Askim
Bilong wanem Aisaia 30:21 i tok long Jehova olsem “em bai i stap baksait long yupela na em bai i tokim yupela,” tasol pastaim Aisaia i tok long ves 20 olsem “Bai yupela i lukim em long ai bilong yupela yet”?
Aisaia 30:20, 21 i tok: “Bai yupela i lukim em long ai bilong yupela yet. Na taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.”
Dispela tupela ves i tok man i lukim Jehova, em Nambawan Tisa, i olsem Jehova i sanap long fran bilong em, tasol em i harim nek bilong Em long baksait. Tasol ol dispela tok i olsem tok piksa, olsem na yumi mas save ol i makim wanem samting.
Tok bilong ves 20 i kirapim yumi long tingim pasin bilong wokboi long redi oltaim long bihainim ol tok bilong bosman bilong em na mekim wok bilong em. Wokboi i save lukluk oltaim long han bilong bosman na bai em inap save long samting bosman i laik em i mas mekim. Long wankain pasin i olsem lain bilong Jehova long nau ol i lukluk gut long ol tok em Baibel i as bilong en, em Jehova i givim long rot bilong oganaisesen bilong em long graun. (Song 123:1, 2) Yes, ol i mekim ol samting Jehova i tokim ol long mekim, long rot bilong “wokboi i gat gutpela tingting.”—Matyu 24:45-47.
Tasol dispela nek ol wokboi bilong God i harim long baksait i makim wanem samting? I stret yumi ken ting olsem dispela nek i makim ol toktok God i bin mekim bipo na nau i stap long Baibel, na i olsem dispela nek i toktok long yumi taim “bosboi i gat gutpela tingting” i helpim yumi long kisim gut save long ol dispela tok. (Luk 12:42) Ol wokboi bilong God long nau, ol i harim nek bilong God taim ol i givim bel long stadi long Baibel na wok long bihainim ol stiatok bilong en. Ol buk samting dispela “wokboi” o “bosboi i gat gutpela tingting” i bin redim i save helpim ol wokboi bilong God long mekim olsem. Taim ol wokboi bilong God ol i redi long kisim ol tok i kam long Nambawan Tisa na ol i stadi long Tok Bilong God, em ol tok ol man i bin raitim planti handet yia i go pinis, orait i olsem ol i lukim God i sanap long fran bilong ol na ol i harim nek bilong em long baksait.—Rom 15:4.