Wok Strong Moa Long Autim Tok Taim Pinis i Kam Klostu
1 Taim bilong kisim kaikai long gaden em taim bilong amamas. Na tu, em taim bilong mekim bikpela wok. I gat liklik hap taim tasol bilong kisim ol kaikai. Ol wokman i no ken lusim nating taim bilong mekim wok bilong ol.
2 Jisas i mekim tok piksa na em i makim “las de bilong dispela graun” i olsem taim bilong kisim kaikai. (Mt 13:39) Yumi stap long pinis bilong pasin bilong dispela graun, na yumi no gat bikpela hap taim i stap bilong autim tok long “olgeta hap bilong graun.” (Mt 24:14) Taim pinis i kam klostu moa, yumi mas wok strong moa long mekim wok autim tok. Bilong wanem yumi mas wok strong moa? Jisas i tok: “Planti kaikai tumas i mau pinis long gaden, tasol i no gat planti wokman i stap bilong kisim.”—Mt 9:37, 38; Ro 12:11.
3 Hariap Long Mekim Dispela Wok: Taim Jisas i kirapim bikpela wok autim tok bilong em, em i gat 3 na hap yia tasol bilong pinisim dispela wok God i bin givim em. Em i tingim taim i sot pinis na em mekim wok. Em i tok: “Mi mas autim gutnius bilong kingdom bilong God . . . God i salim mi na mi kam bilong mekim dispela wok.”—Lu 4:43.
4 Em i skulim ol disaipel bilong em long tingim tu olsem taim i sot pinis. (Mk 13:32-37) Olsem na “long olgeta de, ol i save go long tempel na long ol haus bilong ol manmeri, na ol i wok long skulim ol manmeri. Ol i no lusim wok bilong autim gutnius. Nogat. Ol i tokaut klia olsem, Jisas em i dispela man God i bin promis long salim i kam.” (Ap 5:42) Ol narapela wok i no bin kamap olsem nambawan samting long i stap bilong ol. Maski ol disaipel i no planti, ol i bin autim gutnius “long olgeta manmeri i stap long graun.”—Kl 1:23.
5 Long nau i gat as tru na yumi mas tingim moa yet olsem taim i sot pinis, long wanem, “taim bilong olgeta samting i laik pinis em i klostu nau.” (1 Pi 4:7) Jehova i bin makim wanpela de na aua bilong pinisim ol pasin nogut bilong nau. (Mt 24:36) Bai yumi pinisim wok autim tok insait long dispela hap taim i stap yet. Olsem na yumi save wok strong yet long autim gutnius long planti man moa.
6 Taim yumi mekim bikpela wok autim tok nau long taim pinis i kam klostu, bai yumi amamas long tok long Jehova olsem Jisas i bin tok: ‘Mipela i pinisim dispela wok yu bin givim mipela long mekim.’—Jo 17:4.