Lotu Kristen Tru i Wok Long Kamap Strong Moa
WOK bilong Jisas Krais long autim tok i olsem samting i kamap wantu tasol wantaim bikpela strong. Ol tok em i autim i kirapim tru ol man, na givim save na tingting long ol, na ol i kirap nogut long tok bilong em. Planti man i harim tok bilong em ol i pilim tru long bel bilong ol.—Matyu 7:28, 29.
Jisas i gat strongpela bel na em i no insait long ol pasin bilong lotu na wok politik, em ol i save daunim tru ol man. Pasin bilong em i mekim na ol man nating i no pret long kam long em. (Matyu 11:25-30) Em i tokaut klia long strong bilong ol spirit nogut, em ol i save grisim na paulim ol man, na em i kamapim klia strong God i givim em long daunim ol dispela spirit nogut. (Matyu 4:2-11, 24; Jon 14:30) Jisas i kamapim long ples klia olsem sin i as bilong ol pen na hevi, na long pasin sori em i soim ol man olsem Kingdom Bilong God bai pinisim tru ol dispela hevi. (Mak 2:1-12; Luk 11:2, 17-23) Em i rausim tudak i bin pasim tingting bilong ol man na ol i no inap save long ol pasin tru tru bilong Papa bilong em, na em i kamapim nem bilong God long ol man i laik kisim pasin bilong pas gut wantaim Em.—Jon 17:6, 26.
Olsem na maski ol lain bilong lotu na politik i mekim nogut tru long ol disaipel bilong Jisas, hariap tru ol i bringim dispela strongpela tok bilong em long planti lain. Insait long 30 yia tasol, ol i kamapim ol strongpela kongrigesen Kristen long Afrika, Esia, na Yurop. (Kolosi 1:23) Ol tok i tru Jisas i skulim ol man long en i no hatwok long kisim, na ol dispela tok i tru i givim save long ol man i gat pasin daun na stretpela bel em ol i stap long olgeta hap em Rom i bosim.—Efesus 1:17, 18.
Tasol ol dispela nupela disaipel ol i gat kain kain sindaun na tok ples, na ol pasin na tingting bilong ples, na ol kain kain lotu, na olsem wanem ol inap pas gut wantaim na i stap wanbel tru insait long “wanpela pasin bilong bilip,” olsem aposel Pol i kolim? (Efesus 4:5) Wanem samting bai helpim ol na ol inap ‘wanbel long ol toktok ol i mekim’ na bai ol i no ken bruk nabaut? (1 Korin 1:10) Yumi lukim ol lain i tok ol i Kristen long nau, em ol i no stap wanbel liklik, olsem na yumi mas skelim ol tok Jisas yet i bin skulim ol man long en.
As Bilong Pasin Wanbel Bilong Ol Kristen
Taim Jisas i sanap long kot long ai bilong Pontius Pailat, em i kamapim as bilong pasin wanbel bilong ol Kristen. Em i tok: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim. Na olgeta man i bihainim tok tru, ol i save harim tok bilong mi.” (Jon 18:37) Olsem na pasin bilong kisim ol tok bilong Jisas wantaim ol narapela tok i stap long Baibel, em spirit bilong God i bin kamapim, dispela i gat strong long mekim ol disaipel tru bilong Krais ol i stap wanbel.—1 Korin 4:6; 2 Timoti 3:16, 17.
Tru, sampela taim bai i gat sampela tok ol disaipel bilong Jisas i no klia gut long en, o ol i no wanbel long sampela samting. Orait wanem samting i ken helpim ol? Jisas i tokim ol: “Taim Spirit bilong tok tru i kam, em bai i stiaim tingting bilong yupela na bai yupela i save long olgeta tok i tru. Em bai i no mekim tok long tingting bilong em yet. Nogat. Tok em i harim, dispela tasol bai em i autim. Na bai em i tokim yupela long ol samting i laik kamap bihain.” (Jon 16:12, 13) Olsem na holi spirit bilong God bai inapim ol disaipel tru bilong Jisas long save gut long tok i tru, taim God i wok isi isi long kamapim klia long ol. Na tu, dispela spirit bai kamapim gutpela kaikai, olsem laikim tru ol arapela, amamas, na bel isi, na dispela bai kamapim pasin wanbel namel long ol.—Aposel 15:28; Galesia 5:22, 23.
Jisas i no orait long ol disaipel bilong em i tok pait na bagarapim pasin wanbel o brukim lain, na em i no givim wok long ol long senisim mining bilong ol tok i tru bilong Baibel na bai i stret wantaim ol pasin na tingting o lotu bilong ol man ol i autim tok long ol, nogat. Long laspela nait em i stap wantaim ol disaipel, em i beten strong olsem: “Mi no beten bilong helpim ol dispela man tasol. Nogat. Mi beten bilong helpim ol manmeri bai i harim tok bilong ol na i bilip long mi. Mi laik bai dispela olgeta man i ken i stap wanbel, olsem yu Papa, yu stap long mi na mi stap long yu. Olsem tasol mi laik bai ol i ken i stap long mitupela, na bai ol manmeri bilong graun i ken bilip olsem yu bin salim mi na mi kam.” (Jon 17:20, 21) Olsem na pasin wanbel tru, long spirit na long tok i tru, em i mas i stap olsem wanpela bikpela mak bilong ol disaipel bilong Krais, kirap long taim lotu Kristen i kamap nupela na i kam inap long taim bilong yumi. (Jon 4:23, 24) Tasol ol lotu bilong nau ol i no stap wanbel; ol i bruk nabaut. Bilong wanem i olsem?
Bilong Wanem Ol Misin i Bruk?
As tru na i gat ol kain kain bilip na pasin namel long ol lain i tok ol i Kristen long nau, em ol i no bin holim strong ol tok bilong Jisas. Wanpela man bilong raitim buk i tok: “Olsem long bipo, ol nupela Kristen bilong nau ol i save kisim wanem wanem tok bilong Baibel ol i laikim—na ol i givim baksait long ol tok bilong Baibel i no stret wantaim ol bilip bilong ol tumbuna bilong ol.” Em dispela samting tasol Jisas wantaim ol aposel bilong em i bin tok bai kamap.
Olsem: Holi spirit i stiaim aposel Pol na em i raitim pas long Timoti, em tu i wanpela wasman: “Harim. Bihain ol man bai i no laik harim moa ol stretpela tok. Nogat. Yau bilong ol bai i skrap long harim ol narakain narakain tok, na ol bai i kisim planti man bilong skulim ol long kain tok ol i save laik long harim. Olsem na ol bai i givim baksait long tok tru na putim yau long ol kain kain stori nating.” Olsem wanem? Ol bai paulim olgeta Kristen? Nogat. Pol i tok moa: “Tasol yu yet yu mas tingting klia oltaim. Yu mas karim ol hevi na pen. Yu mas mekim wok bilong autim gutnius long ol manmeri. Yu gat wok bilong helpim ol manmeri, na yu mas mekim tru dispela wok.” (2 Timoti 4:3-5; Luk 21:8; Aposel 20:29, 30; 2 Pita 2:1-3) Timoti wantaim ol narapela Kristen i stap gut long God, ol i bihainim dispela tok.
Ol Kristen Tru i Stap Wanbel Yet
Olsem Timoti, ol Kristen tru long nau i save tingting gut na sakim ol tingting bilong ol man, na ol i kisim ol tok bilong Baibel tasol olsem as bilong ol bilip bilong ol. (Kolosi 2:8; 1 Jon 4:1) Ol Witnes Bilong Jehova i bihainim pasin bilong ol Kristen long taim bilong ol aposel na ol i save mekim wok bilong autim tok long 230 kantri samting, na ol i bringim tok bilong Jisas, em gutnius bilong Kingdom, long ol manmeri bilong olgeta hap. Yumi ken tingim fopela bikpela rot ol i save wanbel long bihainim pasin Kristen tru olsem Jisas i bin mekim, maski ol i stap we.
Baibel i as bilong ol bilip bilong ol. (Jon 17:17) Wanpela pris long Beljam i stori long ol Witnes olsem: “Wanpela samting ol [Witnes Bilong Jehova] i ken skulim yumi long en em pasin bilong ol long amamas long harim Tok Bilong God na ol i no pret long autim tok bilong Baibel.”
Ol i wetim Kingdom Bilong God i stretim ol hevi bilong graun. (Luk 8:1) Long Barranquilla, Kolambia, wanpela Witnes i bin toktok wantaim Antonio, em strongpela sapota bilong wanpela lain politik. Witnes i no mekim wanpela tok i helpim dispela lain, na em i no tok olsem narapela lain politik i gutpela, nogat. Em i tok em i laik stadi long Baibel wantaim Antonio na ol susa bilong em na i no gat pe. I no longtaim na Antonio i save, Kingdom Bilong God tasol inap helpim tru ol rabisman long Kolambia na long ol narapela hap bilong graun.
Ol i save litimapim nem bilong God. (Matyu 6:9) Maria em i wanpela Katolik na em i sindaun long Australia. Taim ol Witnes Bilong Jehova i bungim em long namba wan taim, em i larim ol Witnes i soim em nem bilong God long Baibel. Taim em i lukim, em i mekim wanem? Em i tok: “Taim mi lukim nem bilong God long Baibel long namba wan taim, mi krai. Bel bilong mi i kirap tru taim mi kisim save olsem mi inap save tru long God na kolim nem bilong em.” Maria i wok long stadi long Baibel, na nau long namba wan taim long laip bilong em, em i save gut long ol pasin bilong Jehova na em inap mekim ol samting bilong pas gut wantaim Em.
Pasin laikim i mekim ol i stap wanbel. (Jon 13:34, 35) Nius The Ladysmith-Chemainus Chronicle bilong Kanada i tok: “Maski yu gat wanem bilip bilong lotu, o yu no gat lotu, yu mas tok amamas long ol 4,500 Witnes Bilong Jehova ol i wok long san na long nait insait long tupela wik i go pinis na ol i wokim wanpela Haus Kibung long Cassidy, bikpela bilong en inap 2,300 skwe mita, . . . Ol i mekim dispela wok long pasin amamas, na i no gat kros o tok pait o bel nogut, na i no gat wanpela i laik kisim biknem long dispela wok, na dispela em i wanpela mak bilong lotu Kristen tru.”
Orait tingim ol dispela samting: Ol tisa bilong ol lotu bilong Kristendom, na ol misineri na ol lain i save go long lotu, ol i tingting planti long ol tok pait na hevi i kamap insait long misin bilong ol, tasol lotu Kristen tru i wok long kamap strong moa long olgeta hap bilong graun. Tru tumas, ol Kristen tru i wok long mekim ol wok bilong ol long autim tok bilong Baibel na skulim ol man long en. (Matyu 24:14; 28:19, 20) Sapos yu wanpela bilong ol man i “bel nogut na i wari” long ol pasin nogut tru nau i wok long kamap na yu tingting planti long pasin i stap namel long ol lotu bilong Kristendom, em ol i no stap wanbel, mipela laik singautim yu long kam bung wantaim ol Witnes Bilong Jehova na stap wanbel wantaim ol Kristen long lotuim Jehova, em wanpela tasol i God tru.—Esekiel 9:4; Aisaia 2:2-4.