Pas Bilong Ol Man

Televisen Tenkyu long ol dispela stori olsem “Televisen i Bin Kamapim Bikpela Senis Long Graun.” (Februeri 8, 1992) Mi gat hevi long televisen; mi no save strong na pasim televisen. Ol tok bilong yu i helpim mi. Nau bai mi skelim gut hamas aua mi save lusim long lukim televisen. Na mi putim televisen bilong mi long kabot, olsem na taim mi laik lukim wanpela piksa, mi inap skelim gut pastaim​—i gutpela mi lukim o nogat. Mi laik tok tenkyu gen long yupela.

W. H., long Amerika

Tim Bilong Spot Long Skul Nau tasol mi kaunim dispela stori long “Ol Yangpela i Laik Save . . . I Gutpela Mi Ken Insait Long Tim Bilong Pilai Spot Long Skul?” (Februeri 8, 1992) Ol wanskul i subim mi long insait long tim bilong skul, long wanem, ol i save mi laik tru long pilai spot. Mi laik tok tenkyu long yupela, long wanem, nau mi ken tokim ol, bilong wanem mi no ken insait long tim.

D. K., long Amerika

Tenkyu tru long dispela stori yupela i bin kamapim. Olgeta manki long skul em ol i laik insait long tim bilong pilai volibal, skul bilong mi i kirapim ol long i go insait long tim. Mi laik tru long insait long wanpela pilai. Tasol mi skelim gut dispela samting. Ol pilai na trening mipela i mekim bai pait wantaim wok bilong mi long autim tok na ol miting Kristen bilong mi. Olsem na taim mi kaunim dispela stori, mi save mi no ken insait long tim.

M. C. P., long Brasil

Pinisim Wok Yu Kirapim Taim mi kaunim dispela hap “Ol Yangpela i Laik Save . . .  Olsem Wanem na Mi No Inap Pinisim Ol Wok Mi Kirapim?” (Epril 8, 1992) mi ting olsem yupela i raitim stori long ol samting mi yet mi save mekim. Stori bilong yupela na strong bilong Jehova inap helpim mi long pinisim ol wok samting mi save kirapim. Mi laik tok tenkyu long gutpela stori yupela i mekim bilong helpim mipela long taim stret bilong en.

A. P., long Amerika

Pikinini i Dai Ol stori long hap “Baibel i Tok Wanem?” em ol i gat het-tok olsem: “Bilong Wanem God i Kisim Pikinini Bilong Mi?” (Oktoba 8, 1991), na “Ol Pikinini i Dai​—Bilong Wanem God i Larim i Kamap?” (Disemba 8, 1991) ol dispela stori i mekim bel bilong mi i stap isi long taim bilong hevi. Long Janueri 9, 1991, mi karim wanpela pikinini na 3-pela aua bihain em i dai. Mi kros long mi yet na dispela i kirapim mi long sutim nating tok long God. Bihain mi kaunim ol dispela stori. Ol dispela stori i kamapim bikpela pasin sori bilong God na dispela i mekim na mi krai nogut tru. Tenkyu long helpim mi long taim mi pilim olsem mi stap wanpis na bel bilong mi i bagarap. Ol dispela gutpela stori i helpim mi long wetim ol gutpela samting bai kamap bihain.

C. K., long Japan

Mauswara Nabaut Tenkyu long dispela stori “Mauswara​—Em Inap Nogutim Yu.” (Mas 8, 1992) Dispela stori i kamap stret long taim dispela hevi i bin painim mi. Mi gat hevi wantaim wanpela yangpela meri em bipo em i stap gutpela pren bilong mi, tasol nau em i kamapim sampela stori giaman long ol narapela, i olsem tok baksait long mi. Stori bilong yupela i helpim mi long save long dispela pasin na em i lainim mi long pasin bilong karim dispela hevi.

M. P., long Amerika

Tenkyu long ol dispela stori bilong mauswara em ol i kamap long taim stret bilong en. I no longtaim i go pinis wanpela man i bin tok baksait long mi. Taim mi bihainim pasin em Matyu 18:​15-17 i kolim, mi bin stretim dispela hevi wantaim dispela man.

B. C., long Ostrelia