Autim Tok i Tru Long Olgeta De Olsem Jisas i Bin Mekim
1 Taim Jisas i bin kam long graun, em i kam bilong mekim wanpela wok tasol. Em olsem: “Bilong autim tok tru.” (Jo 18:37) Em i autim tok tru long ol gutpela gutpela pasin na laik bilong Papa bilong em. Long Jisas, dispela wok i olsem kaikai bilong em; em i nambawan bikpela samting long laip bilong em. (Jo 4:34) Luk i tok, “long olgeta de [Jisas] i wok long skulim ol manmeri insait long banis bilong tempel.” (Lu 19:47) Jisas i no stap longpela taim long graun, tasol em i mekim bikpela wok long dispela hap taim em i stap. (Jo 9:4) Klostu long taim em i dai, em inap tokim Papa bilong em olsem: “Mi bin soim biknem na strong bilong yu long ol manmeri bilong dispela graun. Mi pinisim pinis dispela wok yu bin givim mi long mekim.”—Jo 17:4.
2 Wankain olsem Jisas, taim bel bilong yumi i pilim tru ol samting Jehova i bin mekim, dispela i kirapim yumi long tokaut long em long olgeta de. Bai yumi kamap olsem ol disaipel bilong Jisas, em ol i no pret long tokaut: “Mitupela i no inap pasim maus. Mitupela i mas autim tok long olgeta samting mitupela i bin lukim na harim.” (Ap 4:20) Oltaim ol i save tokaut long Jehova, long wanem, Baibel i tok, “long olgeta de, . . . ol i no lusim wok bilong autim gutnius. Nogat.” (Ap 5:42) Yumi mas askim yumi yet olsem, ‘Mi wok long bihainim pasin bilong Tisa bilong mi, Jisas?’
3 Taim i Sot Pinis Bilong Autim Tok: Jisas i tok profet olsem, taim tok bilong Kingdom i kamap pinis long olgeta hap, “bihain tasol bai las de i kamap.” (Mt 24:14) Dispela i kirapim yumi long tingim tru dispela wok yumi mekim—em i bikpela wok tru na taim i sot pinis bilong mekim. Laip bilong planti milion manmeri inap lus, olsem na i no gat narapela wok bilong mekim em i bikpela wok na em inap helpim tru ol man olsem dispela wok. Pinis bilong ol pasin nogut i kam klostu, olsem na taim bilong pinisim dispela wok i sot tru!
4 Ol ripot i kamapim olsem, Jehova i wok long hariapim wok bilong bungim ol man i olsem sipsip. (Ais 60:22) Long planti hap bilong graun, planti manmeri tru i wok long kam insait long tok i tru, na i olsem ol i tok: “Mipela i harim olsem God i stap wantaim yupela . . . Olsem na mipela i laik kamap wanlain wantaim yupela”! (Sek 8:23) Nau, winim olgeta taim bipo, tok bilong Jisas em i kamap tru, olsem: “Planti kaikai tumas i mau pinis long gaden, tasol i no gat planti wokman . . . Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Mt 9:37, 38) Ating dispela i mas kirapim yumi long wok strong olsem ol disaipel bilong Jisas, em “oltaim ol i stap long tempel na ol i litimapim nem bilong God,” a?—Lu 24:53.
5 Kamapim Tok i Tru Long Olgeta De: Long olgeta de, yumi mas painim rot long kamapim tok i tru long ol narapela. I gat planti rot i op. Olsem wanem? Yu inap painim liklik hap taim bilong toktok wantaim wanpela pren long telefon em yu ting em bai harim tok? O raitim pas long wanpela man i no bin stap long haus? O yu bin tingting long tilim nius long papa bilong stua taim yu baim kaikai? Ating bai yu inap tingim planti narapela rot em i op long yu long olgeta de bilong tokim ol narapela long ol gutpela samting yu wetim. Sapos yu strongim bel liklik na yu mekim olsem, Jehova bai helpim yu.—1 Te 2:2.
6 Olsem na taim yumi laik kirapim ol wok bilong yumi long olgeta wan wan de, gutpela sapos yumi askim yumi yet olsem: ‘Mi bai redi long autim tok long narapela sapos rot i op long nau?’ Bihainim tingting bilong Jisas, em i kamapim as na em i bin kam long graun na i tok, “Mi mas autim gutnius bilong kingdom bilong God.” (Lu 4:43) Sapos yumi laik kamap wankain olsem Tisa bilong yumi, bai yumi tu i mekim olsem.—Lu 6:40.