Yusim Ol Gutpela Samting Long Buk Baibel i Tok

Taim Baibel sumatin i kisim stretpela save long ol tok bilong Baibel na em i bihainim ol samting em i lainim, em bai kamap strong long bilip na kamapim ol pasin bilong holi spirit. (Sng. 1:1-3) Yumi ken yusim sampela gutpela samting bilong buk Baibel i Tok na helpim sumatin long kamap strong moa long bilip.

Ol Askim Long Kirap Bilong Sapta: Olgeta sapta i gat ol askim long kirap bilong en, na ol bekim i stap insait long sapta. Yu ken tromoi ol dispela askim long sumatin long kirapim tingting bilong em long samting yupela bai stori long en. Yu ken askim sumatin long mekim sotpela bekim long olgeta wan wan askim. Sapos bekim bilong em i no stret, orait yu no ken hariap long stori gut na kamapim bekim bilong dispela askim. Ol bekim bilong em bai helpim yu long luksave long ol poin we yu mas eksplenim gut moa.—Snd. 16:23; 18:13.

Apendiks: Sapos sumatin i kliagut na em i wanbel long ol tok i stap long sapta, orait yu ken kirapim em long yusim haptaim bilong em yet long skelim apendiks i stret long sapta. Long neks stadi, yusim sampela minit long painimaut sapos em i kliagut long ol tok em i bin ritim. O, taim yupela i stadi, yupela i ken lusim sampela haptaim long stori long ol tok i stap long apendiks. Yupela i ken ritim ol paragraf na yu ken tromoi ol askim em yu bin redim paslain long stadi.

Riviu Blok: Blok i stap long pinis bilong wan wan sapta i kamapim ol tok i bekim ol askim i stap long kirap bilong sapta. Yu ken yusim dispela blok long painimaut sapos sumatin i kliagut na em inap stori long ol bikpela tok em i lainim long dispela sapta. Yutupela wantaim i ken ritim strong ol tok i stap long dispela blok na ritim tu ol skripsa i stap wantaim ol dispela tok. Askim sumatin long yusim skripsa long stori long wai na dispela tok em i tru.—Apo. 17:2, 3.