Amamas Long Wok na Bel i Stap Isi—Dispela Inap Lus
WANPELA tokaut bilong Yunaitet Nesen, em Yunivesal Dekleresen ov Human Raits, i tok olgeta man i gat “rait long mekim wok.” Tasol sampela taim, sampela samting i save kamap na ol man i no gat wok. I gat kain kain samting i mekim na man inap holim wok mani o nogat, olsem ol bikpela bikpela bisnis na mani bilong kantri i stap olsem wanem. Olsem na taim ol kampani i pinisim sampela long wok o tok long mekim olsem, planti taim straik na pait i save kamap. Em wan wan kantri tasol i no gat dispela hevi. Wanpela man bilong raitim buk em i stori long dispela tok “wok,” na em i tok ‘dispela tok yet inap kirapim man long belhat na kros.’
I gat planti as na wok em i bikpela samting long yumi. Yumi kisim mani long en, na tu, em i helpim yumi long stap gut long tingting na long bel. Wok i save inapim laik bilong yumi man—yumi laik bai yumi ken mekim gutpela wok na i stap bilong yumi i gat as bilong en. Na tu, wok i save helpim yumi long amamas long yumi yet. Olsem na sampela man em ol i gat planti mani bilong lukautim ol yet o ol inap ritaia long wok, ol i gat laik long mekim yet wok. Yes, wok em i bikpela samting tru na sapos yumi no gat wok, dispela inap kamapim bikpela hevi.
Tasol sampela man i holim wok mani ol i no amamas moa long wok bilong ol, long wanem, ol samting i kamap long ples wok i save putim hevi long ol. Olsem: Long nau ol bisnis i save resis resis wantaim, na long dispela as planti kampani i bin pinisim sampela wokman na bai kampani i no ken tromoi bikpela mani tumas long baim ol. Dispela inap putim hevi long ol wokman i stap yet, long wanem, ol i mas mekim bikpela wok moa.
Ol nupela nupela masin bilong nau, em ol man i tok i bilong helpim ol man, ating ol i bin kamapim sampela hevi long ples wok. Kompiuta, faks-masin, na Intenet i givim rot long ol man long kisim wok bilong ol i go bek long haus taim de bilong wok i pinis, na nau haus i kamap olsem ofis. Wanpela wokman i bin pilim olsem maski em i stap long haus, bos inap givim wok yet long em long rot bilong pager na mobail-fon bilong kampani.
Long dispela taim nau bilong ol bikpela senis i kamap long mani na ples wok, planti man i gat bikpela krismas liklik ol i pret, nogut bos i pinisim ol long wok paslain long taim ol i mas ritaia. Chris Sidoti, bipo em komisina bilong Human Raits, em i stori long dispela samting, olsem: “Planti man long nau i bin kisim tingting olsem ol man i winim 40 krismas ol i no gat save long wok long kompiuta na ol nupela masin samting.” Olsem na planti gutpela wokman em bipo ol narapela i bin tingim ol olsem man i gat strong na save, nau long tingting bilong ol dispela man, ol i stap olsem man i lapun pinis na ol i no inap mekim gutpela wok. Tarangu!
Olsem na inap sampela yia pinis, pasin bilong wok strong na stap gut long kampani i bin wok long bagarap. Nius Libération bilong Frans i tok: “Taim liklik senis tasol i kamap long stok-maket na kampani i pinisim ol man long wok, orait nau pasin bilong stap gut long kampani em i save pinis. . . . Tru, man i mas wok mani, tasol em i mas mekim bilong helpim em yet; bilong helpim kampani, nogat.”
Tasol maski ol dispela hevi i wok long kamap planti moa, laik bilong man long mekim wok, dispela i stap yet. Olsem na nau long dispela taim bilong planti senis, yumi ken mekim wanem bilong kisim stretpela tingting long wok mani, na long wankain taim, pilim olsem yumi stap amamas long wok na bel i stap isi?
[Piksa long pes 3]
Ol nupela nupela masin bilong nau, ating dispela i bin kamapim sampela hevi long ples wok