Bihainim Stretpela Pasin Long Rot Bilong Was Gut Long Bel
“Gutpela tingting bilong stiaim laip bilong yu, em i save kamap long tingting [“bel,” NW] bilong yu . . . Olsem na olgeta taim yu mas was gut tru long tingting [“bel,” NW] bilong yu.”—SINDAUN 4:23.
1-3. (a) Planti taim ol man i mekim wanem na dispela i soim olsem ol i no ting stretpela pasin em i bikpela samting? Mekim tok piksa long dispela. (b) Bilong wanem em i bikpela samting long skelim pasin bilong bihainim stretpela pasin?
ATING piksa i no bilong nau. O i no stret wantaim ol narapela samting i bilasim haus. Tasol maski wanem samting i mekim, man i holim dispela piksa em i no laikim tumas, olsem na em i salim dispela piksa long 29 dola. Sampela yia bihain, man i bin baim dispela piksa i kisim save olsem piksa hia i gat bikpela pe tru, klostu wan milion dola! Em nau, dispela piksa em bilong bipo yet na man i gat nem i bin penim. Man! Pilim tingting bilong man i bin holim dispela piksa pastaim na em i salim long liklik mani tasol!
2 Wankain samting i save kamap planti taim long pasin bilong bihainim stretpela pasin. Planti man long nau i no ting pasin bilong ol long bihainim stretpela pasin em i bikpela samting. Sampela i ting stretpela pasin i no wanpela pasin bilong nau, na i no stret wantaim i stap bilong ol man bilong nau. Olsem na ol i lusim stretpela pasin bilong ol na ol i no kisim gutpela samting taim ol i mekim olsem. Ol i mekim pasin pamuk bilong inapim laik bilong skin inap sotpela taim. Sampela i pamuk, long wanem, ol i ting dispela bai mekim na ol i gat nem long ai bilong ol wankrismas o wanpela man o meri.—Sindaun 13:20.
3 Tasol bihain planti ol i kisim save olsem stretpela pasin bilong ol em i bikpela samting tru. Planti taim ol i karim bikpela hevi. Olsem Baibel i tok, bihain bai ol i pilim olsem pasin pamuk ol i bin mekim em i “olsem marasin i gat pait.” (Sindaun 5:3, 4) Long nau ol man i no save bihainim stretpela pasin, olsem na yumi ken tingim na wok long bihainim stretpela pasin olsem wanem? Bai yumi stori long 3-pela samting yumi inap mekim.
Was Gut Long Bel Bilong Yu
4. Bel i makim wanem samting? Bilong wanem yumi mas was gut long en?
4 Nambawan samting bilong helpim yu long bihainim stretpela pasin em yu mas was gut long bel. Baibel i tok: “Gutpela tingting bilong stiaim laip bilong yu, em i save kamap long tingting [“bel,” NW ] bilong yu . . . Olsem na olgeta taim yu mas was gut tru long tingting [“bel,” NW ] bilong yu.” (Sindaun 4:23) Long hia “bel bilong yu” i makim wanem samting? Em i no makim bel tru tru. Bel i makim tingting, pasin, laik, na tingting i save kirapim yu long mekim ol samting. Baibel i tok: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela.” (Lo 6:5) Jisas i kolim dispela tok olsem namba wan lo. (Mak 12:29, 30) Olsem na bel bilong yumi em i bikpela samting tru. Yumi mas lukautim gut o was gut long en.
5. Olsem wanem bel bilong man inap helpim em na givim hevi long em?
5 Tasol Baibel i tok tu olsem, “bel bilong olgeta man i save tingting oltaim long mekim pasin giaman.” (Jeremaia 17:9) Olsem wanem bel i save mekim pasin giaman, na bagarapim yumi? Yumi ken tok piksa long ka, em i wanpela gutpela tul, na taim hevi i kamap em inap helpim man long i stap laip. Tasol sapos draiva i no stiaim gut ka, dispela ka inap kamap samting bilong kilim i dai man. Wankain long bel bilong yumi, sapos yumi no was gut long en, em inap pulim nabaut yumi long mekim ol samting i givim bikpela hevi long yumi. Tok Bilong God i tok: “Sapos man i ting, save bilong em yet inap helpim em long mekim olgeta samting, orait em i no gat gutpela tingting. Tasol sapos man i bihainim pasin bilong gutpela tingting, em bai i stap gut.” (Sindaun 28:26) Tru tumas, yu inap bihainim gutpela tingting na save na abrusim bikpela hevi sapos yu yusim Tok Bilong God long stiaim yu, kain olsem man i sekim mep bilong rot paslain long em i go long wanpela hap.—Song 119:105.
6, 7. (a) Pasin holi em i wanem samting? Bilong wanem em i bikpela samting long ol wokboi bilong Jehova? (b) Olsem wanem yumi save ol sinman inap bihainim pasin holi bilong Jehova?
6 Long laik bilong em yet bel bilong yumi i no save bihainim stretpela pasin. Yumi mas stiaim em long mekim olsem. Wanpela rot long mekim olsem em long skelim gut olsem wanem stretpela pasin i ken helpim yumi. Stretpela pasin i save poroman wantaim pasin holi. Pasin holi i makim samting i klin tru na i no pas wantaim ol samting bilong sin. Pasin holi em i wanpela gutpela pasin tru na em i wanpela bikpela pasin bilong God Jehova. Planti handet ves bilong Baibel i kolim dispela pasin taim ol i stori long Jehova. Baibel i tok: “Pasin holi i bilong Jehova.” (Kisim Bek 28:36, NW ) Tasol dispela pasin holi i mekim wanem long yumi ol sinman?
7 Long Baibel, Jehova i tok: “Yupela i mas i stap holi . . . , long wanem, mi God bilong yupela, mi stap holi.” (1 Pita 1:16) Yes, yumi inap bihainim pasin holi bilong Jehova; yumi ken stap klin long ai bilong em, na bihainim stretpela pasin. Olsem na taim yumi no mekim ol samting i doti, i olsem yumi laik kisim wanpela gutpela wok—em wok bilong bihainim wanpela naispela pasin bilong God Antap Tru! (Efesus 5:1) Yumi no ken ting yumi no inap mekim olsem, long wanem, Jehova em i wanpela Bos i gat save na em i no askim yumi long mekim samting yumi no inap mekim. (Song 103:13, 14; Jems 3:17) Tru, bilong i stap klin long samting bilong spirit na bihainim stretpela pasin yumi mas taitim bun. Tasol aposel Pol i tok: “Nogut tingting bilong yupela i paul, na yupela i lusim pasin bilong i stap klin na tingting long Krais tasol.” (2 Korin 11:3) Yumi gat wok long stap gut long Krais na Papa bilong em, olsem na yumi mas wok strong long bihainim stretpela pasin. Ol i bin kamapim bikpela pasin laikim long yumi em yumi no inap bekim long ol. (Jon 3:16; 15:13) I stret yumi ken soim olsem yumi tenkyu tru long tupela long rot bilong bihainim klinpela na stretpela pasin long laip bilong yumi. Taim yumi gat dispela kain tingting long stretpela pasin bilong yumi, bai yumi pilim olsem em i bikpela samting na bai yumi was gut long bel bilong yumi.
8. (a) Olsem wanem yumi ken lukautim bel bilong yumi? (b) Toktok yumi save mekim inap kamapim wanem samting?
8 Na tu, yumi save lukautim bel bilong yumi long rot bilong kaikai yumi save kisim. Oltaim yumi mas givim gutpela kaikai bilong spirit long tingting na bel bilong yumi, na tingting long gutnius bilong Kingdom Bilong God. (Kolosi 3:2) Toktok bilong yumi tu i mas kamapim olsem yumi tingim Kingdom. Sapos yumi gat nem olsem man bilong toktok long pasin doti na pasin sem, dispela i kamapim klia samting i stap long bel bilong yumi. (Luk 6:45) Yumi laik bai yumi gat nem olsem man i save toktok long ol samting bilong spirit na ol samting i save strongim ol man. (Efesus 5:3) Bilong was gut long bel bilong yumi, i gat sampela bikpela samting yumi mas abrusim. Yumi laik stori long tupela.
Stap Longwe Long Pasin Pamuk
9-11. (a) I gat wanem as na ol man husat i sakim tok kaunsel bilong 1 Korin 6:18 inap insait long pasin pamuk? Mekim tok piksa long dispela. (b) Bilong i stap longwe long pasin pamuk, yumi mas abrusim wanem samting? (c) Stretpela man Jop i mekim wanem na dispela i stap olsem gutpela piksa long yumi ken bihainim?
9 Jehova i bin kirapim aposel Pol long raitim sampela tok kaunsel i bin helpim planti long was gut long bel bilong ol na bihainim stretpela pasin. Pol i tok: “Stap longwe long pasin pamuk.” (1 Korin 6:18) Pol i tokim ol Kristen long stap longwe long pasin pamuk, wankain olsem ol bai ranawe i go longwe long ol samting em inap kilim ol i dai. Sapos yumi sakim dispela tok, orait yumi inap insait long pasin pamuk samting na God i no ken orait moa long yumi.
10 Olsem: Wanpela mama i wasim liklik pikinini man bilong em na putim klos long em bilong redi long i go long wanpela bikpela bung. Em i askim mama long em i ken pilai ausait paslain long famili i lusim haus, na mama i tok orait—sapos pikinini i bihainim wanpela tok. Mama i tok: “No ken go pilai klostu long dispela liklik raunwara long graun. Sapos klos bilong yu i doti, bai yu kisim stik.” Tasol insait long sampela minit tasol, mama i lukim dispela mangi i sanap i stap arere stret long dispela raunwara. Klos i no doti yet. Tasol mangi i wok long sakim dispela tok bilong mama olsem no ken go klostu long wara, na yumi save hevi bai painim em. (Sindaun 22:15) Planti yangpela na ol bikpela manmeri husat i gat save, ol i mekim wankain popaia. Ol i mekim olsem wanem?
11 Long nau planti manmeri i insait “long ol dotipela pasin nogut,” na dispela i mekim na nupela kain bisnis i kamap i maketim ol samting bilong pasin pamuk na pasin sem. (Rom 1:26, 27) Ol piksa na toktok bilong pasin sem, ol i kolim ponografi, i pulap long ol nius, buk, vidio, na Intenet. Ol man i save lukim ol dispela kain samting ol i no stap longwe long pasin pamuk. I olsem ol i pilai long dispela pasin, ol i sanap long arere stret na klostu ol i mekim, na ol i sakim tok lukaut bilong Baibel. Ol i no was gut long bel, nogat. Ol samting ol i lukim bai pas longtaim tru long tingting bilong ol, i olsem ol i kaikai marasin nogut. (Sindaun 6:27) Yumi laik larim pasin bilong stretpela man Jop i skulim yumi. Em i bin mekim strongpela tok promis olsem em i no ken lukluk long ol samting em inap pulim em long mekim rong. (Jop 31:1) Jop i stap olsem gutpela piksa tru bilong bihainim!
12. Olsem wanem ol Kristen i laik marit i ken “stap longwe long pasin pamuk” taim ol i poroman wantaim?
12 Taim yu poromanim man o meri husat yu tingting long maritim, yu mas “stap longwe long pasin pamuk.” Long taim tupela i poroman wantaim, em i taim bilong amamas na wetim ol gutpela samting bai kamap bihain, tasol sampela yangpela i mekim nabaut long stretpela pasin na ol i bagarapim dispela taim. Taim ol i mekim olsem ol i bagarapim gutpela as bilong marit—em pasin bilong laikim tru narapela na i no tingim em yet tasol, bosim gut skin, na bihainim tok bilong God Jehova. Tupela Kristen i bin pamuk taim ol i poroman wantaim paslain long ol i marit. Taim ol i marit pinis, meri i tok bel bilong em i bin kotim em strong, na dispela i bagarapim amamas bilong em long de em i marit. Em i tokaut olsem: “Mi bin askim Jehova long lusim rong bilong mi planti taim, tasol maski 7-pela yia i lus pinis, bel bilong mi i wok yet long kotim mi.” Em i bikpela samting long ol manmeri husat i bin mekim kain rong olsem ol i mas kisim helpim long ol elda Kristen. (Jems 5:14, 15) Tasol planti Kristen husat i laik marit ol i bihainim gutpela tingting na save na abrusim ol kain hevi olsem. (Sindaun 22:3) Ol i was gut taim ol i mekim ol samting bilong soim olsem narapela i laikim tru narapela. Taim ol i raun wantaim ol i kisim narapela i go wantaim ol, na ol i no save stap ol yet long hap i no gat narapela man.
13. Bilong wanem ol Kristen i laik marit i no ken poromanim ol man i no lotuim Jehova?
13 Yumi ken ting olsem kain kain bikpela hevi bai painim ol Kristen i laik marit na ol i poromanim ol man i no lotuim Jehova. Olsem wanem yu inap wok bung wantaim man husat i no laikim God Jehova? Ol Kristen i mas maritim tasol ol man husat i laikim tumas Jehova na i rispektim ol lo bilong em long stretpela pasin. Tok Bilong God i tokim yumi: “Ol haiden ol i narakain, olsem na yupela i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak?”—2 Korin 6:14.
14, 15. (a) Sampela i gat wanem tingting kranki long mining bilong dispela tok “pasin pamuk”? (b) Dispela tok “pasin pamuk” i makim wanem ol samting? Olsem wanem ol Kristen i ken “stap longwe long pasin pamuk”?
14 Save em i wanpela samting yumi mas kisim. Yumi no inap stap longwe long pasin pamuk sapos yumi no save gut em i wanem samting. Sampela long nau ol i kisim tingting kranki long mining bilong dispela tok “pasin pamuk.” Ol i ting ol inap mekim ol samting bilong inapim laik bilong skin taim ol i singel yet, maritpasin tasol em samting ol i no ken mekim. Sampela lain bilong lukautim helt bilong ol man i laik daunim namba bilong ol yangpela meri i kisim nating bel, na ol i bin kirapim ol yangpela long mekim ol narapela pasin sem em meri i no save kisim bel long en. Dispela tok i no stret. Abrusim hevi bilong meri i kisim nating bel i no wankain olsem bihainim stretpela pasin. Na pasin pamuk i makim planti samting.
15 Tok Grik por·neiʹa, em ol i tanim olsem “pasin pamuk,” i makim planti samting. Em i stori long maritpasin samting namel long ol manmeri husat i no marit wantaim na ol samting i no stret ol manmeri i mekim long sem bilong ol. Ol narapela samting i insait long pasin por·neiʹa em pasin bilong putim sem long maus, putim sem long as, na pilai long sem bilong narapela man o meri—em ol samting ol pamukman o pamukmeri i save mekim. Ol man husat i ting ol dispela kain pasin i no pasin pamuk ol i giamanim ol yet na ol i pundaun pinis long wanpela umben bilong Satan. (2 Timoti 2:26) Na bilong bihainim stretpela pasin yumi mas abrusim olgeta kain pasin pamuk na mekim sampela samting moa. Bilong i “stap longwe long pasin pamuk” yumi mas sakim olgeta kain pasin bilong bel i kirap na mekim pasin doti, em ol dispela kain pasin em inap long kamapim pasin por·neiʹa. (Efesus 4:19) Long dispela rot yumi bihainim stretpela pasin.
Abrusim Ol Hevi Bilong Tok Gris
16. Long wanem taim i stret long kamapim ol tok na pasin i soim olsem narapela i laikim narapela? Wanem stori bilong Baibel i kamapim dispela?
16 Bilong yumi ken wok yet long bihainim stretpela pasin, yumi mas was gut long pasin bilong tok gris. Sampela i tok i no gat rong long man i tok gris wantaim meri o meri wantaim man, em samting bilong amamas tasol. Tru, i gat taim bilong man na meri i ken kamapim ol tok na pasin i soim olsem narapela i laikim narapela. Ol man i bin lukim “Aisak i wok long holim meri bilong en, Rebeka,” na taim ol man i lukim dispela ol i luksave olsem ol i no brata susa. (Stat 26:7-9) Tupela i marit pinis. I stret ol i ken mekim olsem. Tasol pasin bilong tok gris i narapela kain samting.
17. Pasin bilong tok gris em wanem samting? Olsem wanem yumi ken abrusim dispela pasin?
17 Pasin bilong tok gris i olsem: Long tok o pasin man i soim olsem em i gat laik long meri, tasol em i no gat tingting long marit. I gat kain kain rot long mekim olsem, sampela i no stap ples klia tumas. (Sindaun 30:18, 19) Dispela i mekim na i hatwok long kolim ol lo samting yumi mas bihainim bilong abrusim dispela pasin. Olsem na yumi mas yusim samting i winim ol lo—em pasin bilong skelim gut yumi yet na pasin bilong bihainim ol stiatok bilong Baibel.
18. Wanem samting i save kirapim sampela long tok gris long narapela? Bilong wanem pasin bilong tok gris inap mekim nogut long man?
18 Yumi olgeta i amamas taim yumi pilim olsem narapela i gat laik long yumi, a? God i bin wokim yumi olsem. Tasol olsem wanem? Yumi save tok gris bilong kirapim narapela na bai em laikim yumi—yumi mekim olsem bilong yumi ken amamas long yumi yet o bilong kirapim nating narapela long laikim yumi? Sapos olsem, yumi tingting long pen yumi givim long narapela? Olsem: Sindaun 13:12 i tok: “Sapos man i ting long kisim wanpela samting na i wet nating longpela taim, bai em i bel hevi moa yet.” Sapos yumi tok gris long narapela, yumi no save dispela i mekim wanem long em. Em inap kisim tingting olsem yumi laik poroman wantaim em na bihain maritim em. Bihain taim em i save olsem yumi no gat dispela laik, tingting bilong em inap bagarap stret. (Sindaun 18:14) Bilong mekim nabaut long bel na tingting bilong narapela em i nogut tru.
19. Olsem wanem pasin bilong tok gris inap bagarapim marit bilong ol Kristen?
19 Em i bikpela samting long was gut moa yet long pasin bilong tok gris wantaim ol marit. I no stret ol singel i mekim samting bilong kamapim olsem ol i gat laik long wanpela man o meri i marit, na i no stret ol marit i mekim olsem long wanpela i no poroman marit bilong ol. Sori tru, sampela Kristen i bin popaia na ting em i orait long i gat laik long narapela man o meri husat i no poroman marit bilong ol. Sampela i kamapim ol tingting i stap long bel bilong ol long dispela “pren,” em ol samting bilong ol yet ol i no bin tokim poroman marit long en. Olsem na ol i pas moa wantaim dispela “pren” na dispela i mekim na marit i no inap stap strong o em i bagarap olgeta. Ol Kristen i marit i mas tingim savetok Jisas i bin mekim long pasin pamuk—em i tok dispela pasin i kirap long bel. (Matyu 5:28) Olsem na yumi laik was gut long bel na abrusim ol samting em inap kirapim yumi long mekim ol samting i no stret.
20. Yumi mas kisim wanem tingting long pasin bilong yumi long bihainim stretpela pasin?
20 Tru, em i hatwok long bihainim stretpela pasin long dispela taim pasin pamuk i pulap long graun. Tasol tingim, em i isi moa long bihainim stretpela pasin, winim hatwok yu mas mekim bilong kamap gutpela gen bihain long yu mekim sin pinis. Tru, Jehova i “lusim sin” na em inap helpim ol man i hevi long ol rong ol i bin mekim na kamap klin. (Aisaia 55:7) Tasol Jehova i no save banisim ol man husat i bin mekim pasin pamuk na ol i no kisim hevi long ol rong ol i bin mekim. Ol inap karim hevi long rong ol i bin mekim inap planti yia o inap long laip olgeta bilong ol. (2 Samuel 12:9-12) Olsem na em i bikpela samting long was gut long bel bilong yu na bihainim stretpela pasin. Yu mas kisim tingting olsem pasin bilong yu long stap klin long ai bilong Jehova na bihainim stretpela pasin i olsem wanpela gutpela samting i gat bikpela pe bilong en—na yu no ken larim em i lus!
Bai Yu Bekim Olsem Wanem?
• Stretpela pasin em i wanem samting? Bilong wanem em i bikpela samting?
• Yumi ken mekim wanem bilong was gut long bel bilong yumi?
• Yumi mas mekim wanem bilong i stap longwe long pasin pamuk?
• Bilong wanem yumi mas abrusim pasin bilong tok gris?
[Piksa long pes 11]
Ka inap bagarapim man sapos man i no stiaim gut
[Ol Piksa long pes 12]
Wanem samting inap kamap sapos yumi sakim ol tok lukaut?
[Piksa long pes 13]
Bihainim stretpela pasin taim yu poromanim wanpela yu tingting long maritim, dispela bai givim amamas long yu na givim biknem long God