Amamas Long Givim Samting
“Amamas bilong givim samting i winim amamas bilong kisim samting.”—APOSEL 20:35.
As na sampela i selebretim Krismas.
Olsem Jisas i tok, pasin bilong givim samting i save givim amamas long man i givim na long man i kisim. Bilong kisim dispela amamas, planti man i ting pasin bilong givim presen em i wanpela bikpela samting bilong Krismas. Olsem, maski long las yia i gat hevi bilong mani, wanpela wok painimaut i soim olsem long Aialan olgeta wan wan famili i tromoi winim 2,000 kina (660 U.S. dola) long baim ol Krismas presen.
Bilong wanem dispela i givim hatwok?
Planti i pilim olsem pasin bilong givim presen long Krismas i givim planti hatwok na i no givim bikpela amamas long ol. Bilong wanem i olsem? Planti man i pilim olsem ol i mas baim ol presen em ol yet i no gat inap mani long baim. Na tu, planti manmeri i save go baim ol presen long wankain taim na i mekim ol lain i longpela na dispela i mekim ol i taiet.
Wanem ol stiatok bilong Baibel inap helpim man?
“Bihainim pasin bilong givim ol samting long ol man,” em tok Jisas i bin mekim.a (Luk 6:38) Em i no makim stret wanpela taim bilong yia we ol man i mas givim presen, nogat. Jisas i kirapim ol disaipel bilong em long kisim pasin bilong amamas long givim samting long ol narapela.
“Olgeta wan wan i mas givim samting ol i pasim tok long bel long givim. Ol i no ken bel hevi na givim na narapela i no ken fosim ol long givim, nogat. God i save laikim tumas man i amamas long givim samting.” (2 Korin 9:7) Wanpela buk i stori long Baibel i tok dispela tok bilong Pol i makim olsem “taim ol man i givim samting, ‘narapela i no ken fosim ol long givim.’” Taim “man i amamas long givim samting,” em i no inap pilim olsem em i mas givim wanpela kain presen stret long wanpela man long wanpela taim stret bilong yia—olsem presen ol man i save givim long Krismas, nogat.
“Pasin bilong givim samting em i gutpela moa yet sapos man i gat laik long givim. Man i ken givim samting em i gat, na em i no gat wok long givim samting em i no gat.” (2 Korin 8:12) Em i no laik bilong God long ol Kristen i mas kisim dinau mani bilong baim ol presen i gat bikpela pe. Tasol taim man i “givim samting em i gat,” presen em i givim i “gutpela moa” na i no olsem samting man i orait tasol long en. Dispela i narapela kain tru long tingting ol bisnis i save kamapim long Krismas olsem “kisim nau, baim bihain!”
a Sampela Baibel i tok: “Givim.” Long tok Grik bilong bipo, dispela tok i makim samting man i wok yet long mekim. Bilong kamapim klia dispela tok bilong Jisas, Baibel New World Translation i tok “bihainim pasin bilong givim.”