Olsem Wanem Yu Inap Makim Gut Ol Samting Yu Mas Mekim?

SOLOMON, em king bilong Israel long bipo, em i tok: “Man i gat gutpela tingting na save em bai putim gut yau na kisim sampela save moa.” Sampela taim yumi olgeta i bin popaia long makim ol samting yumi mas mekim, long wanem, yumi no bin putim yau long tok em sampela i givim long yumi.​—⁠Sindaun 1:​5, NW.

Bihain ol i bin raitim ol dispela tok bilong Solomon long Baibel wantaim ol narapela “3,000 gutpela sotpela tok i gat gutpela tingting” em i bin kolim. (1 King 4:32) Sapos yumi kisim save na putim gut yau long ol dispela savetok bilong em, yu ting dispela bai helpim yumi? Yes, “dispela gutpela tok em inap long givim yumi gutpela tingting na long lainim yumi long gutpela pasin. Na . . . bai i skulim yumi long wokabaut olsem man i gat gutpela save na long bihainim ol gutpela na stretpela pasin na long mekim wankain stretpela pasin long olgeta man.” (Sindaun 1:​2, 3) Orait nau yumi ken stori long 5-pela tok bilong stiaim yumi em Baibel i as bilong en na ol inap helpim yumi long bihainim gutpela tingting long makim gut ol samting yumi mas mekim.

Tingim Samting Dispela Bai Mekim Bihain

Sampela samting yu tingting long mekim, ol bai mekim sampela bikpela samting long yu. Olsem na paslain yet yu mas skelim gut wanem ol samting bai kamap. Na yu mas lukaut, nogut yu tingim ol samting nau tasol yu bai kisim, na yu no tingim ol hevi inap kamap bihain. Sindaun 22:3 i tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.”

Bilong helpim yu, raitim long pepa ol samting dispela bai mekim insait long sotpela taim na long bihain. Ating wanpela wok i gat gutpela pe bilong en na yu inap amamas long mekim, tasol nogut em i bilong sotpela taim tasol. O nogut bihain ol i salim yu i go wok long narapela hap longwe long ol pren o famili bilong yu. O nogut dispela nupela hap i no gat gutpela win o wara samting na sik inap painim yu, o yu no amamas liklik long dispela wok na bihain yu les tru long en. Em nau, yu mas skelim gut pastaim ol gutpela samting na ol hevi yu inap kisim, na nau yu ken makim wanem samting i bikpela samting tru.

No Ken Hariap Long Skelim

Sapos yu hariap long makim samting yu mas mekim, bihain yu bai lukim olsem yu no bin bihainim gutpela tingting. Sindaun 21:5 i tok: “Ol man bilong wok ol i save tingting gut na mekim wok, olsem na wok bilong ol i kamap gutpela na ol i gat planti samting. Tasol sapos ol man i hariap tumas long mekim wok . . . ol bai i sot long ol samting.” Olsem: Ol yangpela i laikim poroman, ol i mas tingting gut pastaim na no ken hariap long marit, nogut tok bilong man bilong raitim stori long bipo, em William Congreve bilong Inglan, i kamap tru long ol. Em i tok: ‘Sapos yumi hariap long marit, ating bai yumi bel hevi long dispela i go inap long planti yia.’

Tasol nogut yumi surikim nating taim long makim samting yumi mas mekim. Sampela samting i bikpela samting tru na yumi mas mekim hariap. Sapos i no gat as na yumi surikim taim, dispela inap nogutim yumi yet o ol narapela. Sapos yumi surikim taim bilong makim samting yumi mas mekim, ating dispela i no pasin bilong gutpela tingting.

Harim Tok Ol i Givim Long Yu

Ol hevi bilong ol man i no wankain stret, olsem na maski tupela man i gat wankain hevi, ating bai ol i no makim wankain samting ol bai mekim. Tasol yumi inap kisim helpim sapos yumi harim stori bilong samting ol narapela i bin mekim taim ol i gat wankain hevi olsem yumi. Askim ol long ol i gat wanem tingting nau long samting ol i bin mekim. Olsem: Sapos yu laik makim wanpela wok, askim sampela i mekim dispela wok long tokim yu long ol gutpela samting na ol samting nogut bilong en. Dispela wok ol i makim i helpim ol olsem wanem, na em i nogutim ol olsem wanem?

Baibel i tok: “Sapos yu laik mekim sampela wok, orait pastaim yu mas kisim tingting long planti arapela man, na bai wok bilong yu i ken kamap gutpela. Sapos yu no mekim olsem, bai yu hatwok nating.” (Sindaun 15:22) Tasol taim yumi laik kisim sampela tok bilong helpim yumi na lain long ol samting i bin painim ol narapela, yumi mas save olsem yumi yet i mas makim samting yumi bai mekim​—⁠na yumi yet bai karim ol hevi i kamap long en.​—⁠Galesia 6:​4, 5.

Bihainim Maus Bilong Bel Em Baibel i Skulim

Maus bilong bel inap helpim yumi long makim gut ol samting yumi mas mekim na i stret wantaim ol stiatok yumi laik bihainim. Long ol Kristen, dispela i makim olsem ol i mas skulim maus bilong bel long bihainim ol tingting bilong God. (Rom 2:​14, 15) Baibel i tok: “Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:⁠6) Tru, long sampela samting, tupela Kristen em Baibel i bin skulim bel bilong ol, ating bai ol i skelim na makim narapela narapela samting bilong mekim.

Tasol sapos Baibel i tambuim wanpela samting, tupela Kristen em Baibel i skulim pinis bel bilong ol, ol i no inap makim narapela narapela samting​—⁠ol i mas bihainim wanpela rot tasol. Olsem: Sapos ol stiatok bilong Baibel i no bin skulim bel bilong wanpela man na meri, ating maus bilong bel inap larim tupela i sindaun nating wantaim bilong traim marit na bai tupela i ken save, pasin bilong ol bai stret wantaim o nogat. Ol i ting dispela em gutpela tingting, nogut ol i marit hariap na ol i no inap sindaun gut wantaim. Ating bel bilong ol i no gat tok long dispela pasin. Tasol ol man i bihainim tingting bilong God long ol samting bilong marit, bai ol i no tingting long mekim dispela kain pasin, em pasin pamuk.​—⁠1 Korin 6:18; 7:​1, 2; Hibru 13:⁠4.

Samting Yu Makim Inap Nogutim Man

Planti taim, ol samting yu tingting pinis long mekim inap mekim sampela samting long ol narapela. Olsem na no ken mekim wanpela samting yu save pinis olsem i no gat gutpela tingting long en, o i kranki, nogut dispela i bagarapim pasin bilong yu long pas gut wantaim ol pren na wanblut, o God yet. Sindaun 10:1 i tok: “Sapos pikinini man i gat gutpela tingting na save, orait papamama bilong en i amamas. Tasol sapos pikinini i bihainim longlong pasin, orait papamama i bel hevi tru.”

Tasol yu mas save, sampela taim yu mas makim husat yu bai pren wantaim ol. Olsem: Ating yu tingting pinis long sakim sampela bilip bilong lotu bipo yu bin holim na nau yu save ol i no stret wantaim tok bilong Baibel. O yu tingting pinis long senisim sampela pasin bilong yu, long wanem, yu laik bihainim ol tok bilong God bilong stiaim yumi em nau yu bilip pinis long en. Ating sampela pren o wanblut i no amamas long samting yu tingting pinis long mekim, tasol sapos God i amamas long en, orait yu ken save olsem yu bin bihainim gutpela tingting.

Bikpela Samting Tru Yu Mas Tingim

Ol man i no save olsem olgeta man long nau i mas makim wanem samting ol i laikim​—⁠i stap laip o indai. Wankain samting i bin painim ol Israel bilong bipo taim ol i kem long arere bilong Graun Bilong Promis long yia 1473 B.C.E. Moses i stap olsem maus bilong God na em i tokim ol: “I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. . . . Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim. Olsem na bai yupela na ol lain pikinini bilong yupela inap i stap longpela taim long dispela kantri Bikpela i bin promis long givim long ol tumbuna bilong yupela, Abraham na Aisak na Jekop.”​—⁠Lo 30:​19, 20.

Ol tok profet bilong Baibel na taim na yia bilong ol samting i bin kamap i soim olsem nau yumi stap long taim bilong “planti hevi nogut tru,” na pasin bilong dispela graun i wok long senis. (2 Timoti 3:1; 1 Korin 7:31) Dispela senis Baibel i tok profet long en bai mekim na bagarap i painim ol pasin nogut bilong graun na pinisim olgeta, na God bai kamapim nupela taim i gat stretpela pasin tasol long en.

Nau yumi stap klostu tru long dispela nupela taim. Olsem wanem? Bai yu go insait long en na kisim laip oltaim long graun aninit long Kingdom bilong God? O God bai rausim yu long graun taim em i pinisim pasin nogut bilong dispela graun bilong Satan? (Song 37:​9-11; Sindaun 2:​21, 22) Em samting bilong yu yet long makim wanem rot nau yu bai bihainim, na rot yu makim em i bikpela samting​—⁠yu bai stap laip o yu bai i dai. Yu laik bai sampela i helpim yu long makim gut wanem rot yu bai bihainim?

Sapos yu laik i stap laip, pastaim yu mas kisim save long ol samting God i laik yu mas mekim. Klostu olgeta lotu i no bin tokaut stret long ol dispela samting. Na planti lida bilong ol i bin giamanim ol man na ol i bilipim ol tok giaman na mekim ol samting God i no laikim. Ol i no bin tokim ol man long ol i mas pasim tok long bel long lotuim God “long strong bilong Holi Spirit na long pasin i tru.” (Jon 4:24) Olsem na planti man i no mekim olsem. Tasol Jisas i tok: “Man i no pren bilong mi, em i save birua long mi. Na man i no helpim mi long bungim ol manmeri, em i save ranim ol i go nabaut.”​—⁠Matyu 12:⁠30.

Ol Witnes Bilong Jehova i amamas long helpim ol man long kisim gutpela save long Tok Bilong God. Long olgeta wik ol i save go na toktok wantaim ol wan wan man o wanpela lain long ol tok bilong Baibel long taim na ples i stret long ol dispela man. Ol man i laik kisim kain helpim olsem, ol i mas toksave long ol Witnes i stap long hap bilong ol o raitim pas long lain bilong wokim Wastaua.

Tru, ating sampela ol i gat hap save pinis long ol samting God i laik ol i mas mekim. Na ating ol i bilip pinis olsem ol tok bilong Baibel i tru na ol inap bilip tru long en. Tasol sampela i wok long surikim taim bilong makim samting ol i mas mekim, olsem dediket long God. Bilong wanem? Ating i gat sampela samting i mekim na ol i surikim taim.

Ating ol i no save em i bikpela samting long ol i mas mekim olsem, a? Jisas i tok klia: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.” (Matyu 7:21) Maski man i gat save long Baibel, dispela tasol i no inap. Em i mas kirap mekim sampela samting. Kongrigesen Kristen bilong pastaim i makim pasin yumi mas bihainim. Baibel i stori long sampela olsem: “Taim Filip i autim gutnius bilong kingdom bilong God na bilong nem bilong Jisas Krais, ol man na meri wantaim i bilip na ol i kisim baptais.” (Aposel 2:41; 8:12) Olsem na sapos man i kisim pinis Tok Bilong God na i amamas long en, na em i bilipim dispela tok, na senisim pinis pasin bilong em na bai i stret wantaim ol lo bilong God, orait wanem samting i pasim em long kisim baptais bilong makim olsem em i dediket pinis long God? (Aposel 8:​34-38) Bilong God i ken orait long man, em i mas mekim dispela samting long laik bilong em yet na bel i mas amamas long mekim.​—⁠2 Korin 9:⁠7.

Ating sampela i pilim olsem ol i no gat bikpela save inap long ol i ken dediket long God. Tasol olgeta man i kirap bihainim nupela rot ol i gat hap save tasol. Wanpela saveman bilong mekim wanpela wok em i no inap tok olsem em i gat dispela save taim em i bin kirap nupela long mekim dispela wok, a? Bilong tingting long mekim wok bilong God, man i mas i gat save long ol bikpela as tok na lo bilong Baibel na em i mas i gat laik tru long bihainim long i stap bilong em.

Ating sampela i surikim taim bilong dediket long God, long wanem, ol i pret olsem nogut ol i no inap bihainim? Planti samting ol man i tok promis long mekim, ol i save tingting planti long en, nogut ol i no inap truim tok bilong ol. Man i tingting pinis long marit na kamapim ol pikinini, ating em i tingting planti olsem nogut em i no inap mekim gut dispela wok, tasol taim em i mekim strongpela tok promis, dispela i save kirapim em long wok strong long mekim gut dispela wok. Na i wankain tu taim yangpela man i kisim nupela laisens bilong draivim ka, ating em bai pret liklik, nogut em i bamim narapela ka​—⁠em bai pret moa sapos em i save olsem ol yangpela draiva i save bamim ka planti taim, winim ol man i gat bikpela krismas. Tasol dispela save inap helpim em, olsem kirapim em long was gut taim em i draivim ka. Tasol sapos em i no kisim laisens, dispela i no inap helpim em long kamap gutpela draiva!

Makim Rot Bilong Kisim Laip!

Baibel i soim olsem, ol wok politik, ol samting bilong mani, na ol lotu bilong dispela graun wantaim ol lain i helpim ol dispela wok, olgeta bai pinis long graun. Tasol ol man i bihainim gutpela tingting na ol i bin makim rot bilong kisim laip na ol i mekim ol samting i stret long dispela, ol bai stap. Ol bai stap olsem as lain bilong nupela taim, na ol bai insait long wok bilong mekim graun i kamap ples paradais olsem God i gat laik long en long pastaim. Olsem wanem? Yu laik wok aninit long God na mekim dispela wok i gat amamas long en?

Sapos olsem, orait tingting long stadi long Baibel. Tingting long lain long ol samting God i laik yu mas mekim na bai em i ken amamas long yu. Tingting long bihainim gut ol dispela samting. Na bikpela samting tru, tingting long inapim tru samting yu laik mekim. Yumi ken sotim tok olsem: Makim rot bilong kisim laip!

[Ol Piksa long pes 4]

Lusim hap taim long skelim gut ol bikpela samting yu mas mekim

[Piksa long pes 5]

Taim yu laik makim wanpela wok yu bai mekim, putim yau long tok ol narapela i givim long yu

[Ol Piksa long pes 7]

Ol man i tingting long mekim wok bilong God long nau, ol bai insait long mekim graun i kamap ples paradais