Sampela Tok i Kam Long Olgeta Hap
Ol Saientis i Kirap Nogut Long Man i Ais Pinis
Long Septemba 1991 tupela man bilong Jemani i wokabaut long ol maunten ais klostu long boda bilong Ostria na Itali, na ol i kirap nogut tru long painim wanpela man i ais pinis insait long bikpela hap ais. Ol saveman i tok skin na ol samting bilong dispela man i stap gut na i winim ol narapela man bilong bipo tru ol i bin painim long Yurop. Ol i kolim dispela man, “Man Simulaun,” em nem bilong dispela hap maunten ais ol i bin painim skin bilong man insait long en. Wanpela nius (Süddeutsche Zeitung) i tok, taim ol saveman i skelim bodi bilong dispela man ol i kisim save long sindaun bilong ol man long dispela taim bipo. Dispela man i ais pinis i karim sampela laplap wantaim em, na sampela samting bilong painim abus samting, na ruksak. Ol man bilong saiens i skelim ol kago samting dispela man i holim na ol i ting em i bin i stap olsem 4,000 yia samting i go pinis. Taim ol i skelim klos na ol samting em i karim, ol saveman i kirap nogut tru long ol man long dispela taim bipo i gat gutpela save long wokim ol kain samting olsem.
Lain Pamukmeri
Long Rio de Janero long Brasil, liklik ples Vila Mimosa (i gat tupela lain haus tasol long dispela ples), i gat nem olsem ples tru bilong ol pamukmeri. Nius (Clarin) bilong Ajentina i tok, insait long dispela tupela lain haus i gat 400 pamukmeri. Long skulim ol na amamasim ol, i gat nupela redio-stesen em i save kamapim nius, o givim sampela askim long ol man, o em i kamapim sampela toksave long samting man i ken baim, na tu, em i kamapim musik. Dispela ol samting i bilong ol pamukmeri tasol. Dispela nius i tok moa, ol man na meri i bosim ol toktok long redio, klostu olgeta i pamukman o pamukmeri. Sik AIDS i go bikpela moa namel long ol pamukmeri, olsem na ol dispela kain man i tingting planti. Dispela nius (Clarin) i tok, long Brasil i gat 17,000 man i gat sik AIDS na olsem 350,000 i go inap long 450,000 i gat jem bilong dispela sik na em inap kamapim sik AIDS.
Rat i Planti Tru, Winim Ol Man
Wanpela nius (Jornal da Tarde) i kamapim ripot bilong lain bilong helpim ol man long abrusim sik (World Health Organization) ol i tok, i gat olsem 70 milion rat long Sau Paulo, long Brasil. Dispela i soim olsem i gat tupela o 3-pela rat long olgeta wan wan man i stap long dispela ples. Olsem na taim tait wara i kamap long Sau Paulo, ol bikpela sik i save kamap tu. Wanpela sik ol i kolim leptospirosis i kamap, long wanem, planti rat i pispis nabaut. Wanpela bikman bilong dipatmen bilong pasim ol samting kain olsem rat, (em Minekazu Matsuo) em i tok: ‘Sapos yumi inap putim marasin i gat gip bilong kilim ol dispela rat em bai gutpela.’ Tasol taim i gat planti kaikai na wara i stap nabaut, dispela marasin nogut i no pinisim ol rat, long wanem, ol i no kaikai dispela marasin. Dispela man Matsuo i tok, bilong pinisim ol rat yumi mas rausim ol pipia, em kaikai tru bilong ol rat.
Taim Mama i Gat Sik AIDS na i Givim Susu Long Pikinini
Sapos mama i gat sik AIDS na em i givim susu long pikinini, orait pikinini tu inap kisim dispela sik. Wanpela nius (The New England Journal of Medicine) i kamapim dispela tok taim ol i skelim sampela mama long Kigali, em biktaun bilong Ruwanda long Sentral Afrika. Long olgeta 100 100 pikinini, 50 inap kisim dispela sik long susu bilong mama, tasol pikinini i kisim susu long botol na ol i bin wokim susu long wara i gat sik long en na ol i dai, namba bilong ol i moa win. Olsem na mobeta pikinini i kisim susu bilong mama long ol dispela ples. I no olgeta meri i gat sik AIDS i givim sik long pikinini long rot bilong susu, nogat. Na ating taim ol saveman i skelim ol dispela meri i gat sik AIDS na sik i kalap long pikinini, ol i kisim save olsem planti meri i gat liklik pikinini, sik AIDS i kisim ol pinis, tasol em i kamap ples klia long ol inap 3-pela mun samting bihain long taim ol i bin karim pikinini. Planti jem bilong dispela sik i stap long skin taim sik i kamap nupela long skin.
Solwara Long Nambis Bilong Esia i Bagarap
Wanpela nius (Asiaweek) i tok, planti man i tingting planti long wanem, wara klostu long nambis long Esia na long Pasifik i wok long bagarap long ol pipia na marasin samting. Wanpela man bilong Yunivesiti bilong Guam (Charles Birkeland) em i save stadi long ol samting i stap long solwara, em i tokim dispela nius (Asiaweek), kirap long yia 1975 samting i kam inap long nau, planti man i slip long haus sik o ol i dai, long wanem, ol i kaikai kina i gat gip. Ol dispela kina i kisim sik taim ol i kaikai ol liklik liklik binatang insait long solwara na ol dispela liklik binatang i bin kaikai ol marasin nogut i stap long solwara. Ol dispela samting i bagarapim solwara i kam we? Dispela nius Asiaweek i tok, as bilong dispela samting, em taim ol man i katim katim ol diwai bilong bikbus, ol marasin ol man i bin tromoi long graun i ron i go long solwara long taim bilong ren, long wanem, bikbus i pinis na i no gat ol diwai bilong pasim wara bilong ren.
Nu Yok i Moa Nogut
Long 1989 na 1990 biktaun Nu Yok i winim ol 25 narapela biktaun long Amerika long ol pasin stil. Wanpela lain i skelim dispela samting (Federal Bureau of Investigation) i tok, long 1991 pasin stil i kamap 100,280 taim na ol man i toksave long polis bilong Nu Yok. Dispela i olsem: Long olgeta 73 73 manmeri long biktaun Nu Yok, wanpela bilong ol em stilman i bin paitim em nogut tru o stilim ol samting bilong em. Namba tu long Nu Yok i gat planti pasin olsem, em Sikago; bihain long Sikago em ol biktaun olsem Baltimo, Detroi, Nu Olians, Wosington, Dalas, Boston, Los Enjelis. Long olgeta 1,000 man bilong ol dispela biktaun, i gat klostu 10-pela kain pasin stil i kamap. Long biktaun Nu Yok long olgeta 100,000 man, i gat klostu olsem 31 em ol raskol samting i bin kilim ol i dai. Long ol 100,000 man long Wosington, D.C., klostu 78 em ol man i bin kilim ol i dai. Dispela lain i skelim ol dispela samting ol i tok, long ol 5-pela 5-pela man i dai, 3-pela i bin dai long gan.
Narapela i Helpim Narapela Long Haus
Long taim bilong ol tumbuna long Japan, ol man i no save helpim meri bilong ol long klinim haus samting, tasol nau tingting bilong sampela man bilong Japan i wok long senis. Wanpela lain i raun long Tokyo na givim askim long ol man, ol i kisim save olsem: Planti man i ting pasin bilong kukim kaikai na lukautim pikinini na wasim ol plet samting, em wok bilong meri, em i no wok bilong man, tasol 60 long olgeta 100 100 ol i tok em i gutpela sapos man i helpim meri long ol dispela wok. Planti, olsem 70 pesen bilong ol dispela man ol i bin givim askim long ol, ol i tok, planti taim ol i mekim wok olsem klinim haus, go long stua na baim kaikai o karim pipia i go ausait. Ol yangpela man marit i gat tingting olsem ol i mas helpim meri bilong ol. Olsem 60 pesen bilong ol i tok ‘i stret sapos man i helpim meri bilong em,’ na 29 pesen bilong ol i tok, ol i no tingting planti sapos ol i mas helpim meri bilong ol. Tasol wanpela nius (Mainichi Daily News) i tok, ‘dispela tingting bilong ol yangpela man marit olsem ol i mas helpim meri long haus, dispela tingting i no stap longtaim. Insait long ol famili em namba wan pikinini bilong ol i go long skul, ol man marit bipo ol i bin tok ol i amamas long helpim meri, namba bilong ol i go daun. Na ol man marit em namba wan pikinini i go long skul, em bipo ol i bin tok em i no bikpela samting sapos man i no helpim meri long ol wok bilong haus, namba bilong ol i go antap.
Sampela i No Laikim Ol Belo Bilong Haus Lotu
Wanpela nius (The Toronto Star) i tok, sampela man long wes Toronto i no amamas long ol belo bilong haus lotu i krai planti taim na i krai strong. Ol dispela man i tok dispela pasin bilong paitim belo na bikpela pairap i kamap i save bagarapim sindaun bilong ol. Olsem na ol i bin ripot long haus kaunsil long dispela samting. Komiti bilong haus kaunsil i tok em i gutpela sapos ol haus lotu i gat belo ol i paitim belo inap wanpela minit tasol—tupela taim long san long Mande i go inap long Sarere. Long Sande ol i ken paitim belo wanpela minit inap 3-pela taim long san, tasol ol i no ken mekim paslain long 9 klok long moningtaim. Ol i ken paitim belo bilong haus lotu long ol narapela taim olsem long taim bilong marit, o long taim bilong planim man, o long ol bikpela de bilong lotu. Ol i paitim belo long haus lotu bilong singautim ol man i kam long haus lotu. Tasol ol man i no amamas long dispela samting ol i tok, belo bilong klok inap mekim wankain wok, na belo bilong klok i no kirapim ol man i slip o bagarapim sindaun bilong olgeta man long taun.
Sik Long Baksait
Wanpela nius bilong Jemani (Schweinfurter Tagblatt) i tok, “Long olgeta 3-pela 3-pela man long Jemani, wanpela i gat sik oltaim long baksait.” Wanpela bikman bilong gavman i tok, sapos yumi skelim ol man i gat wanpela kain sik long baksait, inap olsem 75 milion de insait long wanpela yia i lus long wok, long wanem ol dispela man i no go long wok mani. I no olsem ol lapun o bikpela man tasol i kisim dispela sik, nogat; 11 pesen bilong ol dispela lain i kisim sik long baksait, em ol yangpela i no winim yet 18 krismas. Ol dokta i tok, as bilong dispela i olsem: Sampela i apim hevipela samting na ol i apim kranki, o ol i no sanap stret o sindaun gut, o taim ol i pilai spot o mekim narapela kain samting bilong malolo, ol i wokim strong tumas skin bilong ol.