Bungim Ol Manmeri Bilong Olgeta Tok Ples
1 Tok Bilong God i wok long kamap tru! Ol manmeri bilong “olgeta tok ples” ol i bihainim lotu i tru. (KTH 14:6) Olsem wanem ol Witnes Bilong Jehova i helpim ol man bilong olgeta ‘kantri, skin, na tok ples’ long stap klin long ai bilong Jehova, na long abrusim bagarap long taim bilong “bikpela hevi”?—KTH 7:9, 14.
2 Oganaisesen Bilong God i Mekim Wok: Gavening Bodi i bin stretim rot na bai i gat ol buk na nius bilong Baibel long 380 samting tok ples bambai ol manmeri long olgeta hap ol inap save gut olsem gutnius em i bikpela samting. Wok bilong redim na prinim ol buk na nius long planti tok ples em i wanpela bikpela wok tru. Long Papua Niugini na long ol narapela hap tu, ol i mas bungim ol brata sista em ol inap long tanim tok na helpim ol bambai ol i ken tanim ol tok bilong ol nius bilong yumi i go long ol dispela tok ples. Taim ol i mekim pinis wok bilong tanim tok bilong ol buk na nius, ol i mas prinim na salim i go long ol kongrigesen. Tasol ol wan wan pablisa i save mekim bikpela wok moa long bringim gutpela tok bilong Baibel i go long ol man, em tok bilong helpim ol man long abrusim bagarap.
3 Mekim Wok: Long nau i gat 52 kongrigesen na 35 grup long Papua Niugini, na ol i autim tok long tripela bikpela tok ples—tok Inglis, Hiri Motu na Tok Pisin. Yumi gat planti brata sista em ol i save gut long olgeta tripela tok ples wantaim, o ol inap harim na mekim sampela tok. Olsem wanem? Yu inap i go long kongrigesen i mekim narapela tok ples na i sot tru long ol painia, elda, o kongrigesen sevent? Sapos olsem, orait toktok wantaim wasman sekit bilong yu long dispela samting.
4 Olsem wanem? Yumi inap mekim bikpela wok moa bilong autim tok long ol manmeri long teritori bilong yumi em ol i save mekim wanpela tok ples tasol olsem tok Inglis, o Hiri Motu, o Tok Pisin? (Kl. 1:25) Sapos yumi save mekim wanpela tok ples tasol, orait olsem wanem? Yumi inap lainim sampela tok moa bilong ol narapela tok ples na bai yumi inap mekim sotpela tok tasol bilong autim tok, olsem: “Gude. Em hia gutpela tok yu ken skelim. [Orait nau tilim wanpela liklik nius o buklet long dispela tok ples.] Gutbai.” Jehova inap blesim tru ol liklik wok olsem!
5 Ol manmeri bilong olgeta kain skin na tok ples i laikim tok bilong Kingdom. Taim rot i op, yumi mas autim dispela tok long ol. I gat planti manmeri long dispela kantri husat i no bin kisim save long Jehova o ol tok bilong Baibel, tasol ol inap kisim yet tok i tru bilong Baibel.—Ro. 15:21.