Pas i Kam Long Wanpela Man
I NO LONGTAIM i go pinis, mipela i kisim wanpela pas i kam long wanpela man em i stap long wanpela kantri long Afrika, em gavman long dispela hap i tambuim wok bilong ol Witnes Bilong Jehova. Dispela man i raitim pas olsem:
“Gude Pren,
“Mi raitim dispela pas bilong toksave long yupela olsem gavman bilong mipela long hia em i pasim wok bilong yupela. Mi no amamas tru long dispela samting ol i mekim!
“Nau mi save kisim nius Kirap! bilong mi wan wan taim tasol. Tasol mi laik tokim yupela olsem Kirap! i winim tru olgeta narapela nius mi bin kaunim. Dispela nius i save helpim ol man long lukautim gut ol yet long pasin i stret, na long bihainim ol lo bilong gavman na long ol samting bilong spirit. Nius Kirap! em gutpela samting tru.
“Ol samting i stap insait long dispela nius i winim tru save na pasin bilong ol tisa long yunivesiti long lainim ol sumatin. Na em i winim tru save bilong ol pasto bilong mipela tu. Tasol gavman bilong mipela i tambuim ol man long kaunim ol dispela kain magasin i gat planti gutpela save long helpim man. Bilong wanem gavman i mekim olsem? Long wanem, ol man i raitim dispela nius ol i no save salut long plak. Orait, em laik bilong gavman.
“Tasol mi laik mekim dispela askim: Sapos wanpela man i salut long plak, na bihain em i stilim mani bilong kantri, na kisim winmani, na painim rot bilong abrusim takis, na kilim man i dai, na mekim ol narapela pasin nogut tu, yu ting yumi inap tok dispela man em i stretpela man? Ol lain ol i kolim ‘Kristen’ long dispela hap ol i wok long mekim olsem. Ol i save salut long plak, na nau ol i karim i go insait long haus lotu na salut long en. Em ol wanem kain Kristen ya! Mi save mi no stretpela o gutpela man olgeta long ai bilong God, tasol mi save dispela pasin ol i mekim i no stret long ai bilong God.
“Yupela ol Witnes i no save salut long plak, na yupela i no save kisim blut, na yupela i no save mekim pati long Krismas na Ista. Na tu, yupela i strong long ol man i no ken mekim pasin raskol, na no ken stilim mani bilong gavman, na no ken kisim grismani, na no ken kilim man i dai. Yupela i no orait long ol man i mekim pasin pamuk samting. Ol Witnes i no save mekim ol dispela pasin nogut.
“Mi beten na mi laik tru bai gavman i rausim tambu na bai lotu bilong yupela i ken mekim wok bilong en long lainim ol man.”