Mekim Gut Bel Bilong Man i Gat Hevi
LONG bipo, taim ol bilipman na bilipmeri i gat hevi, ol i beten strong na askim God long stiaim ol. Tasol ol i kirap tu long mekim sampela samting bilong daunim hevi, olsem bihainim savepasin bilong abrusim ol birua. Olsem: Devit i bilip na wetim Jehova, na tu, em yet i bin mekim sampela samting, dispela tupela samting i helpim em long karim ol hevi. Olsem wanem long yumi long nau?
Taim hevi i painim yu, ating yu laik mekim sampela samting bilong stretim dispela hevi. Olsem: Sapos yu no gat wok mani, ating yu wok strong long painim wanpela wok i stret long lukautim yu na famili bilong yu? (1 Timoti 5:8) O sapos yu gat wanpela sik, ating bai yu wok long painim gutpela dokta inap long helpim yu, a? Yumi kirap nogut olsem, Jisas, em man i kisim strong long God bilong oraitim olgeta kain sik, em i tok olsem ‘ol sikman i [mas] go long dokta.’ (Matyu 9:12) Tasol i no long olgeta taim ol hevi bilong yu bai pinis; ating sampela taim yu mas karim hevi i go inap longpela taim liklik.
Beten long God Jehova na kamapim hevi bilong yu long em. Olsem: Taim yu wok long painim wok mani, beten askim Jehova long stiaim yu long sakim ol traim bilong kisim wok mani i no stret wantaim ol stiatok bilong Baibel. Na tu, bai yumi abrusim pasin bilong laikim tumas mani em inap ‘pulim yumi na yumi lusim bilip.’ (1 Timoti 6:10) Tru tumas, taim yumi tingting long wanpela bikpela samting yumi laik mekim, olsem wok mani o famili o helt bilong yumi, yumi ken bihainim tok bilong Devit: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”—Song 55:22.
Pasin bilong beten na pilim long bel bai helpim yumi tu long tingting stret na ol hevi i no ken daunim yumi. Aposel Pol, em wanpela Kristen tru, em i tok: “Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.” Long wanem rot beten i ken mekim gut bel bilong yumi? “Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Bel isi God i givim em i “gutpela samting tru, na yumi man i no inap tru long save long as bilong en.” Olsem na em inap strongim yumi long taim bel na tingting bilong yumi i hevi tru. Em bai mekim na ‘bel na tingting bilong yumi bai i stap gut tru,’ na bai yumi no kirap nating na mekim sampela longlong pasin em inap kamapim sampela hevi moa long yumi.
Na tu, beten inap senisim sampela samting long wanpela hevi yumi karim. Taim aposel Pol i kamap kalabusman long Rom, long pasin daun em askim ol wanbilip Kristen long beten bilong helpim em. Bilong wanem Pol i askim ol long mekim olsem? Em i tok: “Mi laikim tumas bai yupela i prea long God i helpim mi, na bai mi ken i kam bek long yupela kwiktaim.” (Hibru 13:19) Yumi ken tok, Pol i save sapos ol wanbilip bilong em i wok long beten strong na Jehova i harim, dispela inap senisim taim bilong em long lusim kalabus.—Filemon 22.
Olsem wanem? Beten inap mekim na senis i kamap long ol hevi bilong yu? Ating senis inap kamap. Tasol yumi mas save olsem i no olgeta taim God Jehova bai mekim ol samting olsem yumi beten askim em long en. Inap sampela taim Pol i bin beten long Jehova i tekewe ‘wanpela samting olsem nil i sutim skin bilong em,’ ating em wanpela sik bilong skin. God i no pinisim dispela hevi, tasol em i tokim Pol: “Marimari bilong mi em inap long yu. Long wanem, strong bilong mi em i save kamap strong tru long man i no gat strong.”—2 Korin 12:7-9.
Olsem na ating hevi bilong yumi i no inap pinis wantu. Tasol bai yumi gat rot bilong kamapim klia olsem yumi bilip na wet long Papa bilong yumi long heven. (Jems 1:2-4) Yumi ken save olsem maski God Jehova i no pinisim hevi bilong yumi, em bai ‘wokim rot bilong helpim yumi, olsem em bai i mekim yumi i sanap strong, na dispela traim bai i no inap daunim yumi.’ (1 Korin 10:13) I stret Baibel i kolim Jehova olsem “God bilong mekim isi bel bilong olgeta man i gat hevi.” (2 Korin 1:3, 4) God inap givim yumi ol samting yumi mas kisim bilong sanap strong, na yumi inap bilip na wet long kisim laip i stap oltaim.
Tok Bilong God, em Baibel, i tok promis long Jehova bai “mekim drai wara i stap long ai . . . bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” (KTH 21:3, 4) Olsem wanem? Wanpela taim i no gat hevi em i gutpela samting tumas na i no inap kamap? Ating bai hatwok long bilipim dispela tok sapos long olgeta taim sindaun bilong yu i gat hevi. Tasol God i bin tok promis long yumi bai stap fri long pasin bilong pret na ol hevi, na ol samting em i tingting pinis long mekim em bai kamap tru.—Aisaia 55:10, 11.
[Ol Piksa long pes 9]
Pastaim em i bel hevi, bihain amamas