Pas Bilong Ol Man

Marasin Estrojen Tenkyu tru long stori “Dispela Marasin Em Gutpela Long Yu?” em i bin kamap long Kirap! Jun 8, 1992. Em i kamap long taim stret. Dokta bilong mi i tok em i gutpela sapos mi dring dispela marasin. Long de antap dispela nius i kam na mi amamas tru long kaunim, na nau mi save gut long dispela marasin estrojen.

M. R. S., long Amerika

Inap tupela yia skin bilong mi i mekim na wantu tasol tuhat i save kamap nating long skin bilong mi. Dokta i tokim mi long kisim wanpela marasin, tasol taim mi kisim, ol narapela hevi i kamap, olsem het i pen. Mi yet mi skelim sampela buk bilong painim rot bilong helpim mi long winim dispela sik, na bihain mi tingting long raitim pas long yupela na askim yupela long kamapim wanpela stori long dispela long nius Kirap! Mi kirap nogut long wanem, long wik antap mi kisim Kirap! na em i gat dispela stori long marasin estrojen na dispela marasin i wok olsem wanem. Mi save dispela stori bai helpim planti meri.

B. S., long Amerika

Kamap Strong Long Spirit Tenkyu tru long stori “Ol Yangpela i Laik Save . . . Mi Ken Mekim Wanem Bilong Kamap Strong Long Spirit?” (Jun 8, 1991) Em i kamapim planti gutpela tok mi inap bihainim. Mi kaunim dispela stori tupela taim. Na mi bin raitim lista bilong ol mak bilong spirit mi laik winim (yupela bin tok long dispela nius, i gutpela long mekim olsem), na mi bai pasim dispela lista long banis bilong rum bilong mi.

G. K., long Amerika

Tenkyu tru long dispela stori yupela i bin raitim. Mi wok strong long kaunim Baibel, olsem na mi makim 15 minit long olgeta wan wan de bilong kaunim. Sampela taim mi winim 15 minit. Mi kirap nogut tru, long wanem mi bin lain long planti samting!

T. L. P., long Kanada

Bikpela Pusi Mi gat 14 krismas na mi salim pas bilong tokim yupela mi amamas tru long kaunim dispela stori “Bikpela Pusi Bilong Bus.” (Februeri 8, 1991) Mi laik tru long lukim wanpela bikpela pusi jagua olsem. Long rot bilong dispela stori yupela bin helpim mi, long wanem, dispela em gutpela stori tru na taim mi kaunim i olsem mi yet i bin i stap long dispela bikbus em jagua i stap long en.

M. C., long Frans

Ples Pipia Mi amamas tru long stori “Graun i Laik Kamap Ples Pipia?” (Me 8, 1991) Wan wan man tasol i save long ol pipia i hip i go bikpela tru long ol wan wan de, na dispela inap bagarapim graun. Tenkyu tru long yupela i kamapim klia dispela samting.

B. S., long Brasil

Skelim Piksa Wokabaut Mi gat 10-pela krismas. Tenkyu tru long stori “Ol Yangpela i Laik Save . . . Olsem Wanem Mi Ken Skelim Ol Piksa Wokabaut i Stret Long Lukim?” (Mas 8, 1991) Bihain liklik long taim mi kaunim dispela stori mi ting long lukim wanpela piksa nogut, tasol mi tingim gutpela tok bilong yupela, olsem na mi strong long mi no ken lukim.

M. B., long Amerika

Mi mas tok stret olsem, mi bin kirap lusim haus piksa taim piksa i nogut, tasol sampela taim, nogat. Mi bin sindaun i stap, tasol i gutpela sapos mi no bin lukim dispela piksa nogut. Mi no laik bai ol pren bilong mi i no amamas long mi, tasol em gutpela sapos mi bin tingim God na amamasim em. Dispela stori i bin helpim mi gut. Tenkyu tru long yupela i tingim ol yangpela na hevi bilong ol.

G. B., long Amerika

Winmoni Ol stori bilong yupela long “Winmoni” (Janueri 8, 1992) i kirapim mi long tingim dispela taim em mi no stap Kristen yet. Mi bin i gat sampela pren ol i save pilai laki. Wanpela i go kalabus, long wanem, em i bin paulim mani bambai em i gat mani bilong pilai laki. Na ol i paitim nogut narapela na bagarapim skin bilong em, long wanem em i no bekim dinau em i kisim bilong pilai laki. Tru tumas, pasin bilong pilai laki i save bagarapim sindaun bilong man.

R. B., long Amerika