Yu Ting Yu Mas Insait Long Wanpela Lotu?
‘MI NO ting mi mas insait long wanpela lotu o go long lotu long olgeta taim bambai mi ken bilip long God!’ Em tingting bilong planti man long pasin bilong insait long wanpela lotu o long wanpela lain bilong lotu. Na sampela i tok, ol i pilim olsem ol i stap klostu moa long God taim ol i stap ausait na lukim ol gutpela diwai na maunten samting, winim long taim ol i go long lotu. Long nau planti manmeri ol i ting, yumi inap bilip long God maski yumi no insait long wanpela lain bilong lotu.
Tasol sampela i gat narapela kain tingting. Ol i bilip olsem yumi mas insait long wanpela lotu na go oltaim long lotu bambai God i ken orait long yumi, dispela em i bikpela samting. Olsem na dispela tok olsem yumi mas insait long wanpela lotu o nogat, em i no wanpela liklik samting ol lain bilong skelim tingting bilong man ol i laik save long en, nogat. Em i insait long pasin bilong yumi long pas gut wantaim God, olsem na yumi mas kisim tingting bilong God long dispela samting, a? Orait Tok Bilong God, em Baibel, em inap givim wanem save long yumi long dispela tok?
Samting Bipo God i Bin Mekim Long Ol Man
Klostu 4,400 yia i go pinis, wanpela bikpela tait wara i bin kamap na i karamapim olgeta hap bilong graun. Kain bikpela bagarap olsem, ol man i no inap lusim tingting kwik long en, na ol lain bilong olgeta hap ol i gat ol stori tumbuna long dispela samting i bin kamap. Tru, sampela samting long ol dispela stori i narapela narapela kain, tasol planti samting long stori bilong ol i wankain tasol, em wanpela i olsem, i gat wan wan manmeri tasol wantaim sampela animal ol i bin abrusim bagarap.
Olsem wanem? Ol manmeri i bin winim Bikpela Tait na i stap laip, ol i abrusim nating bagarap? Stori bilong Baibel i no soim yumi olsem, nogat. Na bikpela samting, em God i no bin toksave long olgeta wan wan man olsem Bikpela Tait bai kamap. Em i tokim Noa, na Noa yet i givim tok lukaut long ol man long Bikpela Tait i laik kamap.—Stat 6:13-16; 2 Pita 2:5.
Bilong abrusim bagarap, man i mas insait long dispela liklik lain i pas gut wantaim na em i mas i gat laik long bihainim ol tok God i givim long Noa. Na ol animal i stap insait long sip i abrusim bagarap, long wanem, ol i bin stap wantaim dispela lain. God i tokim Noa long olgeta samting em i mas mekim na bai sampela animal i ken abrusim bagarap.—Stat 6:17–7:8.
Sampela handet yia bihain, ol tumbuna pikinini bilong Noa i bin kamap long lain bilong pikinini bilong em Siem, ol i stap olsem wokboi nating long Isip. Tasol God i tingting pinis long lusim ol long dispela kalabus na bringim ol i go long graun em i bin tok promis long givim long tumbuna bilong ol, Abraham. Long dispela taim tu, God i no tokaut long olgeta wan wan man long dispela samting, nogat; em i kamapim pastaim long ol man em i makim bilong i stap lida bilong ol—em Moses wantaim brata bilong em, Aron. (Kisim Bek 3:7-10; 4:27-31) Taim God i kisim bek dispela lain wokboi nating long Isip, em i givim Lo long ol long maunten Sainai na mekim ol i kamap lain Israel.—Kisim Bek 19:1-6.
I gat wanpela rot tasol bilong God i ken kisim bek ol wan wan Israel—ol i mas bung wantaim wanpela lain God i bin kamapim na bihainim tok bilong ol man God i bin makim olsem lida bilong ol. Rot i op na ol wan wan Isip tu i ken bung wantaim dispela lain—em i klia tru olsem God i orait long en. Taim ol Israel i lusim Isip, ol dispela manmeri i go wantaim ol, na long dispela rot ol inap kisim ol gutpela blesing bilong God.—Kisim Bek 12:37, 38.
Orait bihain, taim Jisas i kamap long graun na i kirapim wok bilong em long autim tok, em i bungim sampela manmeri bilong kamap disaipel bilong em. Ol skul na ol tok bilong em, em i givim long dispela lain olgeta, na i no long ol wan wan bilong ol. Tasol sampela taim em i givim gutpela tok long wan wan em ol i mas kisim sampela helpim long em. Jisas i tokim 11-pela aposel i stap gut long em, olsem: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela.” (Luk 22:28, 29) Bihain, holi spirit bilong God i kam daun long ol disaipel taim ol i bung wantaim olsem wanpela lain.—Aposel 2:1-4.
Stori bilong ol dispela lain i kamapim klia olsem, long bipo olgeta taim God i mekim ol samting na givim tok long ol manmeri bilong em i bung gut olsem wanpela lain. I gat wan wan man em God i bin givim stret tok bilong em long ol—em Noa, Moses, Jisas, na sampela moa—em i bin mekim wok long ol bilong givim tok bilong em long wanpela lain ol i pas gut wantaim. I no gat as na yumi ken ting God i mekim narapela kain pasin long ol wokman bilong em long nau, nogat. Tasol dispela i kamapim narapela askim, olsem: Yumi ken mekim nating tasol na bung wantaim wanpela lain, maski em i wanem lain? Bai yumi skelim dispela bikpela askim long stori i kamap bihain long dispela.
[Piksa long pes 4]
Bipo God i mekim ol samting na givim tok long ol manmeri bilong em i bung gut olsem wanpela lain