Askim

Olsem wanem? I gat rong long pilai laki sapos man i pilai long liklik mani tasol?

Baibel i no kamapim planti tok long pasin bilong pilai laki, tasol em i kamapim long ples klia olsem olgeta pasin bilong pilai laki i no stret wantaim ol stiatok bilong Baibel.a Olsem: Planti man i tok pasin bilong pilai laki i save kirapim man long mangal. Dispela em i bikpela samting long ol Kristen i mas tingim, long wanem, Baibel i tok “ol man i save mangal” ol bai i no inap i go insait long Kingdom bilong God na pasin bilong mangal em i wankain olsem pasin bilong lotu long giaman god.​​—⁠1 Korin 6:​9, 10; Kolosi 3:⁠5.

Na tu, pilai laki i kirapim man long tingim em yet tasol na resis wantaim narapela, olsem bihainim strongpela laik long win. Aposel Pol i mekim tok lukaut olsem yumi no ken bihainim kain pasin olsem. Em i tok: “Yumi no ken litimapim nating nem bilong yumi yet, na yumi no ken sutim bel bilong ol arapela long kirapim pait, na yumi no ken mangal long ol samting bilong ol arapela.” (Galesia 5:26) Na tu, pilai laki i save kirapim sampela long kisim bilip kranki olsem ol gutpela samting tasol bai painim ol. Ol man bilong pilai laki i save bihainim ol kain kain bilip kranki ol yet i bin kamapim, na ol i laik bai dispela i helpim ol na ol gutpela samting inap painim ol. Pasin bilong ol i kirapim yumi long tingim ol Israel i no bin stap gut long God, em ol ‘i save lotuim ol giaman god ol i ting ol i save mekim ol i win na ol i gat gutpela taim.’​​—⁠Aisaia 65:⁠11.

Sampela inap ting olsem sapos ol i betim liklik mani tasol taim ol i amamas na pilai kas o mekim narapela pilai wantaim ol wantok o gutpela pren, dispela kain amamas i no save bagarapim man. Tru, man i save betim liklik mani tasol em i no ting olsem em i mangal, o tingim em yet tasol, o em i laik winim narapela, o em i save holim ol bilip kranki, nogat. Tasol pasin bilong em long pilai laki inap mekim wanem samting long ol man em i pilai laki wantaim ol? Planti man bilong pilai laki oltaim, taim ol i bin kirap long pilai laki, ol i bin betim liklik mani tasol ‘bilong amamas.’ (Luk 16:10) Dispela pasin ol i ting i orait long mekim, em i kamapim bikpela hevi long ol.

Dispela i stret moa yet long ol pikinini i pilai laki. Planti pikinini i pilim amamas tru long winim liklik mani ol i bin betim na dispela i kirapim ol long betim bikpela mani. (1 Timoti 6:​10) Inap planti yia ol i bin skelim pasin bilong pilai laki na wanpela lain (Arizona Council on Compulsive Gambling) i kamapim dispela ripot long Amerika na i strongim tok olsem planti man bilong pilai laki oltaim ol i kirap mekim taim ol i yangpela tru. Ol i save “betim liklik mani tasol long ol hosres samting o pilai kas wantaim ol pren o wantok.” Narapela ripot i tok “taim ol pikinini i kirap long mekim dispela pasin bilong pilai laki, planti ol i save mekim long haus, taim ol i pilai kas wantaim famili na ol pren.” Na ripot i tok moa olsem “inap 30 pesen bilong ol pikinini i pilai laki ol i bin kirap mekim olsem taim ol i no gat 11-pela krismas yet.” Wanpela ripot (Why Do People Gamble Too Much​​—⁠Pathological and Problem Gambling) i tok, planti yangpela i pilai laki ol i save kisim mani bilong pilai long rot bilong stil o pamuk samting. Man! Samting nogut tru i kamap long pasin em pastaim ol man i ting em i no inap bagarapim man!

Yumi stap long taim bilong planti traim, olsem na nogut yumi mekim sampela samting i givim sampela traim moa long yumi. (Sindaun 27:12) Pasin bilong pilai laki​—⁠maski ol pikinini i stap o nogat, o man i pilai laki long liklik mani o bikpela mani​—⁠em inap bagarapim man long ol samting bilong spirit na yumi mas abrusim dispela pasin. Ol Kristen i save mekim sampela pilai bilong amamas, gutpela ol i raitim tasol ol namba ol i kisim, o ol i pilai tasol bilong amamas na ol i no raitim ol namba bilong makim husat bai win. Ol Kristen i gat gutpela tingting na ol i save lukautim ol yet na ol pren na famili bilong ol long ol samting bilong spirit, ol i no save pilai laki, maski em liklik mani tasol.

[Futnot]