Wanem Pasin Bilong Sampela Em Ol Man i Save Tingim?
INAP olsem 3 tausen yia i go pinis, Devit i wok long ranawe long King Sol bilong Israel. Devit i salim tok long Nabal, em wanpela maniman na i gat planti lain sipsip na meme, na Devit i askim em long sampela kaikai na wara. Nabal i gat dinau long Devit wantaim lain bilong em long ol i bin lukautim gut ol sipsip na meme bilong em na bagarap i no painim ol. Tasol Nabal i no laik givim kaikai long ol. Em i singaut bikmaus na i krosim lain bilong Devit. Nabal i mas lukaut, long wanem, Devit i no inap larim wanpela man i mekim olsem long em.—1 Samuel 25:5, 8, 10, 11, 14.
Pasin bilong Nabal i no wankain olsem pasin bilong ol lain bilong Midel-Is, em ol i save mekim gut long ol man i kam lukim ol na ol man bilong narapela hap. Olsem na Nabal i kisim wanem kain nem? Baibel i tok “em i man bilong kros na pasin bilong en i no gutpela,” na em i “hambakman na em i no save harim tok.” Insait bilong nem bilong em i olsem “krankiman,” na pasin bilong em i stret wantaim dispela. (1 Samuel 25:2-3, 17, 25) Yu laik bai ol man i tingim yu olsem? Yu man bilong mekim hatpela pasin long ol man, na yu mekim moa yet sapos ol i olsem man nating tasol na i no gat strong? O yu save mekim gutpela pasin long ol man na givim kaikai samting long ol na tingim ol?
Abigel—Em Meri i Gat Gutpela Tingting
Hatpela pasin bilong Nabal i mekim na bikpela hevi i laik painim em. Devit na 400 man bilong em ol i kisim bainat na ol i go bilong stretim Nabal. Abigel, em meri bilong Nabal, em i harim tok bilong ol samting i bin kamap. Em i save, bikpela pait i laik kamap. Em i mekim wanem? Kwiktaim em i kirap redim planti kaikai na wain samting, na em i go bilong bungim Devit wantaim lain bilong em. Taim em i bungim ol pinis, em i krai long Devit olsem em i no ken kapsaitim nating blut bilong ol man. Devit i bel sori na em i harim krai bilong Abigel na i no tingting moa long bagarapim Nabal. Bihain liklik, Nabal i dai. Devit i lukim ol gutpela pasin bilong Abigel na em i kisim em olsem meri bilong em.—1 Samuel 25:14-42.
Abigel i kisim wanem kain nem long ai bilong ol man? Em i kisim nem olsem meri i gat “planti gutpela tingting na save.” Yumi save em i kain meri olsem, long wanem, em i save long samting em i mas mekim na wanem taim em i mas mekim. Em i stap gut long man bilong em na i mekim ol samting bambai dispela krankiman wantaim ol wanhaus bilong em i no ken kisim bagarap. Bihain Abigel i dai, tasol em i gat gutpela nem tru olsem meri i gat gutpela tingting na save.—1 Samuel 25:2-3.
Pita i Gat Wanem Kain Nem?
Orait nau yumi ken i kam long taim bilong ol aposel na tingim 12-pela aposel bilong Jisas. Wanpela aposel i strong long kamapim tingting bilong em na bel i save kirapim em long tokaut kwik, em Pita, o Sifas, pastaim em i man bilong kisim pis long hap bilong Galili. I luk olsem em i strongpela man na em i no pret long kamapim tingting i stap long bel bilong em. Yumi ken tingim taim Jisas i bin wasim lek bilong ol disaipel. Pita i mekim wanem taim Jisas i laik wasim lek bilong em?
Pita i tokim Jisas: “Bikpela, ating yu laik wasim lek bilong mi?” Jisas i bekim tok olsem: “Samting mi mekim, nau yu no klia long en. Tasol bihain bai yu klia.” Pita i tok: “Yu no ken wasim lek bilong mi. I no ken tru.” Em nau, Pita i tokaut strong, tasol bel i kirapim em long tokaut kwik na i no skelim pastaim. Orait Jisas i tok wanem long em?
Jisas i tok: “Sapos mi no wasim yu, orait yu no inap i stap wantaim mi.” Orait Saimon Pita i tokim em: “Bikpela, sapos olsem, orait yu no ken wasim lek bilong mi tasol. Yu mas wasim han na het tu wantaim.” Em nau, pastaim Pita i tok em i no laik, tasol nau em i laik bai Jisas i wasim ol narapela hap bilong bodi wantaim! Tasol ol man inap save gut long tingting i stap long bel bilong Pita. I no gat pasin giaman i stap long bel bilong em, nogat.—Jon 13:6-9.
Taim yumi tingim Pita, yumi tingim tu ol pasin kranki bilong em, em man bilong graun tasol. Olsem: Ol man i sutim tok long em na tok em i wanpela disaipel bilong Jisas bilong Nasaret em kot i makim em bilong i dai, na long ai bilong ol, Pita i tokaut 3-pela taim olsem em i no save long Krais. Bihain Pita i pilim tru popaia bilong em, na em i krai nogut tru. Em i no pret long kamapim bel hevi bilong em long dispela pasin em i bin mekim. Na samting yumi mas tingim i olsem: Ol man bilong raitim Gutnius long Baibel ol i bin raitim dispela stori taim Pita i bin tok em i no save long Krais, na yumi ken ting Pita yet i bin kamapim dispela stori long ol. Em i gat pasin daun na em i no surik long kamapim ol pasin kranki bilong em. Olsem wanem long yu? Yu gat dispela kain pasin daun?—Matyu 26:69-75; Mak 14:66-72; Luk 22:54-62; Jon 18:15-18, 25-27.
Sampela wik bihain long dispela, holi spirit i pulap long Pita na em i autim tok strong long bikpela lain Juda long Pentikos. Dispela i makim tru olsem dispela Jisas, i kirap bek pinis, i bilip tru long Pita.—Aposel 2:14-21.
Long narapela taim Pita i pundaun long narapela kain samting. Aposel Pol i tok, taim sampela brata Juda i no kamap yet long Antiok, Pita i save bung wantaim ol bilipman bilong ol narapela lain. Tasol nau em i stap longwe long ol, long wanem, em “i pret long dispela lain Kristen i save strong long pasin bilong katim skin,” em ol i bin lusim Jerusalem na nau tasol ol i kamap long Antiok. Pol i kamapim long ples klia pasin kranki bilong Pita, pastaim em i bung wantaim ol dispela narapela lain na bihain em i givim baksait long ol.—Galesia 2:11-14.
Tasol taim i luk olsem planti disaipel bilong Jisas i laik lusim em, wanem disaipel i strongim bel na i tokaut long tingting bilong em? Long dispela taim Jisas i kamapim nupela kain tok olsem ol i mas kaikai bodi na dring blut bilong em. Em i tok: “Sapos yupela i no kaikai bodi bilong Pikinini Bilong Man, na sapos yupela i no dringim blut bilong em, bai yupela i no gat laip i stap long yupela.” Planti disaipel Juda bilong Jisas ol i pundaun long dispela tok na ol i tok: “Dispela tok em i hevi tumas. Husat inap long harim?” Orait nau wanem samting i kamap? “Planti disaipel bilong en i lusim em, na ol i go bek, na ol i no wokabaut moa wantaim em.”—Jon 6:50-66.
Orait nau Jisas i lukluk long 12-pela aposel na i askim ol: “Ating yupela tu i laik lusim mi na i go?” Pita i tokim em: “Bikpela, bai mipela i go long husat? Tok bilong yu tasol i save givim laip i stap gut oltaim oltaim. Na mipela i bilip, na i save gut olsem, yu dispela gutpela stretpela man God i bin makim bilong em yet.”—Jon 6:67-69.
Orait Pita i kisim wanem kain nem? Taim yumi ritim stori bilong em long Baibel, yumi pilim tru pasin bilong em, em i no man bilong giaman—em i save kamapim stret bel bilong em, na em i stap gut long Jisas, na em i no surik long kamapim ol pasin kranki bilong em yet. Tru tumas, em i bin kisim gutpela nem tru!
Ol Man i Tingim Jisas i Wanem Kain Man?
Jisas i mekim wok bilong em long graun inap 3 na hap yia tasol. Tasol ol disaipel bilong em i tingim em i wanem kain man? Em i nambawan olgeta, no gat sin, olsem na yu ting em i save stap longwe long ol man? Yu ting em i mekim hatpela pasin na bosim strong ol disaipel, long wanem, em i save em i Pikinini bilong God? Em i pretim ol na subim ol long bihainim tok bilong em? Em i tingting tumas long em yet na em i no save amamas na lap liklik? Em i gat planti wok tumas na em i no gat taim bilong mekim gut long ol man i no gat strong na ol sikman o ol pikinini? Em i tingim ol man bilong ol narapela ples na ol meri i olsem samting nating tasol, olsem ol man i bin mekim long dispela taim bipo? Baibel i tok wanem long pasin bilong Jisas?
Jisas i save tingim ol manmeri. Taim yumi ritim stori long wok bilong em, yumi lukim olsem planti taim em i bin oraitim ol man bun bilong ol i bagarap na ol sikman. Em i wok strong long helpim ol man i sot long ol samting. Em i tingim ol pikinini na em i tokim ol disaipel: “Yupela larim ol pikinini i kam long mi. Yupela i no ken pasim ol.” Orait nau Jisas “i holim ol pikinini long han bilong en, na i putim han antap long ol, na em i askim God long mekim gut long ol.” Yu save lusim hap taim bilong i stap wantaim ol pikinini, o yu gat planti wok tumas na yu no lukim ol i stap?—Mak 10:13-16; Matyu 19:13-15.
Taim Jisas i stap long graun, ol Juda i gat planti ol lo bilong lotu ol i mas bihainim na i givim bikpela hevi long ol, tasol ol dispela lo i no stap long Lo Bilong Moses. Ol bikman bilong lotu i putim bikpela hevi long ol man na ol i hatwok long karim, tasol ol yet i no laik putim pinga bilong helpim ol man long karim. (Matyu 23:4; Luk 11:46) Tasol Jisas i narapela kain tru long ol! Em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.”—Matyu 11:28-30.
Taim ol man i bung wantaim Jisas, ol i kisim nupela strong. Em i no pretim ol disaipel, olsem na ol i no pret long kamapim tingting bilong ol. Em i save givim ol askim long ol na bai ol i ken kamapim tingting bilong ol. (Mak 8:27-29) Ol wasman Kristen i mas askim ol yet: ‘Ol wanbilip i gat wankain tingting long mi? Ol narapela elda i save kamapim tingting bilong ol long mi, o ol i pret long mekim olsem?’ Taim ol wasman i stap olsem man ol narapela i no pret long toktok wantaim ol, na ol i save putim yau long tok bilong ol narapela, na ol i isi long ol, dispela i save givim nupela strong long ol man! Sapos wasman i strong long daunim tingting bilong ol, orait ol bai surik long toktok na kamapim tingting bilong ol long em.
Tru, Jisas em i Pikinini bilong God, tasol em i no bin mekim wok nogut long strong o namba bilong em. Em i bin toktok gut wantaim ol man i harim ol tok bilong em. Em i bin mekim olsem long ol Farisi taim ol i laik trikim em na ol i askim em olsem: “I orait long yumi ken givim takis long Sisar, o nogat?” Jisas i tokim ol long soim wanpela mani long em, na em i askim ol: “Dispela piksa na dispela nem em i bilong husat?” Ol i tok: “Bilong Sisar.” Orait em i tokim ol: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Matyu 22:15-21) Em nau, liklik tok i gat gutpela tingting long en i bekim askim bilong ol.
Yu ting Jisas i save mekim sampela tok i gat liklik tok pani long en? Sampela man i ting olsem taim ol i ritim tok bilong Jisas, em i tok kamel i laik i go insait long ai bilong nil bilong samap, em i no gat hatwok olsem maniman i laik i go insait long Kingdom bilong God. (Matyu 19:23, 24) Yumi save, wanpela kamel i no inap i go insait long hul bilong nil bilong samap. Na i gat narapela tok i wankain olsem dispela, olsem yumi lukim liklik hap pipia i stap long ai bilong brata, tasol yumi no tingim bikpela plang i stap long ai bilong yumi yet. (Luk 6:41, 42) Tru tumas, Jisas i no wanpela pes drai man i save bosim strong ol man, nogat. Em i save mekim pasin pren na mekim gut long ol man. Ol Kristen long nau i ken bihainim dispela pasin bilong Jisas na dispela bai mekim gut bel bilong ol narapela long dispela taim bilong planti hevi.
Jisas i Sori Long Ol Meri
Ol meri i pilim olsem wanem taim Jisas i stap? I gat planti meri i save bihainim Jisas, na mama bilong em Maria tu. (Luk 8:1-3; 23:55, 56; 24:9, 10) Ol meri i no pret long i go klostu long Jisas, olsem na wanpela taim, wanpela meri ‘i save mekim pasin nogut’ em i wasim lek bilong Jisas long aiwara bilong em na em i welim lek bilong Jisas long sanda. (Luk 7:37, 38) Narapela meri, em i bin karim blut inap planti yia, em i go klostu long Jisas na putim han long klos bilong Jisas na bai sik bilong em i ken pinis. Jisas i mekim gutpela tok long bilip bilong dispela meri. (Matyu 9:20-22) Tru tumas, ol meri i no pret long i go klostu long Jisas.
Wanpela taim Jisas i toktok wantaim wanpela meri Samaria long hul wara. Meri i kirap nogut na em i tok: “Yu Juda, na mi meri bilong Samaria. Olsem wanem na yu tok, ‘Wara i kam, mi laik dring’?” Meri i mekim dispela tok, long wanem, ol Juda i no save poromanim ol Samaria. Orait Jisas i skulim meri hia long wanpela gutpela tok i tru i tok long ‘wara i kamap oltaim na i givim man laip i stap gut oltaim oltaim.’ Jisas i save stap bel isi wantaim ol meri na em i no pilim olsem ol i laik antap long em.—Jon 4:7-15.
Ol man i save tingim ol gutpela pasin bilong Jisas, na pasin bilong daunim laik bilong em yet. Em i man bilong laikim tru ol man. Jisas i makim pasin ol narapela i mas bihainim sapos ol i laik i stap disaipel bilong em. Olsem wanem long yu? Yu save bihainim gut pasin bilong em?—1 Korin 13:4-8; 1 Pita 2:21.
Olsem Wanem Long Ol Kristen Bilong Nau?
Long taim bilong yumi planti tausen gutpela Kristen ol i bin i dai, em sampela ol i lapun na ol i dai, na sampela ol i yangpela liklik. Tasol taim ol i dai ol i gat gutpela nem. Sampela, olsem Crystal, i lapun tru na em i dai, ol man i tingim yet pasin bilong ol, ol i save mekim gut long ol man, na ol i amamas long bung wantaim ol. Sampela, olsem Dirk, em i gat 40 krismas samting na em i dai, ol man i save tingim pasin bilong ol long lap na amamas na helpim ol man.
Na yumi ken tingim José bilong Spen. Long 1960 samting i gat tambu long wok bilong ol Witnes Bilong Jehova long Spen. Long dispela taim José i marit pinis na em i gat 3-pela yangpela pikinini meri. Em i gat wanpela gutpela wok long Barcelona. Tasol long dispela taim ol i sot long sampela strongpela elda Kristen long sauten Spen. Orait José i lusim gutpela wok mani bilong em na em wantaim famili i go sindaun long Málaga. Planti taim em i no gat wok mani, olsem na mani i sot na ol i gat hatwok tru long sindaun bilong ol.
Tasol José i gat nem olsem man bilong i stap gut long wok bilong autim tok, na em i lukautim gut ol pikinini meri bilong em na skulim gut ol, na meri bilong em Carmela i wok gut wantaim em na helpim em long mekim olsem. Taim ol i sot long man bilong stretim wok bilong kamapim ol kibung Kristen long dispela hap, long olgeta taim José i orait long mekim dispela wok. Tasol sori tru, taim em i gat 55 krismas samting, bikpela sik i painim em na em i dai. Tasol em i gat gutpela nem olsem wanpela elda i bin wok strong na stap gut long wok bilong em, na man bilong mekim gut long meri na ol pikinini bilong em.
Orait, ol man bai tingim wanem ol pasin bilong yu? Sapos asde yu bin i dai, nau ol man bai i stori olsem wanem long yu? Ating dispela askim bai kirapim yumi olgeta long wok strong long mekim gutpela pasin.
Yumi ken mekim wanem bilong kisim gutpela nem? Yumi ken wok strong long mekim moa yet ol gutpela pasin em holi spirit i save kamapim long man—olsem laikim tru ol man, no ken les kwik long ol, mekim gutpela pasin long ol, pasin isi, bosim gut skin, na sampela pasin moa. (Galesia 5:22, 23) Tru tumas, “gutpela nem i winim gutpela wel, na de man i dai em i winim de mama i karim em.”—Saveman 7:1, NW; Matyu 7:12.
[Piksa long pes 5]
Yumi save tingim pasin bilong Abigel, olsem meri i gat gutpela tingting
[Piksa long pes 7]
Yumi save tingim pasin bilong Pita, em man bilong kirap kwik na kamapim tingting bilong em, tasol em i no save giaman
[Piksa long pes 8]
Jisas i bin lusim hap taim bilong i stap wantaim ol pikinini