Pas Bilong Ol Man
Ol i Laik Pulim Ol Yangpela Meri Long Skul Mi amamas tru long lukim stori i stap long hap “Ol Yangpela i Laik Save . . . Mi Ken Mekim Wanem na Bai Em i Klia Long Mi?” (Janueri 8, 1992) Mi wokim gret 7 long hai-skul, na planti manki i laik bai mi pren wantaim ol. Wanpela i strong yet long mi mas pren wantaim em, maski mi tokim em pinis olsem mi no laik pren wantaim em. Em i askim mi long go wantaim em long pati, na kaikai, na long i go raun wantaim em long Sarere Sande samting long maunten. Mi tok, “Nogat,” tasol em i no harim. Stori i stap long Kirap! i helpim mi long stap strong na sakim em.
P. B., long Amerika
Mi gat 17 krismas tasol, tasol mi bungim wankain samting olsem stori bilong Kirap! i kamapim. Tasol mi amamas taim ol manki i mekim olsem long mi, na mi no laik mekim wanpela samting long pasim dispela aigris nogut bilong ol. Nau mi save, bilong wanem mi mas sakim hariap dispela pasin.
L. A. R., long Brasil
Dispela stori i helpim mi long abrusim ol pasin nogut olsem pamuk i wok long kamap long ples wok bilong mi. Em i stori long ol samting nogut mi mas abrusim, na em i kamapim tok bilong Baibel long strongim dispela tok. Dispela ol stori i no helpim ol yangpela tasol, nogat. Em i save helpim ol singel i bikpela pinis tu.
K. H., long Jemani
Dispela stori i helpim mi long bihainim pasin bilong meri bilong Sulem, em i stap olsem wanpela “banis.”
E. S., long Filipin
Pasin Bilong Smok Taim mi kaunim tupela stori i stap long hap “Ol Yangpela i Laik Save . . . ” i stori long smok (Mas 8 na Jun 8, 1992), mi ken tok olsem ol samting dispela stori i kolim em i stret. Mi kirap long smok taim mi gat 13 krismas, long wanem, ol pren bilong mi long skul i kirapim mi long mekim. Tasol taim mi gat 15 krismas, mi kamap wanpela Kristen na mi lusim pasin bilong smok. Ol “pren” bilong mi i lusim mi. Bihain ol wanwok bilong mi i laik subim mi long smok gen. Tasol mi amamas long tok olsem, nau mi wok long wanpela brata Kristen, na i no gat win nogut bilong smok i stap long dispela ples wok.
B. S., long Jemani
Pasin i Senis Tenkyu tru long stori “Tok i Tru Inap Senisim Pasin Bilong Man.” (Mas 8, 1992) Nau mi stap long kalabus, na stori bilong dispela man i tanim bel i strongim mi tru. Ol polis i laik senisim pasin bilong ol kalabusman, tasol bihain ol i go bek long graun bilong Satan na ol i mekim wankain pasin gen. Sampela Witnes Bilong Jehova i helpim mi, na nau mi save olsem man inap senis tru sapos em i wok long painim God na mekim wok bilong Em.
J. S., long Amerika
Sik Kensa Aiwara bilong mi i kapsait taim mi kaunim stori i kamapim strongpela bilip bilong Rie (Kirap! Epril 8, 1991, pes 24). Mi kirap nogut, long wanem, maski em i gat bikpela sik, em i amamas na givim bel tru long mekim wok bilong God long olgeta de.
M. H., long Japan
Bilong Wanem God i Larim Pasin Nogut i Stap? Bipo tu yupela i kamapim gut dispela stori long kain kain rot. Tasol dispela stori i stap long Kirap! bilong Epril 8, 1991, em i gutpela moa. Olgeta samting, olsem ol piksa, na kirap bilong ol tok, em i gutpela tru!
G. H., long Amerika
Dispela stori i strongim bilip bilong mi long i gat wanem as na ol pasin nogut i stap, na i strongim bilip bilong mi long samting bai kamap long bihain. Na dispela i strongim mi moa long pas gut wantaim Jehova.
J. H., long Amerika