“Em Inapim Wanpela Laik Bilong Bel Bilong Mi”
“MI LAIK tok tenkyu tru long dispela gutpela presen Draw Close to Jehovah. Em inapim wanpela laik bilong bel bilong mi—em laik bilong mi long pilim olsem Jehova i laikim na i tingim mi. Mi pilim olsem nau mi stap klostu moa long Jehova na gutpela Pikinini bilong em. Mi laik tokim olgeta man long dispela buk na givim wanpela kopi bilong en long ol man mi laikim tumas.” Dispela em i tingting bilong wanpela Witnes Bilong Jehova long nupela buk i gat 320 pes long en, em yumi bin kisim long “Ol Man Bilong Givim Bel Long Autim Tok Bilong Kingdom” Kibung Distrik yumi bin mekim long yia 2002 na 2003. Orait yumi ken skelim sampela gutpela samting bilong dispela nupela buk na kisim save long as na ol i wokim dispela buk.
Sampela Gutpela Samting Bilong Dispela Nupela Buk
Wanem ol tok i stap insait long dispela nupela buk? Olgeta tok i stap long tupela hap bilong stadi bilong dispela Wastaua—na planti tok moa! Dispela buk i gat 31 sapta, na longpela bilong olgeta wan wan sapta i klostu wankain olsem wanpela hap bilong Wastaua yumi save stadi long en. Bihain long sapta 3, ol i brukim buk long 4-pela hap—ol wan wan hap i stori long narapela narapela bikpela pasin bilong Jehova. Long kirap bilong ol wan wan hap, buk i stori long ol bikpela samting bilong pasin bilong God dispela hap i stori long en. Bihain long dispela i gat sampela sapta i stori long olsem wanem Jehova i save kamapim dispela pasin. Olgeta wan wan hap i gat wanpela sapta i stori long Jisas. Bilong wanem i olsem? Long wanem, Jisas i tok: “Man i lukim mi, em i lukim Papa.” (Jon 14:9) Jisas i save makim stret Jehova, olsem na ol samting Jisas i bin mekim i kamapim gut tru ol pasin bilong God. Long pinis bilong olgeta wan wan hap bilong buk i gat wanpela sapta bilong lainim yumi long olsem wanem yumi ken bihainim pasin bilong Jehova long kamapim dispela pasin buk i stori long en. Taim buk i stori long ol pasin bilong Jehova, dispela nupela buk i save kamapim sampela tok bilong olgeta buk bilong Baibel.
Insait long buk Draw Close to Jehovah i gat wanpela gutpela samting bilong helpim yumi. Kirap long sapta 2, olgeta wan wan sapta i gat wanpela blok ol i kolim “Questions for Meditation.” Ol skripsa na ol askim ol i putim long ol dispela blok i no bilong wokim riviu bilong sapta. Nogat. Ol i kamapim ol dispela bilong helpim yu long yusim Baibel taim yu tingim tingim samting sapta i stori long en. Ritim gut ol wan wan skripsa. Orait, tingim gut askim, na traim long mekim wok long tok yu ritim. Taim yu wok long tingim tingim ol tok olsem, dispela inap helpim yu long i go klostu moa long Jehova.—Song 19:14.
Ol i bin wok strong long painim save bilong redim gut ol piksa bilong ol i ken lainim na kirapim ol man. Seventin sapta i gat ol naispela piksa bilong ol samting Baibel i stori long en na ol i karamapim wanpela pes olgeta.
Wanem As na Ol i Wokim Dispela Buk?
Wanem as na ol i wokim buk Draw Close to Jehovah? Nambawan wok bilong dispela nupela buk em bilong helpim yumi long save gut long Jehova na stap klostu moa long em.
Olsem wanem? Yu inap tingim wanpela man, olsem wanpela Baibel-stadi o wanpela Witnes i lusim wok autim tok, em dispela buk inap helpim em? Olsem wanem long yu yet—yu kirap pinis long ritim dispela nupela buk? Sapos nogat, orait kirap nau long stretim sediul bilong mekim olsem. Lusim sampela hap taim long tingim gut ol tok yu ritim. Mipela i laik bai dispela buk i ken helpim yu long i go klostu moa long God Jehova na bai yu amamas na givim bel moa yet long autim gutnius bilong Kingdom bilong em!