Baibel Inap Helpim Marit Bilong Yu
LONG sampela, dispela tok marit i kirapim ol long tingim gutpela samting. Tasol long sampela narapela, em i mekim ol i bel hevi. Wanpela meri marit i tok: “Mi pilim olsem mi no marit. Man bilong mi i no save tingim mi, na olgeta taim mi pilim olsem mi stap wanpis.”
Wanem samting i mekim na tupela marit i bin tok promis long laikim tru narapela narapela ol i no pas gut moa? Wanpela as, em ol i no save long wok bilong ol insait long marit. Wanpela niusman i tok: “Yumi save marit, tasol yumi no bin kisim skul liklik long dispela.”
I no planti manmeri long nau i gat dispela kain save. Dispela i bin kamap klia long wanpela ripot (The National Marriage Project) bilong Rutgers Yunivesiti long New Jersey, Amerika, i tok: “Planti manmeri i bin kamap bikpela insait long famili we marit bilong papamama bilong ol i no gat amamas long en o papamama i bin katim marit. Ol i save long marit i no gat amamas long en, tasol ol i no save long gutpela marit em i wanem kain. Sampela i tok marit i gat amamas long en i mas ‘narapela kain long marit bilong papamama bilong mi.’ ”
Yu ting ol Kristen i no gat hevi long marit bilong ol? Nogat. Long taim bilong ol aposel i gat wok long tokaut stret long sampela Kristen long ol i “no ken painim rot bilong lusim” poroman bilong ol. (1 Korin 7:27) Tru tumas, marit bilong man na meri em sin i stap long skin bilong ol bai i gat sampela hevi, tasol yumi gat helpim. Tupela inap helpim marit bilong ol sapos ol i bihainim ol stiatok bilong Baibel.
Tru, Baibel i no wanpela buk bilong helpim marit tasol, nogat. Tasol Man i kamapim marit em i bin kamapim olgeta tok i stap long Baibel, olsem na yumi ken bilip tru olsem ol stiatok bilong en inap helpim ol marit. God Jehova i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis.”—Aisaia 48:17, 18.
Olsem wanem? Pasin laikim i bin stap namel long yutupela, em i no strong moa? Yu pilim olsem yu kalabus insait long wanpela marit we i no gat pasin laikim? Wanpela meri i bin marit inap 26 yia em i tok: “Bikpela pen dispela kain marit i kamapim i narapela kain tru. Em i save stap oltaim.” Tasol no ken ting olsem marit bilong yu i no gutpela na em tasol, nogat, gutpela moa yu kirap mekim sampela samting bilong helpim marit bilong yu. Stori i kamap bihain bai soim ol lain i marit long olsem wanem ol stiatok bilong Baibel i ken helpim marit bilong ol—em bai stori long pasin bilong kisim strongpela tingting na laik long lukautim marit.