Pas Bilong Ol Man
Ol Kibung Long Isten Yurop Mi kirap nogut tru taim mi kaunim ol stori, “Ol i Amamas Long Bung na Lotuim God Long Isten Yurop” long Kirap! bilong Ogas 8, 1992. Taim mi kaunim i olsem mi inap harim singaut amamas bilong ol brata Kristen bilong yumi taim ol i kisim ol nupela buk bilong Baibel long tok ples bilong ol yet. Na ol i mekim save paitim han. Mi no inap i go long ol dispela kibung, olsem na mi amamas long yupela i bin kamapim stori bilong ol, long wanem, yumi inap amamas wantaim ol, na tu, yumi inap tingim gut sindaun bilong yumi olsem yumi inap lotuim God long ples klia.
M. M., long Itali
Tok Pait Long Blut Nau tasol mi kaunim pinis dispela stori, “No Ken Tok, i No Inap!” (Jun 8, 1992) Na taim mi raitim dispela pas long yupela, aiwara i kapsait. Mi gat wanpela yangpela pikinini meri na man bilong mi i no wanbilip. Man bilong mi i no save kros long bilip bilong mi long nau, tasol mi save sapos pikinini bilong mipela i kisim hevi long blut, em bai kros. Dispela stori i strongim bel bilong mi olsem, yumi mas lainim ol pikinini bilong yumi long sanap strong long bihainim bilip bilong ol long Baibel maski ol i liklik.
L. W., long Amerika
Gras Bilong Sipsip Long stori bilong yupela, “Gras Bilong Sipsip” (Jun 8, 1992) yupela i tok: “I gat wanpela kain bataplai i laikim gras bilong sipsip. Em i save karim ol kiau long gras bilong sipsip, na taim kiau i bruk, na ol liklik snek olsem katapila i kam ausait, bai ol i gat planti kaikai.” Tasol klostu olgeta bilong ol dispela kain bataplai i no save bagarapim laplap ol i bin wokim long gras bilong sipsip o narapela kain laplap! Dispela tok bilong yupela bai mekim na olgeta man bai ting olgeta bataplai i nogut na ol i mas kilim ol.
T. K., long Inglan
Dispela stori bilong mipela i no kamapim tok olsem yumi mas kilim olgeta kain bataplai, nogat. Em i kamapim toksave tasol long samting yumi inap mekim sapos yumi no laik bai dispela kain bataplai i putim kiau insait long laplap ol i wokim long gras bilong sipsip. Wanpela buk (Grzimek’s Animal Life Encyclopedia) i tok, ol bataplai i save kaikai laplap ol i wokim long gras bilong sipsip ol i no laik tumas long flai. Planti bilong ol bataplai i flai nabaut long ol haus samting i bilong ol lain bataplai i no save bagarapim wanpela samting.—ED.
Sakim Birua Sapos wanpela i kaunim dispela stori “Sakim Birua—Kristen i Ken Mekim Wanem?” (Mas 8, 1992), em inap ting pasin bilong lukautim skin bilong em yet long rot bilong judo na karate na kendo samting em bilong lainim em long redi long pait. Tasol dispela i no stret. Dispela pasin judo o karate samting i bilong helpim man long bosim skin bilong em na long pilai gut long dispela spot, i no olsem planti spot nau ol man i save mekim.
T. M., long Jemani
Ating yumi ken tok sampela pasin bilong lukautim skin taim man i lain long “judo” o “karate” samting i gutpela, tasol ol dispela samting i lainim yumi long bagarapim narapela man sapos yumi laik. Dispela i no stret wantaim ol lo long Baibel, olsem dispela lo long Aisaia 2:4 na Matyu 26:52.—ED.
Pes 2 Bilong “Kirap!” Mi laik tok amamas long yupela long nupela kain pasin yupela kamapim long pes 2 bilong Kirap! Yupela i bin mekim olsem long Kirap! bilong Septemba 8, 1991 i kam inap long nau. Mi save wok long wanpela dipatmen bilong ol buk na nius samting, olsem na kwiktaim mi lukim ol naispela piksa, na pasin bilong putim ol rait na piksa, na ol kala tu. Insait long 20 yia mi lukim dispela nius Kirap! i wok long senis senis, na nau em i wanpela gutpela samting tru bilong pulim ol man long kisim save long Jehova. Mi bin tilim wanpela bilong dispela nius long wanwok bilong mi taim em i lukim ol gutpela nupela pasin bilong dispela nius!
D. A., long Amerika