Amamas Long Stadi Long Buk Tru Tru Baibel i Tok Wanem?
1 Wanpela gutpela samting tru yumi bin kisim long “Bihainim Tok Bilong God” Kibung Distrik em buk Tru Tru Baibel i Tok Wanem? Bai yumi mekim bikpela wok long dispela buk long taim bilong autim tok, na moa yet long taim yumi mekim ol Baibel stadi. Olsem na yumi mas save gut long dispela nupela buk. Bai yumi inap mekim olsem, long wanem, yumi bai stadi long en long Buk Stadi Bilong Kongrigesen kirap long wik bilong Epril 17, 2006.
2 Pastaim wasman bilong Buk Stadi Bilong Kongrigesen bai kolim ol askim i stap long kirap bilong olgeta wan wan sapta. Bihain yumi bai mekim stadi na em bai kamapim ol askim i stap long daunbilo bilong ol wan wan pes. Bai yumi ritim sampela bikpela skripsa na stori long ol. Blok “Ol Tok Baibel i Lainim Yumi Long En” long pinis bilong ol wan wan sapta bai helpim yumi long mekim riviu long ol tok, long wanem, blok hia i kamapim ol bekim bilong Baibel long ol askim i stap long kirap bilong ol sapta. Yumi bai amamas long bekim ol tok, long wanem, dispela buk i kamapim ol tok i klia, na i no hatwok long kisim, na yumi gat laik long save long en.
3 Apendiks bilong dispela buk i kamapim sampela save moa long kain kain tok. Yumi inap mekim wok long apendiks taim ol Baibel sumatin i gat laik long kisim sampela save moa long wanpela tok. Yumi bai stadi long sampela hap bilong apendiks long taim bilong Buk Stadi Bilong Kongrigesen. Brata i ritim ol paragraf long buk stadi bai ritim olgeta paragraf aninit long wanpela het tok bilong apendiks. Sapos stori i longpela, brukim long tupela o tripela hap. Apendiks i no gat ol askim bilong stadi. Tasol wasman bilong buk stadi i ken kamapim sampela askim long ol bikpela tok na ol bratasista i ken bekim.
4 Long taim yumi stadi long buk Baibel i Tok long Buk Stadi Bilong Kongrigesen, bai yumi stadi hariap liklik. Yumi no gat wok long stadi hariap taim yumi stadi long dispela buk wantaim ol narapela, na moa yet sapos ol man i no gat save long Baibel o ol i gat liklik save tasol. (Ap. 26:28, 29) Long taim yumi mekim Baibel stadi wantaim ol man, yumi mas skelim gut ol skripsa na kamapim gut insait bilong ol tok piksa. Olsem na putim mak long i stap long Buk Stadi long olgeta wik na insait tru long stadi long buk Tru Tru Baibel i Tok Wanem?