Pas Bilong Ol Man

Ol Famili i Pas Gut Wantaim Mipela i laik tok amamas long ol gutpela stori “Yupela Ol Famili Yupela Mas Pas Gut Wantaim​—No Ken Lusim Taim” i bin kamap long Kirap! bilong Jun 8, 1992. Nau tasol mipela kamap papamama bilong wanpela naispela pikinini man. Olsem na mipela amamas tru long kaunim ol tok ol narapela papamama long olgeta hap bilong graun i bin kamapim long dispela nius, na tok long olsem wanem ol i mekim bikpela long pikinini bilong ol. Mipela tu i laik mekim olsem na beten long God long em i ken helpim mipela long ‘stretim gut pikinini bilong mipela na skulim em long ol tok bilong Jehova.’​—Efesus 6:4.

R. S. na J. L. S., long Amerika

Longpela taim nau na mi laik toksave long yupela olsem, mi amamas tru long ol stori i save kamap long nius Kirap! Tasol taim mi kaunim Kirap! bilong Jun 8, 1992 em i stori long famili i mas pas gut wantaim, mi laik tok tenkyu tru long yupela. Sampela mun i go pinis mi bin karim wanpela pikinini. Mi wantaim man bilong mi bai wok strong long bihainim ol gutpela tok i bin kamap long dispela nius.

S. D., long Itali

Kaunim Ol Buk Mi wanpela yangpela na mi laik tru long kaunim ol buk o nius samting. Tasol sampela taim, samting mi kaunim mi no save gut long en. Olsem na taim mi kaunim nius samting na i gat sampela tok mi no klia long en, mi kalapim tasol. Dispela stori “Kaunim Ol Buk Samting na Kisim Save” long Kirap! bilong Mas 8, 1992 i bin helpim mi na bai mi no ken kalapim tok, mi mas kisim save long insait bilong en.

A. R. B., long Brasil

Planti yia nau mi bin wok strong bambai mi ken kaunim olgeta tok long ol nius Wastaua na Kirap!, tasol mi no inap. Maski mi gat sedyul bilong mekim olsem, mi no inap. Tasol stori i kamap long Kirap! bilong Mas 8, 1992 i soim mi, mi no inap mekim olsem, long wanem, mi no inap kaunim gut buk. Olsem na mi amamas long kisim save long rot bilong helpim mi long lain gut long kaunim buk. Olsem na mi laik tok tenkyu long yupela long ol nius Wastaua na Kirap!

A. K. F. M., long Brasil

Mi Ken Mekim Wanem na Bai Em i Klia Long Mi? Mi amamas tru long stori “Ol Yangpela i Laik Save . . . Mi Ken Mekim Wanem na Bai Em i Klia Long Mi?” i bin kamap long Kirap! bilong Janueri 8, 1992. Tru dispela stori i bilong helpim ol yangpela meri, tasol mipela ol yangpela man tu inap lain long gutpela tok bilong en. Long nau tasol wanpela yangpela meri i mekim olsem long mi, na dispela i traim pasin bilong mi long pren yet wantaim God! Dispela stori i kamap long taim stret na em i helpim mi long winim dispela traim. Mi laik tok tenkyu tru long yupela.

E. K. O., long Gana