Pas Bilong Ol Man

Holim Meri na Karim i Go Tenkyu tru long stori, “No Ken Mekim Wanpela Samting, Nogut Mi Kilim Yu.” (Julai 8, 1992) Mi tu i bin kisim wankain hevi. Man i holim mi na kalabusim mi insait long ka na karim mi i go. Em i save mi wanpela Witnes Bilong Jehova, long wanem, olgeta taim mi singaut strong long nem bilong Jehova. Mi amamas long em i no bagarapim mi; han bilong mi tasol i solap, long wanem, em i bin pasim rop long han bilong mi. Em i bin tromoi mi long baksait bilong ka, na taim em i mekim olsem, skin bilong mi i bagarap liklik. Mi bin stap isi na mi wok long painim rot long lusim baksait bilong ka. Dispela samting i kamap na bihain ol nius i tokaut long en. Loya bilong mi, na ol man i save sindaun klostu long mi, na ol pren, na famili tu, olgeta i bin litimapim nem bilong Jehova na tok em i bin helpim mi long winim dispela hevi.

E. M., long Amerika

Baibel i no tok promis long God bai wokim wanpela mirakel samting bilong lukautim lain bilong em. Tasol i stret long yumi ken tok tenkyu long God sapos wanpela bikpela hevi i painim yumi na yumi winim dispela hevi. (1 Tesalonaika 5:18)​—ED.

Ol Famili i Mas Pas Gut Mi wanpela papa i no bin tingting tumas long ol pikinini bilong mi. Mi no ting dispela pasin mi mekim long ol pikinini bilong mi inap kamapim hevi. Taim mi kaunim ol stori long Kirap! bilong Jun 8, 1992, “Yupela Ol Famili Yupela Mas Pas Gut Wantaim​—No Ken Lusim Taim,” dispela i sutim tru bel bilong mi! Nau mi tok promis olsem bai mi senisim pasin bilong mi.

J. B. M., long Gabon

Ol dispela stori i tok, taim pikinini i krai krai yumi no ken pasim yau na givim baksait long krai na singaut bilong em. Tasol olsem wanem? Papamama i no ken larim pikinini i krai liklik? Sapos nogat, ating pikinini bai bosim papamama na bikhet, na bihain dispela bai nogutim em yet.

S. H., long Amerika

Mipela i no putim lo long dispela samting. Mipela laik kirapim ol papamama long tingim samting liklik pikinini bilong ol i laikim taim em i krai. Tru, taim sampela pikinini i bikpela liklik ating ol bai krai krai i stap, long wanem, ol i laik bosim papamama, olsem na ol bai krai krai oltaim na bai papamama i mas tingting long ol tasol na mekim gut long ol. Tasol planti dokta i tok, taim pikinini i nupela yet em i no gat tingting long bosim papamama na bikhet.​—Lukim wanpela stori “Joni, Yu Stap Isi!” long “Kirap!” bilong Novemba 8, 1983​—ED.

Pasin Giaman Bilong Saiens Mi amamas tru long kaunim dispela stori, “Ol Pasin Giaman Bilong Sampela Lain Saiens.” (Julai 8, 1992) Mi insait long wanpela lain yupela bin kamapim long dispela stori, na tru tumas, em samting nogut tru long save dispela kain pasin giaman inap kamap long sampela lain saiens. Tasol taim man i laik kamap nambawan na winim ol narapela long kisim nupela save samting, em i no hatwok long mekim olsem long rot bilong pasin giaman. Mi litimapim nem bilong Dokta O’Toole, long wanem, em i no pret long tokaut long dispela pasin giaman!

O. O., long Amerika

Gras Bilong Sipsip Mi laik tok tenkyu long yupela long dispela stori, “Gras Bilong Sipsip.” (Jun 8, 1992) Mi lain long samapim laplap, na long skul mipela bin lain long ol samting bilong gras bilong sipsip. Mi bin raitim wanpela stori long gras bilong sipsip, na mi mekim wok long dispela stori bilong Kirap! Mi tingting planti long mekim olsem, long wanem, mi wanpela Witnes Bilong Jehova na ol narapela sumatin i save tok bilas long mi. Het-tisa tu i bin kamapim wanpela tok long ol sumatin, olsem ol i mas was gut long ol Witnes! Tasol tisa bilong mi i amamas taim em i kaunim stori mi bin raitim long gras bilong sipsip, na taim em i save mi bin kisim long Kirap! em i askim mi long givim wanpela long em.

P. A., long Sekoslovakia