“Wok Strong Long Autim Tok”
1 Sapos yu kisim wanpela samting i gat rait “MEKIM HARIAP” long en, bai yu ting olsem wanem long dispela samting? Dispela tok i makim olsem yu mas hariap long mekim dispela samting. I gat gutpela as na Pol i tokim ol Kristen long “wok strong long autim tok.” (2 Ti 4:2) Olsem wanem? Yu save putim dispela wok olsem namba wan wok yu mas mekim?
2 Ating Pol i bin harim tok olsem sampela brata i no “wok strong” long mekim wok bilong ol olsem Kristen. (Ro 12:11) Dispela i mekim na ol i no kisim planti gutpela samting long wok autim tok bilong ol, na tu, ol i no kisim amamas ol inap kisim taim ol i helpim ol narapela.
3 Tingting Bilong Jisas Long Autim Tok: Jisas i bin kisim amamas long wok bilong autim tok! Em i tok: “Kaikai bilong mi, em long bihainim laik bilong [God] na long pinisim wok em i bin givim mi.” Pasin bilong Jisas i kirapim ol disaipel bilong em, em i bin strongim ol taim em i tok, “kaikai i redi pinis” bilong kisim. (Jo 4:34, 35) Wok autim tok bilong Jisas i kamapim tingting bilong em olsem taim i sot pinis, na dispela i klia tru taim em i tokim ol disaipel long “beten long Papa bilong gaden, bai em i salim ol wokman i go bungim kaikai bilong en.” (Mt 9:38) Jisas i amamas long wok em i kisim bilong autim tok, na em i tingting strong olsem i no gat wanpela samting i ken pasim em long mekim olsem.
4 Olsem Wanem Long Yumi? Long nau, taim i sot tru na yumi mas wok strong moa long autim tok, winim olgeta taim bipo. Long planti hap bilong graun, ol kaikai i mau na i redi pinis bilong kisim. Na maski long ol kantri ol Witnes Bilong Jehova i bin autim gut tok long en, planti tausen i save kisim baptais long olgeta yia. Pinis bilong dispela pasin bilong nau i wok long i kam klostu tru, olsem na yumi “mas wok strong long mekim wok bilong Bikpela.” (1 Ko 15:58) Long nau, em i bikpela samting long yumi mas taitim bun tru long autim tok bilong Kingdom long ol narapela, winim bipo.
5 Yumi mas insait tru long wok bilong autim gutnius long ol narapela, long ol haus na long olgeta hap bilong teritori yumi ken painim ol man long en. Taim yumi insait tru long wok bilong autim tok, yumi kamapim klia olsem yumi putim Kingdom olsem namba wan samting long i stap bilong yumi. (Mt 6:33) Pasin bilong yumi long wok strong long autim tok bai givim bikpela amamas tru long yumi.