Hemingway na Salut Politik

Long 1938, saveman bilong raitim ol stori, em Ernest Hemingway, em i bel hevi long tupela piksa em i lukim. Wanpela em i piksa bilong wanpela lain pikinini i dai i stap long biktaun Barsilona, long Spen, em ol bom bilong ol ami bilong Franco i kilim ol i dai long Pait Bilong Spen (1936-1939). Long dispela taim, insait long olgeta 875 manmeri i dai, 118 em ol pikinini. Hemingway i laik save husat i givim tok orait long tromoi dispela bom long ol man nating.

Na bel bilong em i hevi moa yet taim em i kaunim wanpela nius (New York Herald Tribune) i stori long tok wanpela man i mekim long Nu Yok, nem bilong em Patrick Cardinal Hayes. Dispela man i beten long ami bilong Jeneral Franco i mas win. Tasol namba tu piksa em Hemingway i tingting planti long en, em wanem kain piksa?

Em piksa bilong ol ofisa bilong ami bilong Spen na ol bikman bilong lotu, em ol i sanap long ai bilong haus lotu bilong Santiago de Compostela long Spen, na ol i salut long ol ami em ol i mats i go. Wanem samting i no stret long dispela piksa? Hemingway i tok: “Mi luksave long Jeneral Aranda na Jeneral Davila . . . na mi luksave long salut ol i mekim. Em salut bilong ami bilong Spen. Tasol mi no inap luksave long salut em Bisop bilong Lugo, na Asbisop bilong Santiago, na pris bilong Santiago, na Bisop bilong Madrit i mekim. Olsem wanem? Em salut bilong lain politik ol i kolim fasis? Em salut bilong ol lain Natsi na lain fasis bilong Itali?” Em i stret!

Hemingway i kirap nogut long lukim piksa bilong ol pikinini i dai long ol bom em lain Katolik i tromoi, na piksa bilong ol bisop Katolik i bihainim salut bilong ol lain Natsi na lain Fasis. Ating em i save, ol bikman bilong lotu Katolik long Spen i blesim dispela pait long Spen na ol i tok em i wanpela pait holi. Winim 500,000 manmeri bilong Spen i dai long dispela pait.

Brata bilong Jisas, em Jems, em i mekim wanem tok long dispela samting? Em i tok, “Sapos man i laikim pasin bilong graun, em i mekim pasin birua long God. Ating yupela i no save long dispela, a?” Planti bikman bilong ol lain i holim nating nem Kristen i save pren wantaim ol bikman bilong lain politik na lain ami.​—Jems 4:4.

[Piksa Kredit Lain long pes 31]

A.G.E. Fotostock