Askim

Long planti hap bilong graun, em pasin bilong ol man long givim presen long ol lain i marit. Yumi mas bihainim wanem ol stiatok bilong Baibel taim yumi givim presen o taim yumi kisim ol presen?

Baibel i orait long pasin bilong givim presen taim man i mekim wantaim stretpela tingting na long taim i stret. Long pasin bilong givim, Baibel i kirapim ol Kristen tru long bihainim pasin bilong Jehova, em i Man bilong givim ol gutpela gutpela samting long ol man. (Jems 1:17) Aposel Pol i kirapim ol wanbilip Kristen olsem: “Yupela i mas mekim gutpela pasin long ol manmeri. Na sapos sampela i sot long ol samting, orait yupela i mas givim sampela samting bilong yupela bilong helpim ol. Yupela i no ken lusim tingting long mekim ol dispela kain pasin, long wanem, em dispela kain ofa God i save laikim tru.” Olsem na Baibel i kirapim ol Kristen long givim samting.​—⁠Hibru 13:16; Luk 6:⁠38.

Long sampela kantri, taim wanpela man na meri i laik marit ol bai go long wanpela bikpela stua na wokim lista bilong ol samting ol i laik kisim olsem presen. Dispela stua bai holim wanpela kopi bilong dispela lista. Ol wanblut na pren bilong tupela bai kisim pas i toksave long ol long go long dispela stua na baim wanpela samting em tupela i raitim long lista. Dispela kain pasin i mekim na man bilong baim presen i no inap lusim bikpela haptaim long painim presen, na ol lain bilong kisim presen tu ol bai kisim ol samting ol i gat wok long en.

Em laik bilong ol lain i laik marit sapos ol i laik bihainim dispela kain pasin. Tasol ol Kristen i laik abrusim ol pasin i brukim ol stiatok bilong Baibel. Olsem: Olsem wanem sapos wanpela man na meri i laik marit i raitim long lista ol samting i gat bikpela pe tru long en? Sapos olsem, orait ating ol man i no gat planti mani ol bai i no inap givim presen, o ating ol bai pilim olsem i gutpela ol i no go long dispela marit na bai ol i no ken sem long givim wanpela presen i no gat bikpela pe long en. Wanpela meri Kristen i tok: “Pasin bilong givim presen long ol lain i marit i kamap olsem wanpela hevi. Mi bin traim long mekim gutpela pasin, tasol nau amamas mi save kisim long givim presen i no stap moa.” Em bai i no gutpela sapos marit i kamap samting bilong mekim man i no amamas, a?

Olsem na nogut tupela i laik marit i mekim na ol narapela i pilim olsem bilong tupela i ken amamas long presen ol i givim, ol i mas baim long wanpela kain stua i gat nem o presen i mas i gat bikpela pe bilong en. Jisas Krais i tok bikpela samting long ai bilong God em tingting i stap long bel bilong man i givim samting, i no presen i gat bikpela pe bilong en. (Luk 21:​1-4) Olsem tasol, aposel Pol i tok long ol presen man i givim long ol man i stap rabis na em i tok: “Yupela olgeta wan wan i mas tingting gut pastaim na save gut long wanem samting yupela i laik givim. Nogut wanpela man i bel hevi long givim samting, na nogut em i ting ol man i strong tumas long em i mas givim. Dispela pasin bilong givim em i no gutpela. God i save laikim man i amamas na i givim samting long laik bilong em yet.”​—⁠2 Korin 9:⁠7.

Long Baibel, i no gat wanpela tok i makim olsem i gat rong long kamapim olsem yu yet i bin givim presen​—⁠ating long rot bilong putim liklik pas wantaim presen​—⁠nogat. Tasol long sampela hap, em kastam bilong ples long kolim nem bilong man husat i bin givim presen long ai bilong ol narapela. Dispela kain pasin inap kamapim hevi. Ating ol man i givim presen i no laik bai ol narapela i save long dispela, long wanem, ol i no laik kisim biknem. Ol kain man olsem i bihainim stiatok i stap long Matyu 6:​3, em Jisas i tok: “Sapos yu laik helpim ol rabisman, orait han kais bilong yu i no ken save long samting han sut i mekim.” Ating sampela bai pilim olsem samting ol i givim em samting namel long ol yet na man ol i givim presen long em. Na tu, sapos man i kisim presen em i tokaut long ai bilong ol narapela long husat i bin givim presen long em, dispela inap kirapim sampela long skelim ol presen ol yet i bin givim wantaim presen bilong ol narapela, na dispela inap “kirapim ol long resis wantaim narapela.” (Galesia 5:​26, NW ) Ol Kristen bai i no laik mekim ol man i sem long rot bilong kolim nem bilong ol man i givim presen.​—⁠1 Pita 3:⁠8.

Yes, long rot bilong mekim ol samting i stret wantaim ol stiatok i stap long Baibel, pasin bilong givim presen samting bai stap olsem wanpela samting bilong amamas.​—⁠Aposel 20:⁠35.