“Yupela i Mas i Go Klostu Tru Long God, na Em Bai i Kam Klostu Tru Long Yupela”
Paslain na Bihain—Ol Senis Baibel i Kamapim Long Dispela Man
MUSIK em nambawan bikpela samting long laip bilong Rolf-Michael. Em i save kisim drak oltaim. Taim em i stap yangpela long Jemani, em i save dring planti strongpela dring na oltaim em i save kisim drak LSD, koken, hasis, na ol narapela drak i save bagarapim tingting.
Taim em i wok long traim long kisim hait ol drak i go long wanpela kantri long Afrika, ol polis i holim em na em i kalabus inap 13 mun. Taim em i stap long kalabus, dispela i opim rot long em long tingting long as bilong i stap laip.
Rolf-Michael na meri bilong em, Ursula, i laik save i gat wanem as na ol i stap na ol i laik save long tok i tru. Maski ol i no kisim helpim long ol lotu i tok ol i Kristen, ol i gat strongpela laik yet long save long God. Ol i givim askim long kain kain lotu, tasol ol i no amamas long bekim ol i kisim. Na tu, ol dispela lotu i no bin helpim tupela long i gat strongpela laik long senisim pasin bilong tupela.
Bihain Rolf-Michael na Ursula i bungim ol Witnes Bilong Jehova. Bihain long em i kirap stadi long Baibel, Rolf-Michael i pilim tru dispela tok: “Yupela i mas i go klostu tru long God, na em bai i kam klostu tru long yupela.” (Jems 4:8) Em i tingting strong long em i mas ‘rausim pasin bilong olpela man na kamap nupela man, em man God i mekim i kamap nupela na pasin bilong en i stretpela olgeta na i holi tru.’—Efesus 4:22-24.
Olsem wanem Rolf-Michael i ken kamap nupela man? Ol i soim em tok bilong Baibel olsem long rot bilong stretpela “save” pasin bilong man i ken ‘kamap nupela na kamap wankain olsem God yet.’—Kolosi 3:9-11.
Taim em i wok long kisim stretpela save, Rolf-Michael i senisim pasin bilong em na bai i stret wantaim ol stiatok bilong Baibel. (Jon 17:3) I hatwok tru long lusim drak, tasol Rolf-Michael i luksave olsem i gutpela sapos em i beten long Jehova na kisim helpim long em. (1 Jon 5:14, 15) Em i kisim sampela helpim moa taim em i bung wantaim ol lain i Witnes Bilong Jehova pinis em ol i wok strong long mekim laik bilong God.
Rolf-Michael i kisim save olsem pasin bilong dispela graun bai pinis na ol man i bihainim laik bilong God ol bai stap oltaim, na dispela tu i helpim em. Dispela i mekim na em i no bihainim pasin bilong graun bilong i stap sotpela taim, nogat, em i bihainim rot bilong pas gut wantaim gutpela God, Jehova, na kisim blesing oltaim. (1 Jon 2:15-17) Rolf-Michael i pilim tru tok bilong Sindaun 27:11: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Em i tenkyu tru na i tok: “Dispela ves i soim bikpela pasin laikim bilong Jehova, long wanem, em i opim rot long ol manmeri i ken mekim bel bilong em i amamas.”
Olsem Rolf-Michael, meri bilong em, na tripela pikinini bilong tupela, planti handet tausen manmeri i bin kisim helpim taim ol i bihainim ol stiatok bilong Baibel. Yu ken painim kain manmeri olsem long ol kongrigesen bilong ol Witnes Bilong Jehova i stap long olgeta hap bilong graun. Tasol sori tru, long sampela kantri, ol i save mekim ol giaman tok olsem ol Witnes ol i wanpela lain nogut i save brukim ol famili. Samting i painim Rolf-Michael i soim olsem dispela tok i no tru.—Hibru 4:12.
Rolf-Michael i tok, tok bilong Matyu 6:33 i kirapim yumi long putim ol samting bilong spirit i stap nambawan, i bin stiaim famili bilong em long stretpela rot ol i mas bihainim. Em na famili bilong em i tenkyu tru long Jehova olsem ol i Kristen na famili i stap amamas. Ol i mekim wankain tok olsem man bilong raitim song: “Bikpela i bin mekim gut tru long mi. Olsem na bai mi givim wanem samting long em?”—Song 116:12.
[Rait long pes 9]
God i opim rot long ol manmeri long mekim bel bilong em i amamas
[Blok long pes 9]
Ol Stiatok i Mekim Wok
Em hia sampela stiatok bilong Baibel i bin kirapim planti long lusim ol samting i kalabusim ol:
“Bikpela i laikim tru ol manmeri i no save laikim pasin nogut.” (Song 97:10) Taim man i luksave olsem ol pasin nogut i gat rong long en, na em i wok long kisim pasin bilong i no laik tru long ol dispela pasin, orait nau i isi moa long em long mekim ol samting God i laikim.
“Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Bilong lusim ol drak na ol narapela samting i save kalabusim man, man i mas skelim gut ol poroman bilong em. Pasin bilong pren wantaim ol Kristen husat bai helpim em long lusim ol samting i kalabusim em, dispela em i gutpela rot.
“Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi . . . bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Bel na tingting i no inap stap isi olsem long narapela rot, nogat. Na pasin bilong beten na wet long God, dispela bai helpim man long karim ol hevi na em i no ken mekim wok long ol drak bilong helpim em.