim?
Kamapim Tok Hait 20:8 i stori olsem long pinis bilong wan tausen yia bilong Kingdom bilong Krais i bosim graun, Satan bai mekim laspela traim long ol manmeri i stap long graun. Dispela ves i stori long Satan olsem: “Em bai i kam ausait bilong giamanim ol lain manmeri i stap long olgeta hap bilong graun, em ol lain bilong Gok wantaim Magok. Satan bai i bungim ol bilong kirapim pait. Namba bilong ol ami bilong ol em i olsem namba bilong wesan bilong nambis.”
Maski ol wok na masin bilong saiens long skelim ol samting i wok long kamap gutpela moa, ol man i no save hamas “wesan bilong nambis” i stap. Olsem na yumi inap tok, dispela tok i makim olsem ol i no save hamas i stap. Tasol yu ting dispela i makim bikpela namba tru, em man i no inap kaunim, o i makim bikpela namba em yumi no save long hamas stret?
Long Baibel, dispela tok “wesan bilong nambis” i gat kain kain mining bilong en. Olsem, long Stat 41:49, em i tok: “Ol dispela rais samting em i bungim long ol bakstua i planti moa yet, na i olsem wesan long nambis, na Josep i no inap moa long skelim.” Dispela ves i stori long samting i planti tru, i no inap man i kaunim. Na Jehova i tok olsem tu: “Ol man i no inap tru long kaunim ol sta na ol wesan bilong nambis. Olsem tasol bai mi mekim ol lain bilong wokman bilong mi, Devit, . . . i kamap planti moa na ol man i no inap kaunim.” Yumi save yumi no inap tru long kaunim ol sta long heven na wesan bilong nambis olsem tasol yumi save olsem Jehova bai truim promis em i mekim long Devit.—Jeremaia 33:22.
Planti taim dispela tok “olsem wesan bilong nambis” i makim samting i planti tru o bikpela. Ol ami bilong Filistia i bung long Mikmas i planti tumas “olsem wesan bilong nambis” na dispela i mekim na ol Israel i stap long Gilgal i tingting planti. (1 Samuel 13:5, 6; Hetman 7:12) Na “God i givim planti gutpela tingting na save long Solomon. Em i gat planti save tumas olsem wesan long nambis na man i no inap kaunim.” (1 King 4:29) Dispela tupela ves i stori long samting i planti tumas, tasol man inap kaunim hamas na save long bikpela bilong en.
“Wesan bilong nambis” i makim tu samting man i no inap save hamas tru, tasol i no makim olsem em i planti tru. Jehova i tokim Abraham: “Bai mi mekim ol lain tumbuna pikinini bilong yu i kamap planti tru olsem ol sta bilong skai na olsem wesan bilong nambis.” (Stat 22:17) Jehova i kolim gen dispela promis long Jekop, tumbuna pikinini bilong Abraham na em i mekim wok long dispela tok “olsem das bilong graun” na Jekop i kolim gen dispela promis na tok “wesan bilong nambis.” (Stat 28:14; 32:12) Ol samting i kamap i soim olsem namba bilong lain pikinini bilong Abraham em 144,000, em Jisas i no insait long dispela namba, na Jisas i kolim ol olsem “liklik lain sipsip.”—Luk 12:32; Galesia 3:16, 29; KTH 7:4; 14:1, 3.
Yumi kisim wanem save long ol dispela ves? Dispela tok “olsem wesan bilong nambis” i no makim tasol samting em man i no inap kaunim namba bilong en, o samting i bikpela o traipela nogut tru. Planti taim em i makim samting man i no inap kaunim hamas tru, tasol em i bikpela. Olsem na yumi save, dispela bikhet lain manmeri i helpim Satan long taim em i birua long lain bilong God long taim bilong laspela traim, ol i no bikpela lain tru em man i no inap kaunim namba bilong ol, nogat, tasol ol i planti na ol inap mekim nogut long lain bilong God. Tasol long nau yumi no save hamas manmeri tru bai insait long en.