Stadi Long Buk Lotuim God
Ol i bin wokim buk Lotuim Dispela Wanpela God Tru bilong stadi wantaim ol nupela taim ol i stadi pinis long buk Save. Taim yumi stadi long dispela buk long Buk-Stadi Bilong Kongrigesen, dispela bai redim yumi long yusim dispela buk long wok autim tok, na em bai strongim pasin bilong yumi long laikim na tenkyu tru long Jehova na oganaisesen bilong em. Taim yumi stadi long buk Lotuim God, olsem wanem bai dispela inap helpim tru yumi?
Lukautim Stadi: Long olgeta wik yumi bai stadi long wanpela sapta olgeta, olsem na ol wasman bilong Buk-Stadi i mas skelim gut taim. Ol i no ken lusim bikpela hap taim long ol paragraf long kirap bilong stadi, olsem na bai i gat bikpela taim moa bilong stori long ol bikpela tok long ol paragraf long namel bilong sapta. Mekim ol sotpela tok long ol askim long blok bilong riviu long pinis bilong wan wan stadi, na dispela bai helpim olgeta long tingim gut ol bikpela tok.
Long 9-pela sapta bilong buk Lotuim God, i gat sampela askim i stap namel long ol paragraf, na ol i bilong tingim na toktok long en. Sampela bilong ol kain askim olsem i stap long pes 48-49. I no olsem brata bilong ritim ol tok i mas ritim ol dispela askim tu taim em i ritim ol paragraf, nogat. Taim wasman i skelim ol dispela askim wantaim grup, em i ken askim ol pablisa long ritim na stori long ol skripsa.
Redi Paslain: Bilong redi gut long Buk-Stadi i no makim olsem yumi makim ol bekim na em tasol, nogat. Pasin bilong beten na tingim tingim long bel ol skripsa i stap long paragraf bai helpim yumi long redim gut ol tok yumi laik bekim, na bikpela samting moa, em i helpim yumi long redim bel bilong yumi. (Esr. 7:10, NW ) Yumi olgeta inap strongim bel bilong narapela narapela taim yumi kamapim ol bekim bilong yumi, tasol yumi no laik mekim olsem yumi tasol i wok long bekim ol tok.—Ro. 1:11, 12.
Taim yumi stadi long buk Lotuim God, dispela bai helpim yumi long i go klostu moa long Jehova na bai yumi redi long helpim ol man i gat gutpela bel long bung wantaim yumi long lotuim God. (Sng. 95:6; Jems 4:8) I gutpela dispela kaikai bilong spirit i ken helpim gut yumi olgeta.