Yu Ting Pasin Bilong No Insait Long Wok Politik i Pasim Kristen Long Kamapim Pasin Laikim?
BILONG i stap Kristen, man i no ken ritim Baibel, beten, mekim ol singsing long Sande na em tasol, nogat. Em i mas mekim sampela wok—em i mas mekim wok bilong God na helpim ol arapela. Baibel i tok: “Yumi no ken laikim ol brata long tok tasol o long maus tasol. Nogat. Yumi mas givim bel bilong yumi tru long ol na mekim gutpela pasin long ol.” (1 Jon 3:18) Jisas i save tingim tru ol narapela, na ol Kristen i gat laik long bihainim pasin bilong em. Aposel Pol i tokim ol wanbilip, oltaim ol i “mas wok strong long mekim wok bilong Bikpela.” (1 Korin 15:58) Tasol wanem dispela wok bilong Bikpela? Yu ting dispela i makim wok bilong traim long senisim lo bilong gavman bilong helpim ol rabisman na ol man ol narapela i daunim ol? Em wok Jisas i bin mekim?
Maski ol man i strong long Jisas i mas insait long wok politik o sapotim wanpela sait tasol, em i no mekim. Em i sakim namba Satan i laik givim long em long bosim olgeta kingdom bilong graun, em i no larim ol narapela i pulim em i go insait long tok pait bilong baim takis, na em i ranawe taim wanpela lain i laik givim wok king long em. (Matyu 4:8-10; 22:17-21; Jon 6:15) Tru, em i no insait long ol samting bilong politik, tasol dispela i no pasim em long mekim wok bilong helpim ol narapela, nogat.
Jisas i wok strong long mekim ol samting i bilong helpim ol man inap oltaim. Taim em i givim kaikai long 5,000 manmeri na oraitim ol sikman, dispela i helpim sampela inap sotpela taim tasol, tasol ol tok em i autim i opim rot bilong olgeta manmeri i ken kisim ol gutpela blesing bilong i stap oltaim. Jisas i no kisim nem olsem man bilong givim kaikai samting, nogat, em i kisim nem olsem “Tisa.” (Matyu 26:18; Mak 5:35; Jon 11:28) Em i tok: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.”—Jon 18:37.
Autim Tok Long Samting i Gutpela Moa
Tok tru Jisas i autim i no samting bilong politik. Em i autim tok tru bilong Kingdom em bai kamap King bilong en. (Luk 4:43) Dispela Kingdom em wanpela gavman long heven, na em bai senisim olgeta gavman bilong man na kamapim gutaim tru i stap oltaim. (Aisaia 9:6, 7; 11:9; Daniel 2:44) Olsem na Kingdom tasol bai helpim tru ol manmeri. Taim Kristen i autim tok bilong dispela Kingdom, dispela i soim olsem em i laikim tru ol narapela, winim wok bilong kirapim ol man long bilip long ol man bilong graun long kamapim gutaim. Baibel i tok: “Ol king na ol man bilong graun i no inap kisim bek yu. Olsem na nogut yu bilip long ol. Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim. Sapos wanpela man i bilip long God bilong Jekop bai em i helpim em, na sapos dispela man i pas wantaim God, Bikpela bilong em, orait em i ken amamas.” (Song 146:3-5) Olsem na Jisas i no salim ol disaipel bilong em i go tokaut long rot bilong stretim gut wok gavman, nogat; em i lainim ol long autim “gutnius bilong kingdom.”—Matyu 10:6, 7; 24:14.
Em nau, dispela em “wok bilong Bikpela” ol Kristen i mas mekim. Ol man i stap aninit long Kingdom Bilong God ol i mas laikim tru ol narapela, olsem na Kingdom bai pinisim tru pasin bilong i stap rabis long rot bilong givim kaikai samting long olgeta manmeri. (Song 72:8, 12, 13) Dispela tok em gutnius na i gutpela long yumi autim.
Long nau, ol Witnes Bilong Jehova i save mekim dispela “wok bilong Bikpela” long 235 kantri. Olsem Jisas i tok, ol i soim rispek long olgeta gavman. (Matyu 22:21) Tasol ol i bihainim tu dispela tok Jisas i givim ol disaipel: “Yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun.”—Jon 15:19.
Sampela em bipo ol i helpim wok politik ol i no mekim moa bihain long ol i stadi gut long Baibel. Wanpela man bilong politik long Itali em pastaim em wanpela memba bilong Catholic Action, em wanpela oganaisesen bilong lotu Katolik, em i tok: “Mi bin go insait long wok politik, long wanem, mi laik mekim wok bilong helpim sindaun bilong ol man.” Taim em i lusim pinis wok em i holim olsem bikman bilong taun bambai em i ken autim tok bilong Kingdom Bilong God olsem wanpela Witnes Bilong Jehova, em i stori long olsem wanem ol wok em ol man i gat gutpela bel i mekim long wok politik i no save kamap gutpela. Em i tok: “Ol man i gat gutpela bel i bin wok long stretim ol hevi na helpim ol man, tasol ol i no inap, long wanem, planti manmeri tumas i mekim pasin nogut.”
Ol trupela Kristen i no save insait long wok politik, long wanem, ol i laik autim tok bilong Kingdom, tasol dispela i no pasim ol long mekim wok bilong helpim ol arapela, nogat. Ol man ol i helpim long kamap man i stap aninit long Kingdom Bilong God ol i lain long stretim ol tingting nogut bilong ol, ol i rispek long ol man i gat wok long bosim ol, sindaun bilong famili bilong ol i kamap gutpela moa, na ol i kisim stretpela tingting long mani samting. Na samting i bikpela moa, ol Witnes Bilong Jehova i save helpim ol man long kam klostu long God.
Ol man bilong autim tok bilong Kingdom Bilong God ol i helpim komiuniti. Tasol bikpela samting moa, ol i stiaim ol man long bilip long wanpela gavman bilong kamapim gutaim tru long olgeta manmeri i laikim God, na dispela gutaim bai stap oltaim. Ol dispela Kristen i no insait long ol samting bilong politik, olsem na ol i stap fri long helpim ol narapela long kisim gutpela helpim i bilong i stap oltaim.
[Blok/Piksa long pes 7]
Em i Lusim Wok Politik na Kirap Autim Tok Bilong Kingdom
Taim Átila i mangi, ol pris long Belém, Brasil, i tokim em long liberation theology. Em i amamas long harim stori olsem bihain bai i no gat pasin bilong daunim narapela, na em i joinim wanpela lain i lainim em long kamapim ol mats na kempein i kirapim ol man long bikhet long gavman.
Tasol Átila i amamas tu long lainim ol pikinini bilong dispela lain—em i yusim wanpela buk em i bin kisim, Harim Tok Bilong Bikpela Tisa.a Buk i lainim ol man long mekim stretpela pasin na bihainim tok bilong gavman. Dispela i kirapim Átila long tingting planti long as na lain i sapotim liberation theology ol i no bihainim ol gutpela tok bilong Jisas na sampela i no tingim moa ol man i stap rabis taim ol i kisim namba long bosim ol man. Em i lusim dispela lain. Bihain, ol Witnes Bilong Jehova i kam long haus na toktok wantaim em long Kingdom Bilong God. I no longtaim na em i kirap stadi long Baibel na lain long rot tru bilong stretim hevi bilong ol man.
Taim em i wok long stadi long Baibel, Átila i go long wanpela bung bilong lotu Katolik i stori long lotu na politik. Tisa i tok: “Lotu na politik i narapela narapela rot bilong stretim wankain hevi.” Em i go tu long wanpela miting long Haus Kingdom. Em i lukim sampela samting i narapela kain tru! Wanpela samting i olsem: No gat man i smok, o dring, o mekim tok pilai nogut. Em i laik joinim ol Witnes Bilong Jehova long wok autim tok bilong ol, na i no longtaim na em i kisim baptais. Nau em i save pinis long as na liberation theology i no rot tru bilong stretim ol hevi bilong ol rabisman.
[Futnot]
a Ol Witnes Bilong Jehova i wokim.
[Ol Piksa long pes 6]
Ol Kristen i no save insait long wok politik, tasol dispela i no pasim ol long helpim ol arapela