“Olgeta Hap Bilong Graun i Harim Pinis Nek Bilong Ol”

“Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit.”​—⁠MATYU 28:⁠19.

1, 2. (a) Jisas i givim wanem wok long ol disaipel bilong em? (b) Olsem wanem ol Kristen bilong bipo ol inap mekim bikpela wok?

PASLAIN liklik long taim Jisas i go antap long heven, em i givim wok long ol disaipel bilong em. Em i tokim ol: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit.” (Matyu 28:19) Em i wanpela bikpela wok tru!

² Tingim! Long Pentikos 33 C.E., inap 120 disaipel i kisim holi spirit na ol i kirap mekim dispela wok taim ol i tokim ol man olsem Jisas em i dispela Mesaia God i tok promis long en, na long rot bilong em ol man inap kisim laip. (Aposel 2:​1-36) Olsem wanem wanpela liklik lain olsem inap toktok wantaim “olgeta lain manmeri”? Tru, ol man i no inap mekim, tasol “God em inap long mekim olgeta samting.” (Matyu 19:26) Holi spirit bilong Jehova i bin helpim ol Kristen bilong bipo, na oltaim ol i bin wok strong long autim tok. (Sekaraia 4:6; 2 Timoti 4:⁠2) Olsem na insait long sampela yia tasol, aposel Pol inap tok olsem ol i bin autim gutnius “long olgeta manmeri i stap long graun.”​—⁠Kolosi 1:⁠23.

3. Wanem samting i mekim na lotu tru, olsem “wit,” i no stap long ples klia?

³ Lotu i tru i wok long go bikpela long taim bilong ol aposel. Tasol Jisas i bin tok profet olsem bihain Satan bai tromoi “pikinini bilong gras nogut” long gaden, na lotu Kristen tru, olsem “wit,” bai no stap long ples klia inap planti handet yia i go inap long taim bilong kisim kaikai. Bihain long i dai bilong ol aposel, dispela tok profet i kamap tru.​—⁠Matyu 13:​24-39.

Lain i Go Bikpela Hariap Long Nau

4, 5. Kirap long 1919, ol Kristen God i bin makim i kirap mekim wanem wok? Bilong wanem dispela i wanpela bikpela wok tru?

⁴ Long 1919, em taim bilong lotu Kristen tru, olsem wit, long lusim ol gras nogut. Ol Kristen God i bin makim ol i save olsem ol i mas bihainim yet tok bilong Jisas long mekim wok. Ol i bilip strong olsem ol i stap long “taim bilong las de” na ol i save long tok profet bilong Jisas: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (2 Timoti 3:1; Matyu 24:14) Yes, ol i save olsem i gat bikpela wok bilong mekim.

⁵ Tasol olsem ol disaipel long 33 C.E., ol Kristen God i bin makim i gat traipela wok bilong mekim. Ol i stap long sampela kantri tasol na namba bilong ol i sampela tausen tasol. Olsem wanem ol inap autim gutnius “long olgeta hap bilong graun”? Tingim, namba bilong ol manmeri long graun i go bikpela. Ating long taim bilong ol Sisar i gat 300 milion manmeri, na bihain long Wol Woa 1 i gat klostu 2 bilion manmeri. Na long ol yia i kamap bihain, namba bilong ol man i wok long i go bikpela hariap.

6. I kam inap long 1935 samting, wok i go bikpela olsem wanem?

⁶ Tasol olsem ol brata bilong ol long taim bilong ol aposel, ol wokman Jehova i bin makim, ol i bilip tru long Jehova na ol i kirap mekim dispela wok, na spirit bilong em i bin stap wantaim ol. Long 1935 samting, inap 56,000 man bilong autim tok i bin autim tok i tru bilong Baibel long 115 kantri. Ol i mekim pinis bikpela wok, tasol planti wok i stap yet.

7. (a) Ol Kristen God i bin makim ol i kisim wanem wok moa? (b) Long rot bilong helpim ol “arapela sipsip” i givim, wok bilong bungim ol man i go bikpela olsem wanem?

⁷ Bihain, ol i kisim bikpela save moa long lain “planti manmeri tru” ol i husat, em Kamapim Tok Hait 7:9 i tok long en, na dispela i kamapim sampela wok moa long ol na i soim olsem ol dispela Kristen i wok strong ol bai kisim helpim. Ol i mas bungim bikpela lain “arapela sipsip” long “olgeta lain man na bilong olgeta kantri na bilong olgeta kain skin na bilong olgeta tok ples,” em ol i wet long kisim laip long graun. (Jon 10:16) Ol bai ‘mekim wok bilong God long san na long nait.’ (KTH 7:15) Dispela i makim olsem ol bai helpim wok bilong autim tok na skulim ol man. (Aisaia 61:⁠5) Olsem na ol Kristen God i bin makim ol i amamas tru long lukim namba bilong ol man i autim tok i go bikpela inap planti tausen na bihain planti milion. Long yia 2003, inap 6,429,351 i insait long wok autim tok​—⁠klostu olgeta bilong ol i bilong bikpela lain.a Ol Kristen God i bin makim ol i amamas long dispela helpim ol i kisim, na ol arapela sipsip i amamas long ol inap mekim dispela gutpela wok bilong helpim ol brata bilong ol em God i bin makim.​—⁠Matyu 25:​34-40.

8. Ol Witnes Bilong Jehova i mekim wanem taim bikpela hevi tru i painim ol long taim bilong Wol Woa 2?

⁸ Taim lain wit i kamap ples klia gen, Satan i birua tru long ol. (KTH 12:17) Em i mekim wanem taim bikpela lain i wok long kamap? Em i pait strong tru! Yumi inap save tru olsem em i bin kirapim ol man long olgeta hap long birua long lotu i tru long taim bilong Wol Woa 2. Long olgeta hap ol Kristen i stap long en, ol i karim bikpela hevi tru. Ol bikpela hevi i painim planti gutpela brata na sista, na sampela i dai bilong holimpas bilip. Tasol ol i soim olsem ol i gat wankain tingting olsem man bilong raitim song: “Mi save bilip long God na mi tingting long tok tru bilong em. Olsem na mi save litimapim nem bilong en. Mi save bilip long God, na mi no ken pret long wanpela samting. Bai ol man inap mekim wanem samting long mi?” (Song 56:4; Matyu 10:28) Spirit bilong Jehova i strongim ol Kristen God i bin makim na ol arapela sipsip, na ol i sanap strong wantaim. (2 Korin 4:⁠7) Dispela i mekim na “tok bilong God i go nabaut long olgeta hap.” (Aposel 6:⁠7) Long 1939, taim woa i kirap, inap 72,475 Kristen i putim ripot long wok autim tok ol i bin mekim. Tasol ol ripot ol i kisim long 1945, em long dispela yia woa i pinis, i kamapim olsem inap 156,299 Witnes i autim gutnius. Satan i lus tru!

9. Ol i toksave long wanem tupela nupela skul long taim bilong Wol Woa 2?

⁹ Tru tumas, ol bikpela hevi bilong Wol Woa 2 i no mekim na ol wokman bilong Jehova i gat tupela tingting olsem ol bai inapim wok bilong autim tok o nogat. Long 1943, taim woa i go bikpela tru, ol i toksave long tupela nupela skul. Wanpela em Skul Tiokratik Bilong Autim Tok, ol bai mekim dispela skul long olgeta kongrigesen bilong skulim ol wan wan Witnes long autim tok na kamapim ol disaipel. Narapela skul, em Wastaua Baibel Skul Bilong Gileat, em bilong skulim ol misineri husat bai strongim wok autim tok long ol narapela kantri. Yes, taim woa i pinis, ol Kristen tru i redi long mekim bikpela wok moa.

10. Wanem samting i soim olsem lain bilong Jehova i bin givim bel tru long 2003?

¹⁰ Na ol i bin mekim gutpela wok tru! Olgeta​—⁠ol yangpela na lapun, papamama na ol pikinini, na ol sikman tu​—⁠i bin kisim skul long Skul Tiokratik Bilong Autim Tok na ol i bin insait long wok Jisas i tokim ol long mekim na ol i wok yet long mekim. (Song 148:​12, 13; Joel 2:​28, 29) Long yia 2003, inap 825,185 long olgeta mun i kamapim olsem ol i ting taim i sot pinis na ol i mekim wok painia long sampela mun o long olgeta taim. Long dispela yia yet, ol Witnes Bilong Jehova i bin lusim 1,234,796,477 aua long toktok wantaim ol narapela long gutnius bilong Kingdom. Jehova i amamas tru long pasin bilong lain bilong em long givim bel!

Long Ol Narapela Kantri

11, 12. Wanem samting i soim olsem ol misineri i bin mekim gutpela wok?

¹¹ Inap planti yia, ol lain i winim Skul Gileat, na ol lain i winim Ministerial Trening Skul, ol i bin mekim bikpela wok. Olsem: Long Brasil, namba bilong ol pablisa i no winim 400 taim ol namba wan misineri i kamap long hap long 1945. Ol dispela misineri na ol misineri i kamap bihain ol i bin wok strong wantaim ol gutpela brata bilong ol long Brasil, na Jehova i bin blesim tru hatwok bilong ol. Ol lain i tingim dispela taim bipo, ol i amamas tru long lukim olsem 607,362 i putim ripot long Brasil long 2003, dispela i winim olgeta taim bipo!

¹² Tingim Japan. Paslain long Wol Woa 2, i gat klostu 100 man bilong autim tok bilong Kingdom long dispela kantri. Long taim bilong woa, bikpela pasin birua i daunim namba bilong ol pablisa, na taim woa i pinis, i gat sampela Witnes tasol i stap laip yet na ol i strong long ol samting bilong spirit. (Sindaun 14:32) Long 1949, ol dispela man i bin stap gut long God ol i amamas tru long tok welkam long 13 misineri i bin skul long Gileat, na i no longtaim na ol misineri i kirap laikim tru ol brata bilong Japan i save givim bel na mekim gut long narapela. Winim 50 yia bihain, long yia 2003, Japan i gat 217,508 pablisa! Jehova i bin blesim tru lain bilong em long dispela kantri. Wankain samting i bin kamap long planti narapela kantri tu. Ol lain husat inap autim tok long ol narapela kantri ol i bin mekim bikpela wok bilong helpim wok bilong autim gutnius i go bikpela, olsem na long 2003 ol i bin autim tok long 235 kantri na ailan long olgeta hap. Em nau, dispela bikpela lain i wok long kamap long “olgeta kantri.”

‘Bilong Olgeta Lain Man na Skin na Tok Ples’

13, 14. Olsem wanem Jehova i soim olsem em i bikpela samting long autim gutnius long “olgeta tok ples”?

¹³ Baibel i tok taim ol disaipel i kisim holi spirit long Pentikos 33 C.E., namba wan mirakel i kamap em ol disaipel i mekim tok ples bilong ol man i kam long dispela bung. Olgeta man i harim ol, ating ol i save toktok long wanpela bikpela tok ples, ating tok Grik. Ol i “man bilong lotu long God,” olsem na ating ol inap harim tu tok Hibru ol i mekim long tempel long taim bilong lotu. Tasol ol i gat laik tru long putim yau taim ol i harim gutnius long tok ples ol i bin lainim taim ol i liklik yet.​—⁠Aposel 2:​5, 7-12.

¹⁴ Long nau tu, ol pablisa i save yusim planti tok ples long wok autim tok. Baibel i tok profet olsem bikpela lain bai kamap long olgeta kantri, na tu, long ‘olgeta lain man na skin na tok ples.’ Jehova i tok profet long rot bilong Sekaraia: “Long dispela taim 10-pela man bilong ol longwe ples [“bilong olgeta tok ples,” NW ] bai i kam holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’ ” (Sekaraia 8:23) Tru, ol Witnes Bilong Jehova i no kisim presen bilong mekim kain kain tok ples, tasol ol i save em i bikpela samting long skulim ol man long tok ples bilong ol yet.

15, 16. Ol misineri na ol narapela i bin mekim wanem bilong ol i ken autim tok long tok ples bilong ol man?

¹⁵ Tru, long nau i gat sampela tok ples ol i save yusim long planti kantri, olsem tok Inglis, tok Frans, na tok Spen. Tasol ol lain i bin lusim ples bilong ol na go autim tok long ol narapela kantri, ol i traim long lainim tok ples bilong dispela kantri na bai ol man i gat gutpela bel ol i amamas moa long harim gutnius. (Aposel 13:48) Sampela taim dispela i hatwok. Taim ol brata bilong kantri Tuvalu long Saut Pasifik i laik kisim ol buk na nius long tok ples bilong ol yet, wanpela misineri i redi long mekim dispela wok. I no gat dikseneri long dispela tok ples, olsem na em i kirap wokim lista bilong ol tok bilong tok ples Tuvalu. Bihain, ol i wokim buk Yu Inap i Stap Oltaim Long Paradais Long Graunb long tok ples Tuvalu. Taim ol misineri i kamap long Kuraso, i no gat ol buk na nius bilong Baibel o dikseneri long tok ples bilong ol, em tok Papiamento. Na tu, planti man i no wanbel long pasin bilong raitim dispela tok ples. Tasol insait long tupela yia bihain long ol namba wan misineri i kamap, ol i wokim namba wan liklik nius long dispela tok ples. Long nau, tok Papiamento em i wanpela bilong ol 133 tok ples ol i save wokim Wastaua long en long wankain taim olsem bilong tok Inglis.

¹⁶ Ol namba wan misineri i go long Namibia, ol i no inap painim wanpela Witnes bilong Namibia husat inap helpim ol long tanim tok. Na tu, wanpela tok ples bilong dispela hap, em tok Nama, i no gat sampela tok em nius bilong yumi i save kolim planti taim, kain olsem “gutpela olgeta.” Wanpela misineri i tok: “Bilong tanim tok mi mekim wok long ol skul tisa husat i stadi long Baibel. Ol i gat liklik save tasol long tok i tru, olsem na mi mas sindaun wantaim ol na sekim olgeta sentens, nogut sampela popaia i go insait long tok.” Maski i hatwok, ol i tanim liklik nius Life in a New World long fopela tok ples bilong Namibia. Long nau, ol i save wokim Wastaua long tok Kwanyama na Ndonga.

17, 18. Ol i mekim wanem ol bikpela wok long Meksiko na ol narapela kantri?

¹⁷ Bikpela tok ples bilong Meksiko em tok Spen. Tasol paslain long ol man bilong Spen i kamap long dispela hap, ol man i toktok long kain kain tok ples, na ol i save toktok yet long sampela bilong ol. Olsem na long nau ol Witnes Bilong Jehova i save wokim ol buk na nius long 7-pela tok ples bilong Meksiko na long tok ples bilong ol yaupas bilong Meksiko tu. Wok Kingdom ol i wokim long tok Maya em i namba wan nius ol i wokim long olgeta mun long wanpela tok ples bilong ol Indian bilong Amerika. Tru tumas, i gat planti tausen Maya, Astek, na ol narapela insait long ol 572,530 pablisa long Meksiko.

¹⁸ Long nau, planti milion i bin kamap refiuji na ranawe i go long ol narapela kantri, o ol i bin go sindaun long narapela kantri bilong mekim wok mani. Dispela i mekim na long planti kantri long nau i gat bikpela lain man bilong narapela narapela tok ples. Ol Witnes Bilong Jehova i redi long autim tok long ol. Olsem: Long Itali, i gat ol kongrigesen na grup long 22 narapela narapela tok ples. Bilong helpim ol brata long autim tok long ol man bilong narapela tok ples, ol i bin wokim ol kos bilong skulim ol brata long 16 tok ples, na long tok ples bilong ol yaupas bilong Itali tu. Long planti narapela kantri, ol Witnes Bilong Jehova i mekim wankain bikpela wok bilong autim tok long ol bikpela lain man i kam sindaun long kantri bilong ol. Yes, long rot bilong helpim Jehova i givim, dispela bikpela lain i wok long kamap long planti planti tok ples.

“Long Olgeta Hap Bilong Graun”

19, 20. Wanem tok bilong Pol i wok long kamap tru long nau? Stori long dispela.

¹⁹ Long taim bilong ol aposel, aposel Pol i tok: “Ating ol i no harim dispela gutnius? Nogat. Ol i harim pinis. Yumi save, ‘Ol manmeri long olgeta hap bilong graun i harim pinis nek bilong ol. Na tok bilong ol i go inap long olgeta ples.’ ” (Rom 10:18) Sapos dispela tok i stret long taim bilong ol aposel, em i stret moa yet long taim bilong yumi! Planti milion man​—⁠ating winim olgeta taim bipo​—⁠ol i tok: “Bai mi tenkyu long God. Oltaim bai mi litimapim nem bilong en.”​—⁠Song 34:⁠1.

²⁰ Na tu, wok i go bikpela yet. Namba bilong ol pablisa i wok long i go bikpela. Ol i lusim bikpela haptaim moa bilong autim tok. Ol i mekim planti milion gobek na planti tausen Baibel-stadi. Na planti man moa i laik kisim save. Long las yia, inap 16,097,622 i kam long Memorial bilong tingim i dai bilong Jisas. Tru tumas, bikpela wok i stap yet. Yumi laik wok yet long bihainim pasin bilong ol brata bilong yumi em ol i bin stap gut long God taim ol birua i mekim nogut tru long ol. Na yumi mas givim bel na bihainim pasin bilong ol brata husat i bin givim ol yet bilong mekim wok bilong Jehova kirap long 1919. Yumi olgeta i laik mekim wankain tok olsem man bilong raitim song: “Yupela olgeta samting i gat laip, litimapim nem bilong Bikpela! Litimapim nem bilong Bikpela!”​—⁠Song 150:⁠6.

[Ol Futnot]

Yu Inap Stori Long Dispela?

• Ol brata i kirap mekim wanem wok long 1919? Bilong wanem dispela em i wanpela bikpela wok tru long mekim?

• Ol i bin bungim husat bilong helpim wok bilong autim tok?

• Ol misineri na ol narapela i wok long ol narapela kantri i bin mekim wanem ol gutpela wok?

• Yu inap kolim wanem ol samting i soim olsem Jehova i blesim wok em lain bilong em i mekim long nau?

[Sat long pes 18-21]

RIPOT BILONG WOK BILONG OL WITNES BILONG JEHOVA LONG 2003

(Lukim buk o magasin)

[Ol Piksa long pes 14, 15]

Hevi bilong Wol Woa 2 i no mekim na ol Kristen i gat tupela tingting olsem ol bai inapim wok bilong autim tok o nogat

[Kredit Lain]

Explosion: U.S. Navy photo; others: U.S. Coast Guard photo

[Ol Piksa long pes 16, 17]

Dispela bikpela lain bai kam long olgeta lain man na skin na tok ples