Baibel i Tok Wanem?

I Gat Rong Long Man i Grisim Meri?

“Bilong wanem yumi ting pasin bilong man i grisim meri em i pasin bilong pulim em, o giamanim em, o rongim em? Em i no olsem! Em i wanpela pilai! Na em i wanpela pilai tupela wantaim i win long en, long wanem, narapela i mekim narapela i amamas.”—Susan Rabin, em dairekta bilong wanpela skul (School of Flirting) long Nu Yok Siti.

PLANTI manmeri i ting man i grisim meri, dispela i pasin bilong yumi ol manmeri, na i no gat rong, na em i samting yumi mas mekim bilong kamap pren bilong ol narapela na stap gut wantaim ol. Long ol kantri long hap bilong Wes, i gat planti buk, na nius, na ol kos i lainim ol man long pasin bilong wokim han na skin bilong pulim narapela, na pasin bilong lukluk strong long narapela​—⁠em ol bikpela samting bilong man i ken ‘grisim meri.’

Dispela tok grisim meri em i makim wanem samting? Wanpela dikseneri i tok, em pasin bilong ‘kirapim nating meri bilong laikim em’ o pasin bilong ‘kirapim nating bel bilong meri.’ Narapela dikseneri i tok, man i grisim meri bai kamapim pasin olsem em i ‘laikim tru em, tasol em i no gat tingting long maritim em.’ Olsem na planti man i ting, man i grisim meri em i gat laik long meri, tasol em i no gat tingting long marit. Olsem wanem? Yumi inap ting man i grisim meri, em i mekim pasin bilong amamas nating tasol? Baibel i tok wanem long man i grisim meri?a

No gat wanpela tok long Baibel i stori long pasin bilong man i grisim meri o meri i grisim man, tasol yumi inap kisim save long tingting bilong God. Olsem wanem yumi ken save long tingting bilong God? Yumi ken skelim sampela tok bilong Baibel i makim olsem dispela pasin i gat rong. Long dispela rot yumi lainim yumi yet “long skelim wanem ol pasin i gutpela na wanem ol pasin i nogut.” (Hibru 5:14) Pastaim yumi ken skelim dispela pasin insait long marit​—⁠i stret man marit i grisim meri bilong en na meri marit i grisim man bilong em, o nogat?

Sapos Yu Marit

Taim tupela marit tasol i stap, i stret ol i mekim pasin i kamapim klia narapela i laikim tru narapela. (Skelim wantaim Stat 26:⁠8.) Tasol sapos ol marit i mekim olsem long wanpela i no poroman marit bilong ol, dispela i brukim lo bilong God. Jehova i laik ol marit i amamas long pas gut wantaim, na narapela i bilip long narapela. (Stat 2:24; Efesus 5:21-33) Jehova i ting marit em i samting holi, na samting bilong i stap oltaim. Malakai 2:16 i tok long God olsem: ‘Em i no laikim tru pasin bilong brukim marit.’b

Olsem wanem? Sapos man marit em i grisim meri i no poroman bilong em, dispela i stret wantaim tingting bilong God long ol samting bilong marit? Nogat. Em i kamapim klia olsem em i no tingim marit i olsem samting holi, na God i as bilong en. Na tu, Efesus 5:33 i tokim ol man Kristen i marit long ‘laikim tru meri bilong ol, olsem ol i save laikim ol yet’ na meri i mas “i stap aninit long man bilong en na mekim gutpela pasin long em.” Yu ting man i grisim meri, na kirapim poroman marit bilong em long bel nogut, dispela i kamapim olsem em i laikim poroman marit bilong em na tingim tru em?

Na narapela samting yumi mas tingim gut em olsem: Man i grisim meri o meri i grisim man, dispela inap kirapim ol long pamuk. Pamuk em wanpela sin Jehova i nolaik tru long en na em i ting em i pasin nogut tru. (Kisim Bek 20:14; Wok Pris 20:10; Malakai 2:​14, 15; Mak 10:​17-19) Tru tumas, Jehova i ting pasin pamuk na bagarapim marit, em i bikpela rong, olsem na em i orait long poroman marit i no gat asua i ken katim marit. (Matyu 5:32) Olsem na yumi ken ting Jehova i orait long wanpela pasin em inap nogutim yumi? God i no ken orait long en, olsem wanpela gutpela papa o mama i no ken orait long liklik pikinini i pilai wantaim naip i sap.

Baibel i tok long pasin pamuk olsem: “Sapos yu holim paia klostu long bros bilong yu, orait ating siot bilong yu i no inap paia, a? O sapos yu wokabaut antap long paia, ating paia i no inap kukim lek bilong yu, a? Olsem tasol, sapos yu slip wantaim meri bilong narapela man, ol bai i mekim save long yu na yu no inap abrusim.” (Sindaun 6:​27-29) Tasol maski man o meri i no mekim pasin pamuk na bagarapim marit, taim man marit i grisim meri o meri marit i grisim man, orait narapela samting inap bagarapim em​—⁠bel bilong em i kirap na em i givim bel pinis long narapela.

Ol Samting Bilong Kirapim Bel

Sampela marit i kirap prenim man o meri i no poroman bilong ol, na narapela i kirap laikim narapela, tasol ol i no mekim pasin pamuk. Tasol Jisas i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:28) Bilong wanem Jisas i no orait long pasin bilong mangal long narapela, maski dispela i kamap long bel tasol?

Long wanem, ‘olkain samting i save kamap long tingting bilong man olsem pasin pamuk.’ (Matyu 15:19) Tasol dispela kain pasin pren inap nogutim tupela, maski ol i no mekim yet pasin pamuk. Olsem wanem em inap nogutim ol? Wanpela buk i stori long dispela samting i tok: “Wanpela wok o pasin pren i save pulim bikpela hap taim tumas na pinisim strong bilong yu, em dispela samting yu mas givim long poroman marit bilong yu, em i olsem pasin bilong i no stap gut long poroman.” Tru tumas, taim yu prenim narapela, em nau, yu no givim taim bilong yu long poroman marit, o tingim em na mekim gut long em. Jisas i tok, pasin yumi laik ol narapela i mekim long yumi, orait yumi mas mekim long ol, olsem na i gutpela sapos man i grisim meri em i askim em yet olsem, ‘Mi bai pilim olsem wanem sapos poroman marit bilong mi i mekim dispela kain pasin long narapela?’​—⁠Sindaun 5:​15-23; Matyu 7:⁠12.

Sapos wanpela man o meri i prenim narapela long pasin i no stret, em i mas mekim wanem? Dispela kain man i olsem man i draivim ka na ai i slip. Em i mas kirap na mekim wanpela samting bambai marit bilong em na pasin pren bilong em wantaim God i no ken bagarap. Jisas i mekim wanpela tok i kamapim klia olsem, man o meri i mas kirap na mekim sampela samting. Em i tok, em i mas rausim gutpela samting olsem ai o katim na rausim han, sapos dispela inap mekim na em i no stap gut long ai bilong God.​—⁠Matyu 5:​29, 30.

Olsem na yu bihainim savepasin sapos yu putim lo long wanem hap na hamas taim yu bai bungim dispela narapela man o meri. Tru tumas, yupela i mas i stap long ai bilong ol narapela man, na sapos yupela i wanwok, orait, putim lo long wanem ol samting yupela bai toktok long en. Na ating yu mas lusim olgeta dispela man o meri. Orait, bihain long dispela, yu mas bosim gut ai, tingting, bel, na pasin bilong yu. (Stat 39:​7-12; Song 19:14; Sindaun 4:23; 1 Tesalonaika 4:​4-6) Jop, em i wanpela maritman, na em i stap olsem gutpela piksa taim em i tok: “Mi bin mekim strongpela promis pinis olsem, mi no ken aigris long ol meri.”​—⁠Jop 31:⁠1.

Tru tumas, taim man marit i grisim meri i no poroman bilong em, dispela bai kamapim ol hevi na i brukim lo bilong Baibel. Tasol Baibel i tok wanem sapos man singel i grisim meri singel? Yumi ken ting dispela pasin i no gat rong long en, o ol i mas mekim olsem bilong painim poroman? Dispela pasin inap bagarapim ol?

Olsem Wanem Long Ol Singel?

I no gat rong taim tupela singel i kamapim bel bilong ol olsem narapela i laikim narapela, sapos ol i gat tingting long marit na ol i no mekim pasin doti. (Galesia 5:​19-21) Ating narapela i kirap laikim narapela taim tupela i raun nupela wantaim na ol i no tingting yet long marit. Dispela i no gat rong sapos tingting na laik bilong tupela i gutpela. Dispela i no pasin bilong man i grisim meri o meri i grisim man.

Tasol olsem wanem sapos man o meri singel i mekim sampela samting i makim olsem narapela i laikim narapela tasol ol i mekim dispela bilong amamas nating tasol? Ol inap ting dispela i no inap kamapim hevi, long wanem, ol i no marit. Tasol ol i mas tingim dispela bai mekim wanem samting bilong bagarapim bel. Taim man i grisim meri na meri i ting man i gat laik tru long em, tasol nogat; dispela inap bagarapim tru bel bilong meri. Tok bilong Sindaun 13:12 i stret: “Sapos man i ting long kisim wanpela samting na i wet nating longpela taim, bai em i bel hevi moa yet. Tasol sapos em i kisim dispela samting, orait em bai i ting laip bilong en i gutpela tru na em i amamas moa yet”! Maski tupela i tok ol i pren tasol na ol i no gat tingting long marit​—⁠ol inap save tru long tingting na bel bilong narapela? Baibel i tok: “Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?”​—⁠Jeremaia 17:9; skelim wantaim Filipai 2:⁠4.

Na tingim, tupela inap mekim pasin pamuk, na dispela inap kamapim sik o meri i kisim bel. Baibel i tambuim pasin pamuk, na ol man i save mekim dispela pasin, God i no orait long ol. Aposel Pol i tokim ol Kristen, bilong sakim traim ol i mas ‘kilim i dai olgeta pasin bilong dispela graun i stap long bel bilong ol olsem pasin pamuk’ na ol i mas sakim “laik na tingting nogut,” i save pulim man long mekim pasin pamuk. (Kolosi 3:5; 1 Tesalonaika 4:​3-5) Long Efesus 5:​3, Pol i tokim yumi olsem, tok bilong pasin pamuk ‘i no ken kamap liklik namel long yumi’ long pasin i save kirapim laik nogut long bel. Man i grisim meri, dispela pasin i pait wantaim tok bilong Baibel. Na God i tambuim yumi long toktok long maritpasin long pasin i no stret.

Ol tok bilong Baibel i kamapim klia olsem man i grisim meri na meri i grisim man, dispela inap nogutim ol, na i makim olsem ol i bikhet long Jehova, em As bilong marit. Tok bilong Baibel long pasin bilong man i grisim meri i gutpela na stretpela, long wanem, dispela tok i lukautim ol manmeri na hevi i no ken painim ol. Olsem na ol man i laikim tru God ol i no ken grisim meri, na ol bai mekim stretpela pasin long ol na tingim tru ol.​—⁠1 Timoti 2:​9, 10; 5:​1, 2.

[Ol Futnot]

[Piksa Kredit Lain long pes 18]

© The Curtis Publishing Company