Bihainim Bikpela Tisa Taim Yu Yusim Buk Baibel i Tok
1 Bikpela Tisa, Jisas, i stori gut long ol samting long pasin i no hatwok long ol man i kisimgut tok bilong em. Bilong kirapim tingting bilong ol man, sampela taim em i askim ol pastaim long kamapim tingting bilong ol. (Mt. 17:24-27) Em i stiaim tingting bilong ol i go long Tok Bilong God. (Mt. 26:31; Mk. 7:6) Em i was gut, nogut em i tokim ol disaipel long planti samting tumas, em i save ol bai wok yet long kisim save. (Jo. 16:12) Na tu, Jisas i laik save ol disaipel i bilip na kliagut long ol tok em i skulim ol long en o nogat. (Mt. 13:51) Ol i wokim buk Baibel i Tok bilong helpim yumi long skulim ol man long wankain pasin.
2 Ol Askim Long Kirap Bilong Sapta: Taim yu kirap stadi long wanpela sapta, em i gutpela long kolim ol askim i stap aninit long het tok bilong sapta. Ritim ol askim bilong kirapim laik bilong sumatin long kisim save. O yu ken kirapim em long mekim sampela tok bilong bekim ol askim. I no gat wok long toktok na skelim ol bekim bilong em inap longpela taim o stretim ol tingting kranki. Yu ken tok tenkyu tasol long tok em i mekim na kirap skelim ol paragraf. Ol tok em i mekim long ol dispela askim i helpim yu long save olsem yu mas skelim gut moa sampela hap bilong sapta o nogat.
3 Ol Skripsa: Em i bikpela samting long kamapim ol tok bilong Baibel long taim bilong stadi. (Hi. 4:12) Tasol i no gat wok long ritim olgeta wan wan skripsa ol i no raitim tok bilong en. Kamapim klia ol skripsa i as bilong ol bilip bilong yumi. Ating i no gat wok long ritim ol skripsa i givim sampela save moa long wanpela tok bilong Baibel. Buk Baibel i Tok i kamapim tok i tru long rot i no hatwok long kisimgut. Mekim stadi long pasin i no hatwok long kliagut long ol tok bilong en. Kamapim ol bikpela tok, na no ken toktok tumas long ol liklik liklik samting o skelim tok bilong ol narapela buk, sapos i no gat wok long mekim olsem.
4 Apendiks: Apendiks i gat 14 bikpela tok i givim sampela save moa long ol tok buk i kamapim. Yu ken skelim olsem i gat wok long stadi long ol tok bilong apendiks o nogat. Ating yu laik kirapim sumatin long skelim sampela tok bilong apendiks long taim bilong em yet, na moa yet sapos em i kliagut na i bilip long tok sapta i kamapim. Olsem: Sapos sumatin i bilip pinis olsem Jisas em i Mesaia, ating i no gat wok long skelim wantaim em dispela hap “Jisas Krais—Mesaia God i Bin Tok Promis Long Salim i Kam” taim yu stadi long sapta 4, “Jisas Krais Em i Husat?” Long sampela stadi, ating em i gutpela long lusim haptaim bilong stadi long skelim sampela tok bilong apendiks.
5 Sapos yu laik skelim wanpela hap bilong apendiks, yu ken redim ol askim pastaim na skelim ol paragraf wantaim sumatin olsem yu save skelim ol sapta. O yu ken lusim sampela minit long taim bilong stadi bilong mekim riviu long ol tok bilong apendiks. Long dispela rot yu ken save, sumatin i kliagut long ol tok em yet i bin ritim o nogat.
6 Riviu Blok: Blok i stap long pinis bilong ol wan wan sapta i kamapim ol tok i bekim ol askim i stap long kirap bilong sapta. Yu ken yusim ol dispela tok bilong mekim riviu long ol bikpela tok bilong sapta. Sampela pablisa i ting i gutpela long ritim ol dispela wan wan tok na ol skripsa bilong en wantaim sumatin. Ol i askim sumatin long stori liklik long olsem wanem ol skripsa i strongim dispela tok. Dispela i helpim tisa long save, sumatin i kliagut long ol bikpela tok bilong stadi na olsem wanem ol skripsa i sapotim ol dispela tok, na sumatin i wanbel wantaim ol dispela tok o nogat. Na tu, dispela pasin i skulim sumatin long yusim Baibel bilong kamapim tok i tru long ol narapela man.
7 Nambawan gutpela rot bilong inapim wok bilong yumi long skulim ol man na kamapim ol disaipel, em long rot bilong bihainim pasin bilong Jisas long skulim ol man. (Mt. 28:19, 20) Buk Baibel i Tok inap helpim yumi long mekim olsem. Mekim gutpela wok long dispela buk bilong skulim ol narapela long tok i tru long pasin i no hatwok long ol i ken kliagut long en na i kirapim tingting bilong ol.
[Askim Bilong Stadi]
1. Jisas i skulim ol man olsem wanem?
2. Olsem wanem yumi ken mekim wok long ol askim i stap long kirap bilong ol wan wan sapta?
3. Olsem wanem yumi ken mekim stadi long pasin i no hatwok long kliagut long ol tok bilong en?
4. Long wanem kain taim yumi ken lusim haptaim bilong stadi long skelim sampela tok bilong apendiks?
5. Sapos yumi laik skelim sampela tok bilong apendiks, yumi ken mekim olsem wanem?
6. Olsem wanem yu ken yusim riviu blok long pinis bilong ol wan wan stadi?
7. Olsem wanem yumi ken yusim buk Baibel i Tok bilong inapim wok bilong yumi?