Bosim Gut Televisen​—Nogut Em i Bosim Yu

TELEVISEN em i wanpela gutpela samting, tasol em inap long bagarapim tingting bilong ol man. Ol kampani bilong televisen long Amerika i kirapim ol kantri i no gat planti wok bisnis samting long en, olsem ol tu i mas kisim televisen, long wanem, em gutpela rot bilong stretim ol hevi bilong ol. Na olgeta manmeri long dispela ol kantri inap lain long planti samting wankain olsem long skul. Maski sampela ol i stap longwe tru, ol inap lukim na lainim sampela samting olsem​—pasin bilong wokim gaden na lukautim graun na lukautim famili. Na ol pikinini inap lain long saiens na marasin samting na pasin na sindaun bilong ol narapela lain man.

Long yia 1961 Newton Minow, em i siaman bilong wanpela kampani (Federal Communications Commission), em i tok televisen i olsem ‘wanpela bikpela hap graun nogut i stap nating,’ tasol em i tok moa olsem ol i kamapim sampela gutpela samting long televisen i lainim ol man long sampela samting, na amamasim ol.

Inap long nau i gat sampela gutpela samting i save kamap long televisen. Nius bilong televisen i save kamapim stori long ol samting i kamap long olgeta hap graun. Na yumi inap lukim ol samting i no stap long hap bilong yumi, olsem: Wanpela kain pisin em i save singsing na ol i kisim piksa bilong en taim em i flai isi isi tru, na sampela ol plaua i gat kain kain kala na taim win i meknaisim, i olsem ol i danis. Na i gat ol narapela gutpela samting olsem wanpela kain danis ol i save kolim ballet na ol kain kain musik na singsing samting. Na i gat ol pilai na piksa wokabaut, na planti samting moa i save kamap long televisen​—sampela i no gutpela tumas, na sampela i gutpela bilong lukim.

Na i gat sampela program bilong ol pikinini i gutpela bilong skulim ol. Wanpela lain (National Institute of Mental Health) i tok, ol pikinini i save lainim pasin bikhet taim ol i lukim ol piksa nogut long televisen, na olsem tasol ol inap lainim ol gutpela pasin bilong tingim ol narapela man na i stap pren long ol, na ol inap lain long pasin bilong bosim gut bel. Sampela program i lainim man long ol samting em inap mekim long taim hevi i kamap, na dispela i bin lukautim laip bilong sampela pikinini. Wanpela man, em Vance Packard, em i tok long wanpela buk bilong em (Endangered Children) olsem: ‘Sampela papamama i save haitim televisen bilong ol long wanem, ol pikinini i no mekim gutpela pasin long ol, o ol pikinini i bikhet tumas na papamama i no inap bosim gut ol.’

Bosim Gut

Olsem na maski yumi stori long ol manmeri i bikpela pinis o long ol pikinini, i gat wanpela rot tasol​—yu mas bosim gut televisen. Olsem wanem? Yumi save bosim gut televisen o televisen i save bosim sindaun bilong yumi? Mista Packard i tok, sampela man i mas rausim televisen bilong ol o baim i go long narapela man bambai ol inap bosim gut skin o sindaun bilong ol. Na sampela ol i painim sampela rot bambai ol i ken holim yet televisen tasol ol i ken bosim gut na i no larim televisen i bosim ol. I gat wanpela lista i kamapim sampela tingting bilong helpim yu.

✔ Inap wanpela o tupela wik samting yu ken skelim hamas aua famili i save tromoi long lukim televisen. Na bungim ol dispela aua long pinis bilong wik samting, orait askim skin bilong yu yet: ‘Televisen i helpim mi long kisim sampela gutpela tingting o pasin samting?’ Sapos nogat, orait yu mas tingting: ‘I gutpela mi larim televisen i stap, o mi rausim i go?’

✔ Skelim program bilong televisen. Lukim lista bilong televisen na save, i gat ol gutpela piksa bai kamap o nogat.

✔ Makim taim bilong famili i ken i stap na toktok wantaim na dispela bai helpim ol long pas gut wantaim.

✔ Sampela saveman i tok, no ken larim ol pikinini o ol yangpela i kisim televisen bilong ol yet. Papamama bai i no inap save long wanem kain ol piksa em pikinini i save lukim.

✔ Sapos yu gat wanpela video ating em i gutpela liklik. Yu inap kisim ol kaset i gat ol gutpela piksa long en, o sapos i gat wanpela gutpela piksa i kamap long televisen, yu inap putim i go long kaset na bihain sapos yu gat taim yu inap lukim. Olsem bai yu save, wanem kain piksa i stap long dispela ol kaset​—na wanem taim bai yu opim televisen. Wanpela toksave i olsem: Sapos yu no was gut, dispela inap pulim bikpela hap taim moa na em inap opim rot long kisim ol video nogut.

Husat i Stap Olsem Tisa Bilong Yu?

Ol man i olsem wanpela kain masin i lainim planti kain samting. Oltaim tingting bilong yumi i kisim save long planti nupela samting, na i salim inap 100 milion toktok samting i go long kru bilong yumi long olgeta wan wan sekon. Olsem na yumi mas skelim gut ol samting yumi putim long tingting. Dispela stori bilong televisen i kamapim klia olsem isi isi ol samting yumi lukim long televisen inap bagarapim tingting na laik bilong yumi, olsem sampela kaikai o dring yumi kisim inap bagarapim skin bilong yumi.

Olsem wanem bai yumi kisim save long ol samting i kamap long ol narapela hap graun? Husat bai stap olsem tisa bilong yumi, na em inap lainim yumi long wanem samting? Tok Jisas i mekim i givim stretpela tingting long yumi long dispela samting, em i tok: “Sumatin i no winim tisa bilong en. Tasol taim em i skul gut pinis, orait em bai i kamap wankain olsem tisa bilong en.” (Luk 6:40) Sapos yumi lusim bikpela hap taim long lukim televisen olsem em i tisa bilong yumi, ating bai yumi kirap long bihainim ol dispela samting yumi lukim—long mekim ol wankain toktok na pasin em televisen i kamapim. Baibel i tok olsem long Sindaun 13:20: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.”

Maski televisen i no kamapim ol piksa nogut, yumi sot yet long wanpela bikpela samting taim yumi lukim televisen. Ol stori long televisen i no tokim yumi long samting yumi olgeta i mas save long en: Em ol samting bilong God. Ating taim yumi lukim televisen yumi inap save, ol samting long olgeta hap i go nogut, tasol televisen i no inap tokim yumi, bilong wanem ol man i no inap lukautim gut lain bilong ol. Tru, i gutpela yumi lukim ol gutpela samting God i wokim long graun, tasol ol dispela piksa i no helpim yumi long pas gut wantaim Man i bin wokim olgeta samting, a? Na tru yumi inap lukim ol ples nabaut long graun, tasol olsem wanem? Televisen inap tokim yumi olsem bihain ol man inap i stap bel isi long dispela graun? Nogat, a?

I no gat wanpela samting long graun inap helpim yu long save long bekim bilong dispela ol askim; Baibel tasol inap mekim olsem. Baibel i helpim yumi long save long as bilong i stap bilong yumi na i strongim bel bilong yumi, long wanem yumi ken save, i gat ol gutpela samting bai i kamap long bihain. Na Baibel i gat bekim bilong planti kain askim bilong ol man. Sapos yumi kaunim Baibel long olgeta taim bai yumi inap save long ol dispela samting.

Tasol sapos yumi no bosim gut televisen, olsem wanem bai yumi painim taim bilong kisim ol dispela gutpela save long Baibel?