Pas Bilong Ol Man

Mekim Bikpela Long Ol Pikinini Dispela stori long Kirap! bilong Jun 8, 1992, “Mekim Bikpela Long Ol Pikinini Long Olgeta Hap​—Mekim Wok Papamama Long Pasin Sori, Stretim Ol, Stap Gutpela Piksa, Tingim Ol Samting Bilong Spirit” i bin helpim mi tru, long wanem, nau tasol mi lain long ol tok bilong Baibel. Taim mipela kirap long go long ol miting Kristen, pikinini man bilong mi i krai planti na em i no inap tru long sindaun gut na i stap isi liklik. Tasol meri Kristen i stadi wantaim mipela i helpim gut mipela, na tu mipela kisim gutpela toksave long ol nius yupela wokim, olsem na nau gutpela samting i kamap long ol dispela tok mipela i kaunim. Pikinini man bilong mi i gat 2 na hap krismas, tasol nau em i save sindaun gut long ol miting na sampela taim em i mekim ol sotpela bekim.

M. T., long Japan

Mauswara Nabaut Bipo mi meri tru bilong mauswara nabaut. Wanpela de mi kam bek long skul na mi kaunim ol stori insait long Kirap! bilong Mas 8, 1992 olsem, “Mauswara Em Inap Nogutim Yu.” Dispela ol stori i helpim mi long lusim dispela pasin nogut. Mi no bin save mauswara nabaut em inap bagarapim nem bilong narapela. Mi amamas long kisim save olsem dispela pasin em samting nogut.

F. B., long Amerika

Ol dispela stori i helpim mi long holim wok mani bilong mi. Mi harim wanpela tokwin olsem ol bai pasim haus faktori mi wok long en, na mi bin kamapim dispela tokwin long ol narapela. Bos bilong mi i singautim mi i go long ofis bilong em. Em i tokim mi olsem mi mauswara nating na dispela kain tok bai pretim ol man, long wanem, i no gat planti wok mani. Ol i bin rausim sampela long ples wok bilong mi long wanem i no gat planti wok, olsem na mi ting dispela tok bilong bos em wanpela tok bilong painim rot bilong rausim mi tu. Taim mi kisim Kirap! (Mas 8, 1992) i stori long mauswara nabaut, mi pilim olsem God i givim tok long mi. Mi kisim dispela nius i go long bos bilong mi na tokim em mi bin lain olsem, mauswara nabaut long ol tokwin em i samting nogut, na mi bai wok strong long lusim dispela pasin. Em i tok tenkyu long mi, na mi amamas long wanem, mi holim yet wok mani bilong mi.

L. G., long Amerika

Marasin Estrojen Mi laik tok tenkyu tru long dispela stori long Kirap! bilong Jun 8, 1992​—“Dispela Marasin Em Gutpela Long Yu?” Tok bilong en i klia tru. Mi gat sik long bun (osteoporosis) na long 4-pela yia nau ol i givim marasin estrojen long mi. Tasol nau mi inap toktok gut wantaim dokta bilong mi long dispela samting, na tu, mi inap karim hevi dispela sik i kamapim, mi no bel hevi olsem bipo. Tenkyu tru.

R. C. S. M., long Brasil

Pilaim Musik Mi laik tru long tok tenkyu long yupela long stori i bin kamap long Kirap! bilong Epril 8, 1992, “Mi Laik Pilaim Musik Olsem Ya!” Nau mi stap long namba wan yia long hai-skul na mi lain long pilaim musik elektrik organ. Tupela yia i pinis tasol mi no save gut yet long dispela samting. Dispela stori long Kirap! i givim gutpela tok long mi na i helpim gut mi.

M. O., long Japan