Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:
• Olsem wanem pasin bilong tingting gut inap lukautim yumi? (Sindaun 1:4)
Em inap helpim yumi long luksave long ol bagarap inap painim yumi long ol samting bilong spirit na em inap kirapim yumi long tingim gut na makim stretpela pasin yumi mas bihainim, olsem abrusim traim bilong mekim pasin pamuk long ples wok. Pasin bilong tingting gut inap helpim yumi long luksave olsem ol wanbilip Kristen bilong yumi, ol tu i no gutpela olgeta, olsem na bai yumi no kirap hariap long kros long sampela pasin kranki bilong ol. Em inap helpim yumi long sakim pasin bilong bungim ol mani kago samting em inap subim yumi long lusim rot bilong ol samting bilong spirit.—8/15, pes 21-24.
• Olsem wanem man inap kamap wanpela gutpela samting long ol man em i sindaun klostu long ol?
I gat tupela rot bilong kamap olsem wanpela gutpela man i sindaun klostu long narapela—amamas long givim samting na amamas long kisim ol samting. Em i gutpela samting long i stap olsem wanpela gutpela man i sindaun klostu long narapela long taim hevi o bagarap i kamap. Ol Witnes Bilong Jehova i wok strong long i stap olsem ol gutpela man i sindaun klostu long narapela, taim ol i toksave long ol man olsem klostu nau bai God i kirap na pinisim pasin nogut.—9/1, pes 4-7.
• Olsem Baibel i tok, husat ol i santuman tru, na ol bai helpim ol man olsem wanem?
Olgeta Kristen bilong bipo ol i santuman tru, o ol manmeri i holi, em God yet i bin makim ol olsem, na ol man o wanpela oganaisesen i no inap makim ol, nogat. (Rom 1:7) Taim ol i kirap bek na go long heven, dispela lain holi bai wok wantaim Krais long mekim gut long ol manmeri long graun em ol i stap gut long God. (Efesus 1:18-21)—9/15, pes 4-7.
• Sapos ol Kristen i gat sampela save long ol pilai resis bilong ol Grik long bipo, olsem wanem dispela inap helpim ol?
Aposel Pita na Pol i mekim ol tok piksa long ol samting bilong dispela ol pilai bilong bipo. (1 Korin 9:26; 1 Timoti 4:7; 2 Timoti 2:5; 1 Pita 5:10) Em i bikpela samting long ol man bilong resis long bipo long ol i mas i gat gutpela trena, bilong helpim ol long daunim olgeta laik bilong bodi, na stiaim ol gut long ol hatwok bilong ol insait long trening. Na i wankain tu taim ol Kristen long nau i wok strong long ol samting bilong spirit.—10/1, pes 28-31.
• Wanem sampela hatwok na gutpela pe bilong mekim bikpela long ol pikinini long narapela kantri?
Planti pikinini i save lain kwik long nupela tok ples, winim papamama bilong ol, na ating papamama bai hatwok long pilim tingting na pasin bilong ol pikinini long mekim ol samting. Na ating ol pikinini i no inap kisim gut ol tok bilong Baibel long tok ples bilong papamama. Tasol famili inap pas gut wantaim, taim ol papamama i skulim ol pikinini long tok ples bilong ol, na ol pikinini inap save long tupela tok ples wantaim na pasin bilong ol lain i mekim ol dispela tok ples.—10/15, pes 22-26.
• Bilong wanem em i bikpela samting long lain long tok sori?
Pasin bilong tok sori em i wanpela gutpela rot bilong stretim hevi i stap namel long yumi na ol narapela. Pasin bilong tok sori i gat strong—Baibel i kamapim stori bilong ol man i bin tok sori long narapela na dispela i bin mekim sampela samting long ol. (1 Samuel 25:2-35; Aposel 23:1-5) Taim tupela man i no wanbel long wanpela samting, ating tupela wantaim i gat asua long hevi i kamap. Olsem na tupela wantaim i mas tok sori.—11/1, pes 4-7.
• Bilong wanem pasin bilong pilai laki, maski em liklik mani tasol, em i no stret?
Pasin bilong pilai laki i save kirapim man long tingim em yet tasol, na resis wantaim narapela long win, na mangal long samting bilong narapela man, em pasin Baibel i tambuim. (1 Korin 6:9, 10) Planti man bilong pilai laki oltaim, ol i kirap mekim taim ol i yangpela tru na ol i pilai laki long liklik mani.—11/1, pes 31.
• Planti buk bilong Baibel ol i raitim long tok ples Grik, olsem na bilong wanem ol i kirap tanim gen Baibel long tok ples Grik, na wanem gutpela samting i bin kamap?
Planti tok Grik bilong nau i narapela kain long Ol Skripsa Grik na i narapela kain long tok Grik bilong Baibel Septuagint bilong Ol Skripsa Hibru. Winim sampela handet yia i go pinis sampela man i bin traim long tanim sampela hap o olgeta hap bilong Baibel long tok Grik ol man i save mekim. Long nau i gat 30 narapela narapela Baibel, sampela em Baibel olgeta o hap tasol bilong Baibel, tasol ol i gutpela inap long bikpela lain manmeri Grik i ken ritim. Wanpela bilong ol em i gutpela tru em Baibel New World Translation of the Holy Scriptures, ol i bin kamapim long 1997.—11/15, pes 26-29.
• Bilong wanem ol Kristen i no bihainim pasin bilong givim namba 10 hap bilong ol samting?
Aninit long Lo God i givim long ol Israel long bipo, ol i mas givim namba 10 hap bilong ol samting bilong helpim ol lain Livai na bilong lukautim ol man i sot long ol samting bilong skin. (Wok Pris 27:30; Lo 14:28, 29) Taim Jisas i dai olsem ofa, God i bin rausim Lo na lo bilong givim namba 10 hap bilong ol samting. (Efesus 2:13-15) Long kongrigesen bilong pastaim tru, pasin wan wan Kristen i bihainim, em ol i givim ol samting long skel bilong ol na ol i pasim tok long bel long mekim olsem. (2 Korin 9:5, 7)—12/1, pes 4-6.
• Olsem wanem? Tok bilong KTH 20:8 i makim olsem Satan bai giamanim bikpela lain manmeri tru long taim bilong laspela traim?
Dispela skripsa i tok olsem ol manmeri Satan bai giamanim, ol i olsem “wesan bilong nambis.” Long Baibel, planti taim dispela tok i makim wanpela namba em man i no save long en, tasol i no makim olsem em i planti tru. Lain pikinini bilong Abraham bai kamap olsem “wesan bilong nambis,” tasol namba bilong ol em 144,000, Jisas i no insait long dispela namba. (Stat 22:17; KTH 14:1-4)—12/1, pes 29.