Kisim Helpim Long Rot Bilong Stadi Long Buk Go Klostu Long Jehova
1 Long “Ol Man Bilong Givim Bel Long Autim Tok Bilong Kingdom” Kibung Distrik, yumi bin amamas tru long kisim dispela buk Go Klostu Long Jehova long tok Inglis. Bihain long spesel pablik tok long Epril 2004, yumi bin amamas tru long harim toksave olsem ol i kamapim pinis dispela buk long Tok Pisin! Na yupela bai amamas long harim olsem klostu nau dispela buk Go Klostu Long Jehova bai kamap long tok Hiri Motu tu. Planti brata na sista taim ol i kisim dispela buk namba wan taim, kwiktaim ol i ritim. Mipela i laik kirapim yu long mekim olsem sapos yu no bin mekim yet.
2 Long Oktoba bai yumi kirap stadi long buk Go Klostu Long Jehova long ol Buk Stadi Bilong Kongrigesen. Olsem wanem dispela stadi inap helpim yumi? Yumi mas redim gut pastaim. Insait long olgeta tupela tupela wik bai yumi stadi long wanpela sapta, sediul i no makim planti paragraf tumas long stadi long olgeta wan wan wik. Dispela bai larim bikpela haptaim bilong yu ken kamapim tingting i stap long bel bilong yu long ol tok yu bin stadi long en na tingim tingim gut. Na tu, sediul i no makim planti tumas paragraf bilong mekim long taim bilong riviu bilong ol wan wan sapta bambai i gat taim bilong mekim wok long wanpela bikpela samting bilong dispela buk.
3 Kirap long sapta 2, i gat wanpela blok i stap long pinis bilong olgeta wan wan sapta ol i kolim, “Ol Askim Bilong Skelim Long Bel.” Bihain long yupela i skelim pinis laspela paragraf long sapta, wasman bilong Buk Stadi bai askim olgeta long stori long dispela blok. Em bai kirapim olgeta insait long grup long kamapim tingting bilong ol, na bai ol i ken stori long ol tingting ol i bin kisim long ol skripsa taim ol i tingim tingim long bel. (Snd. 20:5) Na tu wasman bilong Buk Stadi i ken kamapim ol narapela askim olsem: “Dispela tok i lainim yu long wanem pasin bilong Jehova? Em i mekim wanem long laip bilong yu? Olsem wanem yu ken mekim wok long en bilong helpim ol narapela?” Em i laik kirapim olgeta long givim bel long bekim tok na i no traim save bilong ol bratasista long ol samting i no bikpela samting.
4 Buk Go Klostu Long Jehova i narapela kain long ol narapela buk bilong stadi. Tru ol narapela buk em ol “wokboi i gat gutpela tingting” i kamapim i litimapim nem bilong Jehova, tasol dispela buk i stori tasol long ol pasin bilong Jehova. (Mt. 24:45-47) Em wanpela gutpela samting yumi wetim! Taim yumi kisim save long pasin bilong Jehova dispela bai helpim gut yumi. Dispela stadi inap helpim yumi long i go klostu moa long Papa bilong yumi long heven, na bai yumi ken mekim gut wok bilong yumi long helpim ol narapela long mekim olsem tu.—Jem. 4:8.