Skelim Tok Bilong Jehova Long Olgeta De!

¹ Long olgeta wan wan de sampela samting i save kamap bilong traim bilip bilong yu. Ating wanpela man ausait yu save long em, em i wok long subim yu long raun wantaim em. Tisa bilong yu i laik bai yu kisim wanpela bikpela wok, o bos bilong yu i laik bai yu mas wok inap sampela aua moa. Ating skin bilong yu i no strong moa. Maski ol dispela traim inap painim yu wantu tasol, yu no stap wanpis. Nogat. Jehova i redi long givim gutpela tingting na save long yu bilong helpim yu long karim ol dispela hevi. Taim yu skelim skripsa bilong Baibel na ol stori bilong Wastaua olsem i stap long buklet Skelim Sampela Tok Bilong Baibel Long Olgeta De, dispela em wanpela rot bilong kisim tok bilong Jehova long olgeta de. Olsem wanem? Yu save ritim teks long olgeta de?

² I Gat Ol Samting Bilong Helpim Yu: Aisaia 30:20 i tok olsem Jehova bai “skulim yupela,” olsem na ol manmeri bilong God i ken i go long em bilong kisim helpim. Em i helpim yu long sanap strong na sakim ol samting i kamap bilong traim bilip bilong yu. Em bai helpim yu olsem wanem? Na ves 21 i tok, “Em bai i stap baksait long yupela na em bai i tokim yupela long rot yupela i mas bihainim.” Long nau Jehova i save givim tok bilong em long yumi long rot bilong Baibel na ol buk na nius samting yumi kisim long ‘gutpela wokboi.’ (Mt 24:45) Ol Wastaua bilong bipo ol i gat planti gutpela gutpela stori bilong givim gutpela tingting na save long yumi long klostu olgeta pasin em ol Kristen i mas bihainim. Taim yu skelim ol gutpela tok bilong Wastaua i stap long buklet Skelim Sampela Tok Bilong Baibel, bai yu kisim planti gutpela save bilong helpim yu long karim ol kain kain hevi.​​—⁠Ais 48:⁠17.

³ Makim Taim Bilong Skelim Teks: Maski i gat planti wok bilong mekim long moning, wanpela mama i save ritim teks na stori bilong Wastaua wantaim pikinini bilong em taim pikinini i kaikai. Ol tok bilong teks na beten, em ol laspela tok pikinini i save harim long olgeta moning paslain long em i go long skul. Ol dispela tok i save helpim em long sakim pasin pamuk, na pasin bilong litimapim kantri, na strongim bel long autim tok long ol narapela sumatin na ol tisa. Maski em tasol i wanpela Witnes long dispela skul, em i no bin pilim olsem em i stap wanpis.

⁴ Larim Jehova na Tok bilong em i stiaim wokabaut bilong yu. Sapos yu mekim olsem, bai yu pilim olsem em i stap tru, olsem wanpela pren yu bilip long en. Long olgeta de askim em long helpim yu! Wantaim planti milion manmeri bilong olgeta hap bilong graun em ol i save skelim Tok Bilong God long olgeta de, mipela i laik bai i olsem ‘ai bilong yu yet’ i lukim Nambawan Tisa.