Baibel i Tok Wanem?

Yu Ting Tupela Singel i Ken Slip Wantaim Sapos Narapela i Laikim Narapela?

WANPELA lain i askim ol yangpela long ol i gat wanem tingting long pasin bilong ol yangpela i slip wantaim tasol ol i no marit, na 90 pesen i tok i no gat rong long mekim olsem sapos narapela i laikim narapela. Dispela tingting i kamap ples klia long TV na ol buk na nius, na ol i kamapim olsem i orait long mekim dispela pasin. Planti piksa wokabaut na stori bilong televisen i kamapim olsem em nomol long man na meri i laikim narapela narapela long slip wantaim maski ol i no marit.

Tasol ol man i laik mekim ol samting God i laikim, ol i no save bihainim tingting bilong ol man bilong dispela graun, nogat. Ol i luksave olsem dispela graun i kamapim tingting bilong bos bilong en, em Satan. (1 Jon 5:19) Na tu, ol i save was gut na ol i no larim filings bilong ol i stiaim ol, long wanem, ol i save olsem “bel bilong olgeta man i save tingting oltaim long mekim pasin giaman.” (Jeremaia 17:⁠9) Ol man i gat gutpela tingting ol i save lukluk long Man Bilong Wokim olgeta samting na long tok bilong em long stiaim ol.​—⁠Sindaun 3:​5, 6; 2 Timoti 3:⁠16.

Maritpasin Em Presen i Kam Long God

Jems 1:17 i tok: “Olgeta gutpela samting yumi save kisim na olgeta presen i gutpela tru, em olgeta i save kam long heven.” Pasin bilong slip wantaim insait long marit em i wanpela bilong ol dispela gutpela presen. (Rut 1:9; 1 Korin 7:​2, 7) Long rot bilong maritpasin ol manmeri inap kamapim pikinini, na tu, em i helpim man na meri long pas gut wantaim na kisim amamas long skin na bel. King Solomon bilong bipo i tok: “Yu mas amamas wantaim meri bilong yu em yu bin kisim taim yu yangpela yet.” Na “yu mas amamas oltaim long susu bilong en.”​—⁠Sindaun 5:​18, 19; NW.

Jehova i laik bai ol samting em i givim yumi i mekim yumi stap amamas na i helpim yumi, na dispela i as na em i givim yumi ol gutpela lo na stiatok long bihainim. (Song 19:​7, 8) Jehova em i “skulim yupela na soim yupela long ol stretpela pasin yupela i mas bihainim na bai yupela i stap gut.” (Aisaia 48:17) Olsem wanem? Yu ting Papa bilong yumi long heven​—⁠em Man bilong pasin laikim​—⁠bai pasim yumi long kisim samting i gutpela tru?​—⁠Song 34:10; 37:4; 84:11; 1 Jon 4:⁠8.

Slip Wantaim Paslain Long Marit​—⁠Dispela i No Kamapim Pasin Laikim

Taim man na meri i marit, ol i kamap “wanpela bodi.” Taim man na meri i no marit i slip wantaim, ol i mekim pasin pamuk, ol tu i kamap “wanpela bodi”​—⁠tasol dispela i no klin long ai bilong God.a Na tu, taim man na meri i mekim olsem, dispela i no kamapim pasin laikim. Bilong wanem?​—⁠Mak 10:​7-9; 1 Korin 6:​9, 10, 16.

Pasin pamuk em pasin bilong man na meri i slip nating wantaim bilong amamas tasol. Ol i no gat tingting long marit na stap gut long narapela narapela. Pasin pamuk i save mekim na bel na tingting bilong man i save bagarap, mekim man i sem, kamapim sik, na meri i kamapim nating pikinini. Na bikpela samting moa, dispela pasin i brukim stretpela lo bilong God. Olsem na, taim man o meri i mekim pasin pamuk, dispela i soim olsem em i no tingim tru narapela na i stap bilong em long nau na long bihain tu.

Wanpela Kristen i mekim pasin pamuk em i rongim Kristen brata na sista bilong em. (1 Tesalonaika 4:​3-6) Olsem, sapos wanpela wokman bilong God i slip wantaim narapela i no poroman marit bilong em, dispela i mekim kongrigesen Kristen i kamap doti. (Hibru 12:​15, 16) Na tu, taim wanpela i mekim pasin pamuk em i bagarapim pasin bilong narapela husat em i bin pamuk wantaim long i stap klin long ai bilong God, na sapos narapela i singel, orait dispela samting i mekim na taim em i marit em i no stap klin tru. Em i bagarapim nem bilong famili bilong em yet na bilong narapela husat em i mekim pasin pamuk wantaim. Na tu, ol i givim baksait long God taim ol i brukim ol stretpela lo bilong God na dispela i mekim God i bel hevi. (Song 78:​40, 41) Jehova bai “mekim save” long ol man i mekim ol pasin nogut na i no laik tanim bel. (1 Tesalonaika 4:⁠6) Olsem na Baibel i tokim yumi long i “stap longwe long pasin pamuk.”​—⁠1 Korin 6:⁠18.

Olsem wanem? Yu laikim wanpela na yupela tingting long marit? Orait taim yupela i pren yet i gutpela long kisim pasin bilong bilip tru na rispek long narapela narapela. Tingim: Olsem wanem bai wanpela meri inap bilip long wanpela man husat i no bosim gut skin? Na olsem wanem bai wanpela man i tingim tru na givim biknem long wanpela meri husat i bin sakim lo bilong God bilong inapim laik bilong em yet o bilong amamasim dispela man?

Na tu, ol man i sakim ol gutpela lo bilong God ol bai kisim hevi long pasin ol i mekim. (Galesia 6:⁠7) Baibel i tok: “Man i mekim pasin pamuk, em i mekim nogut long bodi bilong em yet.” (1 Korin 6:18; Sindaun 7:​5-​27) Sapos wanpela man na meri singel i mekim pasin pamuk na ol i tanim bel, na ol i wok strong long pas gut gen wantaim God, na strongim pasin bilong ol long bilip long narapela narapela, ating isi isi bel bilong ol bai i no hevi moa. Tasol maski i olsem, ol hevi bilong sin ol i bin mekim bipo bai i stap yet. Tupela yangpela nau ol i marit pinis, ol i bel hevi tru olsem ol i bin mekim pasin pamuk. Sampela taim dispela man i save tingting long em yet olsem: ‘Ating pasin pamuk mipela i bin mekim paslain long mipela i marit i as bilong ol hevi i kamap insait long marit bilong mipela.’

Man i Laikim Tru Narapela Em i No Save Tingim Em Yet

Taim narapela i laikim tru narapela ol bai i gat laik long pas gut wantaim, tasol ol i no ‘hambak na bikhet nabaut’ o “tingting tumas” long ol yet, nogat. (1 Korin 13:​4, 5) Ol bai tingim narapela na mekim ol samting bilong amamasim em. Dispela kain pasin laikim i save kirapim man na meri long givim biknem long narapela narapela, na ol i mekim maritpasin tasol long taim ol i marit pinis, olsem God i makim.​—⁠Hibru 13:⁠4.

Pasin bilong bilip na stap gut long poroman insait long marit i save mekim famili i stap amamas. Dispela ol pasin i bikpela samting taim ol pikinini i kamap, long wanem, ol pikinini i mas kamap bikpela insait long famili i gat pasin laikim, na papamama i lukautim ol gut. (Efesus 6:​1-4) Insait long marit tasol man na meri i tok promis tru tru long i stap gut long narapela narapela. Long bel na planti taim long toktok bilong ol, ol i kamapim olsem ol bai lukautim na sapotim narapela narapela long gutpela taim na taim nogut long laip olgeta bilong ol.​—⁠Rom 7:​2, 3.

Taim man na meri marit i slip wantaim dispela i strongim marit bilong ol. Insait long marit i gat amamas long en, tupela marit i kisim bikpela amamas long maritpasin​—⁠dispela i no bagarapim marit bilong ol, na bel bilong ol i no gat tok, na ol i no sakim tok bilong Man Bilong Wokim ol.

YU LAIK SAVE?

◼ Wanem tingting bilong God long mekim maritpasin paslain long marit?​—⁠1 Korin 6:​9, 10.

◼ Bilong wanem pasin pamuk em inap bagarapim man?​—⁠1 Korin 6:​18.

◼ Olsem wanem man na meri i gat laik long narapela narapela i ken soim olsem narapela i laikim tru narapela?​—⁠1 Korin 13:​4, 5.

[Futnot]