Olgeta i Amamas Tru Long Nupela Buk Ol i Kamapim Long Kibung Distrik-Nupela Buk i Kamapim Save Bilong God
1 Long kibung distrik bilong yumi i go pinis, yumi bin amamas tru long harim olgeta tok bilong program, a? Long Sarere long belo bek, amamas bilong yumi i go bikpela tru taim yumi harim toksave long nupela buk, Save i Bringim Man Long Laip Oltaim, na sampela tok moa ol i mekim long buk bihain long dispela. Ol planti bilion manmeri long graun ol i mas kisim dispela save em God tasol inap givim long yumi—em save bilong God na Pikinini bilong em, Krais Jisas.—Snd 2:1-6; Jon 17:3.
2 Brata i mekim tok i bin stori gut tru long sampela hap bilong buk. Olsem: Ol het-tok bilong ol sapta bilong kirapim tingting, ol gutpela piksa, ol tok i tru ol sapta i kamapim gut, ol askim i no hatwok long bekim, na blok ol i putim long pinis bilong wan wan sapta, nem bilong en, “Traim Save Bilong Yu”—em sampela samting olgeta man i kaunim buk bai i laikim tru. Tasol dispela buk bai helpim moa yet ol Baibel-stadi bilong yumi long kisim save hariap long ol as tok bilong Baibel.
3 Long laspela tok bilong Sarere na Sande, ol i bin kirapim yumi long mekim wok long dispela buk taim yumi mekim famili-stadi. Ating nau yu save pinis long ol tok bilong dispela buk. Na ating famili i bin toktok wantaim long sampela tok yu ken tingim taim yu laik tilim dispela buk long ol man.
4 Bilong Tingim Gen: Ating yu inap tingim sampela bikpela tok brata i bin kamapim taim em i mekim tok “Bilong Wanem Ol Man i Mas Kisim Save Long God.” Olsem: (1) Taim yu mekim wok long dispela buk long ol Baibel-stadi, stori tasol long ol tok buk yet i kamapim bilong strongim as tok bilong wan wan sapta; no ken kamapim ol tok bilong narapela buk samting na bai dispela i karamapim ol bikpela tok. (2) Ol sapta i no longpela tumas—em inap long yu ken pinisim wanpela sapta long olgeta wan wan stadi. (3) Long pinis bilong olgeta wan wan sapta, ol askim i stap long blok i gat nem “Traim Save Bilong Yu” bai helpim yu long stori gen long sapta.
5 Mekim Wok Long En Long Ol Baibel-Stadi: Planti pablisa i bin askim olsem, ol i mas senisim buk ol i mekim Baibel-stadi long en i go long nupela buk, o nogat. Sapos yu stap namel samting long buk nau yu mekim stadi long en, i gutpela sapos yu pinisim dispela buk. Tasol sapos nogat, mipela i laik yu ken senisim i go long buk Save. Sapos yu bin kirapim stadi long wanpela buklet o liklik nius, long taim stret, givim nupela buk long man na kirap stadi long en. Bai i gat sampela toksave moa long pasin bilong mekim wok long dispela buk Save bai kamap long Wok Kingdom Bilong Yumi long ol mun i kam bihain.
6 Jehova i givim dispela nupela buk long yumi bilong helpim yumi long skulim ol narapela long dispela save i bringim man long laip oltaim. Yumi mas redi gut nau na givim bel tru long wok i stap yet bilong mekim.