Televisen Inap Bagarapim Man?
Long Disemba 18, 1997, ol het-tok long sampela nius i tok, wanpela piksa komik bilong televisen i mekim na planti man i kisim sik long Tokyo, Japan. Ol i kisim planti handet pikinini i go long haus sik. Wanpela nius (The New York Times) i tok: “Sampela pikinini i trautim blut, na ol narapela i pundaun na skin bilong ol i guria nogut o ol i hap i dai. Ol dokta na ol dokta bilong skelim tingting i tok, dispela samting i kamapim klia olsem, sampela program bilong televisen long nau inap bagarapim tru ol pikinini.”
Wanpela nius long Nu Yok (Daily News) i tok: “Asde ol Japan i pret pret na tingting planti bihain long wanpela piksa komik long televisen i kamapim wanpela animal nogut i gat retpela ai i lait strong. Planti handet pikinini long olgeta hap bilong kantri, ol i pundaun long graun na ol i guria nogut na spet i kamap long maus bilong ol.
“Long Tunde nait, kwiktaim ol i kisim klostu 600 pikinini na sampela manmeri i go long haus sik, bihain long ol i lukim . . . wanpela piksa komik long televisen.” Sampela i no inap pulim gut win, olsem na ol i putim ol long hap bilong haus sik i bilong ol man i gat bikpela sik tru.
Yukiko Iwasaki, em mama bilong wanpela pikinini i gat 8-pela krismas, em i tok: “Mi kirap nogut long lukim pikinini meri bilong mi i hap i dai. Em i no inap pulim win. Mi paitim em long baksait na nau em i kirap na pulim win.”
Ol man i save wokim ol program bilong ol pikinini long televisen, ol i no save long as na wanpela piksa komik ol i bin mekim wok long en “inap planti handet taim”, em inap nogutim planti pikinini olsem.
Sampela papamama i save long ol samting nogut televisen inap mekim, olsem na ol i skelim gut ol program ol pikinini inap lukim, o ol i rausim televisen long haus bilong ol. Wanpela papa long Alen, Teksas, long Yunaitet Stets, em i tok, paslain long ol i rausim televisen long haus, ol pikinini “i no inap putim gut tingting bilong ol long wanpela samting inap longpela taim, na ol i kros hariap, na ol i no wok gut wantaim ol narapela, na olgeta taim ol i les.” Em i tok moa: “Nau klostu olgeta 5-pela pikinini bilong mipela—krismas bilong ol i 6 i go inap long 17—ol i nambawan gutpela sumatin long skul. Taim mipela i rausim televisen, kwiktaim ol pikinini i gat laik long pilai spot, kaunim buk, wokim piksa samting, mekim wok long kompyuta, na ol narapela samting tu.
“Wanpela samting mi save tingim yet i kamap inap 2-pela yia i go pinis. Pikinini man bilong mi—long dispela taim em i gat 9-pela krismas—em i go long wanpela pati long haus bilong pren bilong em na bilong slip long haus bilong pren tu. Pikinini i ring na em i tok, em i laik kam bek long haus . . . Taim mi go kisim em na askim em long hevi bilong em, em i tok: ‘Mi les. Ol i laik sindaun tasol na lukim televisen!’ ”