Man na Meri Singel i Mekim Maritpasin

I gat rong long man na meri singel i mekim maritpasin?

“Laik bilong God i olsem, . . . yupela i mas sakim pasin pamuk.”—1 Tesalonaika 4:3.

TOK OL MAN I MEKIM

Long sampela ples, ol man i orait tasol long man na meri i bikpela pinis na i no marit long mekim maritpasin. Long sampela narapela ples, ol man i orait long ol tineja long holim skin na kis samting.

TOK BAIBEL I MEKIM

Long Baibel dispela tok “pasin pamuk” i makim ol pasin sem em man i mekim taim em i no marit yet. God i laik bai ol man i lotuim em ol i mas “sakim pasin pamuk.” (1 Tesalonaika 4:3) Pasin pamuk em i wanpela bikpela rong wankain olsem pasin adaltri, wok bilong ol spirit nogut, lotuim ol imis, kilim man i dai, na stilim samting.—1 Korin 6:9, 10; Revelesen 21:8.

AS NA EM I BIKPELA SAMTING

Wanpela as em olsem, Baibel i givim tok lukaut olsem “God bai kotim ol man i mekim pasin pamuk.” (Hibru 13:4) Bikpela samting moa, taim yumi bihainim ol lo bilong Jehova long sait bilong maritpasin, yumi kamapim klia olsem yumi laikim God Jehova. (1 Jon 5:3) Em i save blesim ol man i bihainim ol lo bilong em.—Aisaia 48:18.

I gat rong long ol man na meri i no marit stret long mekim olkain maritpasin?

“Yupela i no ken larim toktok bilong pasin pamuk na olgeta kain pasin i no klin na gridi pasin i kamap namel long yupela.”—Efesus 5:3.

TOK OL MAN I MEKIM

Planti man i ting olsem i orait long man na meri i no marit long mekim maritpasin, na i no gat rong tu long ol i holim skin o kis samting.

TOK BAIBEL I MEKIM

Taim Baibel i stori long olkain pasin sem samting, em i kolim pasin pamuk na kolim tu “ol pasin i no klin” na “pasin bikhet na i no sem.” (2 Korin 12:21) I klia tru olsem i gat sampela pasin em God i nolaik tru long man na meri i mekim taim ol i no marit yet, maski ol i no mekim maritpasin.

Bikpela tok Baibel i laik kamapim i olsem, maritpasin na ol narapela pasin olsem em bilong ol man na meri i marit tasol. Na tu, Baibel i tambuim “pasin bilong bel i kirap tru long slip wantaim narapela.” (1 Tesalonaika 4:5) Dispela i makim wanem samting? Skelim dispela eksampel we bai i stret long man na meri wantaim: Ating wanpela meri i tingting strong long em i no ken mekim maritpasin wantaim boipren bilong em. Tasol em i mekim ol narapela pasin olsem holim skin na kis samting wantaim boipren bilong em. Taim tupela i mekim olsem, tupela i mangal long samting i no bilong tupela. Tupela i gat asua long “pasin bilong bel i kirap tru long slip wantaim narapela.” Baibel i tambuim kain pasin bilong bel i kirap.—Efesus 5:3-5.

Olsem wanem yu inap sakim pasin pamuk?

“Yupela i mas ranawe long pasin pamuk.”—1 Korin 6:18.

AS NA EM I BIKPELA SAMTING

Baibel i tok ol man na meri singel husat i mekim maritpasin inap lusim pasin bilong ol long pas gut wantaim God.—Kolosi 3:5, 6.

TOK BAIBEL I MEKIM

Baibel i tok long ol man i mas “ranawe long pasin pamuk.” (1 Korin 6:18) Dispela i makim olsem man o meri i mas stap longwe tru long ol samting we inap pulim em long mekim pasin pamuk. (Sindaun 22:3) Olsem, bilong bihainim yet stretpela pasin, em i bikpela samting long sakim pasin bilong bung wantaim ol man i no save bihainim ol stiatok bilong God long sait bilong maritpasin. Baibel i tok lukaut olsem: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.”—Sindaun 13:20.

Sapos man i pulapim tingting bilong em long olkain tingting doti, dispela inap kirapim em long mekim pasin pamuk. (Rom 8:5, 6) Olsem na em i savepasin long abrusim pasin bilong harim ol musik, lukim ol vidio, ritim ol buk na magasin, na ol narapela samting we i soim olkain pasin sem samting em God i heitim tru.—Song 101:3.