Wanpela Bikpela Tok Yu Insait Long En

YU GAT wanpela pren o wanblut yu save pas gut wantaim em? Olsem wanem sapos wanpela man i sutim tok long yu olsem yu save pas gut wantaim em bambai yu ken kisim ol samting bilong helpim yu yet? Ating bai yu bel hevi long dispela tok, o yu kros tru long en, a? Em dispela kain tok Satan i bin sutim long olgeta manmeri i save pas gut wantaim God Jehova.

Tingim samting i bin kamap taim Satan i bin kirapim namba wan man na meri, Adam na Iv, long brukim lo bilong God na bung wantaim em long mekim pasin bikhet long God. Yu ting dispela samting i bin kamap i makim olsem ol manmeri bai bihainim tok bilong Jehova sapos dispela i helpim ol yet? (Stat 3:​1-6) Inap olsem 2,500 yia bihain long taim Adam i bikhet long God, Satan i kamapim wanpela bikpela tok​—long dispela taim em i sutim dispela tok long wanpela man nem bilong em Jop. Tok Satan i sutim long Jop i kamapim klia dispela bikpela tok i insait long en, olsem na nau yumi mas skelim gut dispela stori bilong Baibel.

“Mi No Gat Asua Long Wanpela Samting”

Jop “em i gutpela man tru na i no gat asua long ai bilong [God]. Em i save lotu na aninit long [God], na . . . em i no save mekim wanpela pasin nogut.” Tasol Satan i tok bilas long stretpela pasin bilong Jop. Em i tokim Jehova: “Yu ting bai Jop i aninit long yu sapos em i no kisim wanpela samting long han bilong yu, a? Mi ting nogat.” Orait nau Satan i toknogutim God na Jop​—em i sutim tok long Jehova olsem Jop i save stap gut long em, long wanem, Jehova i lukautim em gut na i mekim gut tru long em. Satan i tokim Jehova: “Tasol sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.”​—Jop 1:​8-11.

Bilong bekim ol dispela tok bilong Satan, Jehova i larim Satan i traim Jop. Satan i laik bai Jop i lusim God na i no lotu moa long em, olsem na em i givim planti hevi long dispela man i save stap gut long God. Ol narapela lain i kam stilim olgeta bulmakau samting bilong Jop o ol i kisim bagarap, na ol i kilim i dai ol wokman bilong em, na olgeta pikinini bilong em i kisim bagarap. (Jop 1:​12-19) Tasol yu ting Satan i win long dispela tok bilong em? Nogat tru! Jop i no save Satan i as bilong ol hevi em i bin kisim, tasol em i tok: “Bikpela yet i bin givim mi olgeta samting, na nau em i rausim pinis ol dispela samting. Olsem na mi litimapim nem bilong en.”​—Jop 1:21.

Bihain Satan i kam sanap long ai bilong Jehova na Jehova i tokim em: “Mi bin larim yu i mekim save nating long [Jop]. Tasol em i no lusim mi. Nogat. Em i bihainim mi tru olsem bipo.” (Jop 2:​1-3) Em nau, pasin bilong Jop long i stap gut long God em i bikpela samting​—bilong holimpas dispela pasin em i mas stap gut olgeta long God na i no surik liklik, na em i mas bihainim stretpela pasin. I kam inap long dispela taim, Jop i stap gut long God na i daunim dispela tok bilong Satan. Tasol Satan i no lusim em.

Orait nau Satan i mekim wanpela tok em olgeta manmeri bilong graun i insait long en. Em i tokim Jehova: “Mi ting sapos wanpela man i laik i stap gut, em inap givim olgeta samting bilong en bilong baim bek laip bilong en. Olsem na mi laik bai yu bagarapim bodi bilong en, na bai yu lukim em i tok nogut tru long yu.” (Jop 2:​4, 5) Satan i no kolim nem bilong Jop​—em i kolim dispela tok “wanpela man,” na long dispela pasin em i sutim tok long olgeta man bilong graun, olsem ol i no inap i stap gut long God. I olsem em i tok: ‘Wanpela man bai mekim olgeta samting bilong lukautim laip bilong em. Givim rot long mi na bai mi inap pulim olgeta man na ol i lusim God.’ Olsem wanem? Ating i no gat wanpela man bai i stap gut long God long taim bilong ol bikpela hevi na traim na long olgeta narapela kain taim tu?

Orait Jehova i larim Satan i givim wanpela sik nogut long Jop na ol strongpela sua i kamap long skin bilong em. Jop i karim bikpela pen moa na em i beten long God olsem em i laik i dai. (Jop 2:7; 14:13) Tasol Jop i tok: “Mi tok strong olsem, mi no bin mekim rong na mi no gat asua long wanpela samting. Na bai mi mekim wankain tok tasol i go inap taim mi dai.” (Jop 27:5) Jop i tok olsem, long wanem, em i laikim tru God, na i no gat wanpela samting inap senisim dispela pasin bilong Jop. Em i kamapim klia tru olsem em i man bilong i stap gut long God. Baibel i tok: “Stat long dispela taim Bikpela i mekim gut moa yet long Jop. Na las hap bilong laip bilong en i winim tru ol yia em i bin i stap bipo.” (Jop 42:​10-17) Yu ting i gat sampela manmeri moa i kain olsem Jop? Ol yia bihain long taim bilong Jop i kamapim wanem samting?

Ol Samting i Kamap na i Stretim Dispela Tok

Long sapta 11 bilong Buk Hibru long Baibel, aposel Pol i kolim nem bilong planti man na meri paslain long taim bilong Krais em ol i bin stap gut long God, na sampela em Noa, Abraham, Sara, na Moses. Orait nau Pol i tok: “Mi no gat taim bilong stori long [ol narapela].” (Hibru 11:32) Ol dispela gutpela wokman bilong God i planti tumas, olsem na Pol i kolim ol olsem “ol dispela manmeri bilong bipo ol i sanap na raunim yumi i stap olsem bikpela klaut,” olsem traipela klaut i karamapim skai. (Hibru 12:1) Tru tumas, insait long planti handet handet yia i kam inap long nau, i gat planti tausen manmeri em yumi no save long namba bilong ol, long laik bilong ol yet ol i stap aninit long God Jehova na stap gut long em.​—Josua 24:15.

Nambawan man bilong daunim dispela tok bilong Satan olsem em inap pulim olgeta man na bai ol i lusim God, em Pikinini Bilong God yet, Jisas Krais. Maski em i kisim bikpela pen nogut tru taim ol i nilim em long diwai pos, em i no lusim pasin bilong i stap gut long God. Taim Jisas i pulim laspela win bilong em, em i singaut strong olsem: “Papa, mi putim spirit bilong mi long han bilong yu.”​—Luk 23:46.

Ol handet handet yia i go pinis ol samting i kamapim klia tru olsem Satan i no inap pulim olgeta manmeri na ol i lusim God tru. Planti manmeri yumi no inap kaunim namba bilong ol, ol i bin kisim save long Jehova na ol i ‘laikim em tru long bel bilong ol na long spirit bilong ol na long tingting bilong ol.’ (Matyu 22:37) Ol i bin i stap gut long Jehova na i no surik liklik, na dispela i kamapim long ples klia olsem Satan i giaman taim em i tok i no gat wanpela man bai stap gut long God. Sapos yu stap gut long God, yu tu inap kamapim klia olsem Satan i giaman.

Yu Mas Mekim Wanem?

Em i laik bilong God long “kisim bek olgeta [“kain,” NW] manmeri, bai ol i ken save long as bilong tok tru.” (1 Timoti 2:4) Yu inap kisim dispela save olsem wanem? Yu mas makim hap taim bilong stadi long Baibel na ‘kisim save long dispela wanpela God tru tasol, na save long Jisas Krais, em i bin salim i kam.’​—Jon 17:3.

Bilong sutim tok olsem ol man i no inap i stap gut olgeta long God, i olsem Satan i tok, astingting bilong ol man long mekim wok bilong God i no stret. Bilong stiaim astingting i stap long bel, ol save yu kisim i mas i go daun long bel bilong yu. Na bilong mekim olsem, yu no ken tingting tasol long kisim sampela save long ol tok bilong Baibel. Yu mas wok long kisim pasin bilong tingim tingim long bel ol tok yu lainim. (Song 143:5) Taim yu ritim Baibel o wanpela buk samting i kamapim tok bilong Baibel, yu mas lusim hap taim long tingim sampela askim olsem: ‘Dispela tok i skulim mi olsem wanem long Jehova? Wanem ol pasin bilong God i kamap klia long ol dispela tok? Mi mas bihainim ol dispela pasin long wanem ol samting long i stap bilong mi? God i save orait long wanem samting na em i no orait long wanem samting? Dispela samting i mekim wanem long tingting bilong mi long God?’ Taim yu tingim tingim ol kain askim olsem, bai yu laikim tumas Man Bilong Wokim olgeta samting na bai yu tenkyu tru long em.

Pasin bilong i stap gut long God i no samting bilong bilip bilong lotu tasol, nogat. (1 King 9:4) Bilong i stap gut long God Jehova, yu mas bihainim pasin i stret long olgeta samting yu mekim long i stap bilong yu. Tasol taim yu holimpas dispela pasin, dispela i no inap nogutim yu. Jehova em i God bilong “amamas” na em i laik bai yu stap amamas. (1 Timoti 1:11) Orait nau yumi ken tingim sampela pasin yu mas abrusim bambai yu ken i stap stret long olgeta pasin bilong yu na bai yu stap amamas na God i orait long yu.

Abrusim Pasin Pamuk

Jehova yet i bin putim ol lo bilong marit long Baibel, em i tok: “Man i save lusim papamama na i pas wantaim meri bilong en, na tupela i kamap wanpela bodi tasol.” (Stat 2:​21-24) Tupela marit i kamap “wanpela bodi tasol,” olsem na sapos ol i mekim maritpasin wantaim poroman marit bilong ol yet tasol, bai ol i givim biknem long pasin marit em God i bin kamapim. Aposel Pol i tok: “Yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i mekim ol kain kain pasin pamuk.” (Hibru 13:4) Pasin bilong “lukautim gut marit” i olsem man o meri i slip wantaim poroman em i bin marit tru tru long en. Sapos wanpela i mekim maritpasin wantaim narapela i no poroman marit bilong em, em i mekim pasin pamuk na bagarapim marit, na kot bilong God inap painim em.​—Malakai 3:5.

Olsem wanem long mekim maritpasin taim ol i no marit yet? Dispela tu i brukim stretpela lo Jehova i bin putim. Baibel i tok: “Laik bilong God em i olsem. . . . Yupela i mas abrusim olgeta kain pasin pamuk.” (1 Tesalonaika 4:3) Man i slip wantaim man, tupela wanblut i slip wantaim, na man o meri i mekim maritpasin wantaim ol animal, ol dispela pasin tu em sin long ai bilong God. (Wok Pris 18:​6, 23; Rom 1:​26, 27) Sapos man i laik bai God i orait long em na em i ken i stap amamas tru, em i mas klia long olgeta kain pasin pamuk na pasin sem.

Na olsem wanem long ol singel i pilai nogut na bel i kirap? Dispela pasin tu Jehova i no orait long en. (Galesia 5:19) Na yumi no ken tingting long pasin pamuk samting. Jisas i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:28) Na dispela tok i sutim tu pasin bilong lukim ol piksa nogut long buk, o TV, o Intenet, o ritim stori bilong ol manmeri i mekim pasin pamuk, o harim olkain tok doti long ol singsing. Taim yumi abrusim ol dispela kain samting God i save amamas, na dispela pasin i strongim yumi long wokabaut stret.

Na olsem wanem long man i tromoi ai long meri bilong grisim em o pulim em? Sapos man marit i tromoi ai long wanpela meri em i no meri tru bilong em, em i kalapim ol lo bilong Baibel na i mekim olsem em i no rispek long Jehova. (Efesus 5:​28-33) Em i no stret liklik sapos man singel i tromoi ai long meri singel bilong mekim olsem em i laikim em, tasol em i no laikim em tru​—em i pilai tasol. Olsem wanem sapos meri i ting man i laikim em tru? Bel bilong meri bai bagarap stret, a? Na tu, pasin bilong tromoi ai long meri em inap kirapim em long mekim pasin pamuk o brukim marit. Tasol sapos man i mekim pasin i stret long ol meri, man bai rispek long em yet.​—1 Timoti 5:​1, 2.

Ol Narapela Rot Bilong Amamasim God

Long planti kantri ol man inap baim bia na wain samting long laik bilong ol yet. Yu ting i gat rong long dringim ol dispela samting? Baibel i no tambu long dring liklik bia o wain samting inap long skel tasol. (Song 104:15; 1 Timoti 5:23) Tasol pasin bilong dring planti na dring spak, dispela i gat rong long ai bilong God. (1 Korin 5:​11-13) Yu no laik dring planti tumas na bagarapim skin bilong yu na nogutim sindaun bilong famili bilong yu, a?​—Sindaun 23:​20, 21, 29-35.

Jehova em i “God bilong mekim pasin tru tasol.” (Song 31:5) Baibel i tok: “God i no inap tru long giaman.” (Hibru 6:18) Sapos yu laik bai God i orait long yu, yu mas abrusim pasin bilong tok giaman. (Sindaun 6:​16-19; Kolosi 3:​9, 10) Baibel i tokim ol Kristen: “Yupela olgeta i mas mekim tok tru tasol long ol arapela.”​—Efesus 4:25.

Na i gat pasin bilong pilai laki tu. Maski planti man i save pilai laki, em i wanpela kain pasin bilong mangal long mani, long wanem, man i laik kisim mani long rot bilong narapela man i pilai laki na em i lus. Jehova i no orait long ol man i “pulim mani samting bilong ol man.” (1 Timoti 3:8) Sapos yu laik bai Jehova i amamas long yu, orait yu mas klia long olgeta kain pilai laki, olsem laki tiket, bingo, bet long ol hos, na ol narapela samting olsem. Sapos yu klia long dispela pasin, bai yu gat bikpela mani liklik long lukautim famili bilong yu long ol samting ol i mas kisim.

Pasin bilong stil, olsem kisim samting i no bilong yu, em tu i wanpela kain pasin mangal. Baibel i tok: “Yupela i no ken stil.” (Kisim Bek 20:15) I gat rong long baim ol samting em yumi save pinis ol man i bin stilim, o yumi kisim nating wanpela samting na yumi no askim pastaim. Baibel i tok: “Ol stilman i no ken stil moa. Nogat. Nau ol i mas wok. Ol i mas mekim gutpela wok long han bilong ol yet, na ol bai i kisim planti samting, inap long ol i ken helpim ol man i sot long ol samting.” (Efesus 4:28) Ol man i laikim tru Jehova, ol i no save stilim taim bilong bos bilong ol​—ol i wok strong inap long olgeta aua bilong wok. Ol i laik “wokabaut stret long olgeta taim.” (Hibru 13:18) Na sapos bel bilong yumi i no gat tok, orait tingting na bel bilong yumi bai i stap isi.

God i save ting olsem wanem long man bilong belhat? Baibel i toksave olsem: “Yu no ken pren long ol man bilong kros kwik na bilong pairap nabaut.” (Sindaun 22:24) Pasin bilong belhat kwik, planti taim em i save kamapim pait na bagarapim man. (Stat 4:​5-8) Na Baibel i tok long pasin bilong bekim nogut long man olsem: “Sapos ol i mekim pasin nogut long yupela, orait yupela i no ken bekim pasin nogut long ol. Nogat. Oltaim yupela i mas tingting long mekim pasin i gutpela long ai bilong olgeta man. . . . Oltaim yupela i mas painim rot bilong i stap wanbel wantaim olgeta man. Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol.’ ” (Rom 12:​17-19) Taim yumi bihainim ol dispela tok, i stap bilong yumi bai i gat bel isi long en​—olsem na amamas bilong yumi bai go bikpela.

Yu Inap Mekim

Yu ting yu inap holimpas pasin bilong i stap gut long God maski ol lain bilong dispela graun i laik subim yu long lusim Em? Yu inap. God i laik bai yu sanap strong na kamapim long ples klia olsem Satan i giaman taim em i tok i no gat wanpela man bai stap gut long God, na yumi save God i laik bai yu mekim olsem, long wanem, Baibel i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”​—Sindaun 27:11.

Yu ken beten askim Jehova long strongim yu long mekim ol samting i stret long ai bilong em. (Filipai 4:​6, 7, 13) Olsem na yu mas wok strong long kisim sampela save moa long Baibel. Sapos yu tingim tingim ol tok yu lainim long Baibel, dispela bai helpim yu long laikim moa yet God na kirapim yu long mekim ol samting em i laikim. Baibel i tok long 1 Jon 5:3 olsem: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” Ol Witnes Bilong Jehova long hap bilong yu bai amamas long helpim yu long stadi long Baibel. Mipela laik bai yu painim ol Witnes i stap long hap bilong yu, o yu ken raitim pas long ol lain i wokim dispela nius.

[Piksa long pes 4]

Jop i bin stap gut long God taim ol traim i painim em

[Piksa long pes 7]

Sapos yu wok long kisim sampela save moa long Baibel, dispela bai strongim tingting bilong yu long mekim ol samting i stret