Yu Mas Makim Wanem Lotu Bilong Bihainim?
‘OL NARAPELA narapela lotu i olsem ol narapela narapela rot bilong bringim yumi i go long wanpela ples tasol yumi laik go long en. Yumi save, i gat wanpela God tasol i stap, a?’ Planti ol i gat dispela kain tingting—ol i ting, tru yumi mas insait long wanpela lotu, tasol wanem wanem lotu yumi bihainim, dispela i no bikpela samting.
Ating pastaim bai yumi ting dispela tok i stret, long wanem, i gat wanpela God tasol i stap, em God i Gat Olgeta Strong. (Aisaia 44:6; Jon 17:3; 1 Korin 8:5, 6) Tasol i gat sampela samting i narapela narapela kain—na sampela tok i pait wantaim—namel long ol planti lain bilong lotu ol i tok ol i mekim wok bilong God. Ol i narapela narapela kain tru long pasin bilong ol, bilip bilong ol, tok bilong ol, na ol lo bilong ol. Olsem na ol lain bilong wanpela lotu i hatwok long kisimgut o bilip long ol tok o bilip bilong ol narapela lotu.
Tasol Jisas i tok: “God em i Spirit. Na ol man i lotu long em, ol i mas lotu long strong bilong Holi Spirit na long pasin [“tok,” NW ] i tru.” (Jon 4:24) Orait, bilong lotuim God long tok i tru, yu ting ol lotu i ken holim ol kain kain tingting long God em i husat, na ol samting em i tingting pinis long mekim, na em i laik bai yumi lotuim em olsem wanem, na ol dispela tingting i pait wantaim? Yu ting yumi ken bilip olsem God i Gat Olgeta Strong i ting i no bikpela samting long yumi lotuim em olsem wanem?
Ol Kristen Tru Long Bipo na Long Nau
Sampela taim ol Kristen long taim bilong ol aposel ol i gat narapela narapela tingting long ol samting. Aposel Pol i tok long ol Kristen long Korin: “Ol brata bilong mi, ol lain bilong Kloe ol i bin tokim mi olsem yupela i gat kros i stap namel long yupela. Mi tok long dispela pasin bilong tok pait i stap namel long yupela olgeta. Sampela i save tok, ‘Mi bilong Pol.’ Na sampela i tok, ‘Mi bilong Apolos.’ Na sampela i tok, ‘Mi bilong Pita.’ Na sampela i tok, ‘Mi bilong Krais.’ ”—1 Korin 1:11, 12.
Olsem wanem? Pol i ting ol dispela narapela narapela kain tingting bilong ol i samting nating tasol? Yu ting ol wan wan i bihainim rot em yet i bin makim bilong kisim laip oltaim? Nogat tru! Pol i tokim ol: “Ol brata, long nem bilong Bikpela bilong yumi Jisas Krais mi tokaut strong long yupela olsem, yupela olgeta i mas wanbel long ol toktok yupela i mekim. Yupela i no ken bruk nabaut. Yupela i mas i stap wanlain tru long wankain tingting na wankain laik.”—1 Korin 1:10.
Tru, yumi no inap subim ol man long i stap wanbel long bilip. Ol man wan wan i mas skelim gut ol samting pastaim na nau ol i kisim wankain tingting long en. Olsem na ol man i mas stadi long Baibel na ol i mas i gat laik tru long bihainim ol tok ol i lainim bambai ol i ken i stap wanbel long bilip olsem Pol i toktok long en. Olsem wanem? Yumi inap painim wanpela lain olsem, em ol i stap wanbel long bilip? Olsem yumi stori pinis, inap longtaim pinis God i mekim ol samting o givim tok long ol manmeri bilong em olsem wanpela lain. Olsem wanem? Yumi inap luksave long dispela lain long nau?
Bung Wantaim Lain God i Laikim
Devit, man bilong raitim song, em i bin askim olsem: “Bikpela, husat inap i stap long haus bilong yu? Husat inap sindaun long Saion, dispela maunten bilong yu yet?” Dispela askim i kirapim tru tingting bilong yumi, a? Devit yet i bekim na i tok: “Man i bihainim laik bilong God long olgeta samting, na i mekim stretpela pasin oltaim, na i save tok tru oltaim, em bai i stap long haus bilong yu.” (Song 15:1, 2) Sapos man i kisim stretpela save long Baibel, dispela bai helpim em long luksave long wanem lotu i inapim dispela mak God i bin putim. Orait taim man i bung wantaim dispela lain, em bai kisim strong long poroman wantaim ol manmeri i lotuim God long pasin wanbel na long ‘spirit na tok i tru.’
Ol Witnes Bilong Jehova i kamapim klia pinis olsem yumi inap i stap wanbel long bilip na pasin bilong yumi long nau, maski ol lain bilong graun i bruk bruk. Namel long ol Witnes i gat ol manmeri bipo ol i bilong ol kain kain lotu na ol kain kain lain. Na sampela em pastaim ol i bilip olsem yumi no inap save long God, o ol i no bilip olsem God i stap. Na sampela ol i no bin tingting liklik long lotu. Orait sampela man bilong ol dispela kain kain lotu na lain na tingting nau ol i stap wanbel long lotu, em dispela kain pasin wanbel yumi no save lukim long ol lain bilong dispela graun.
Tok Bilong God, em Baibel, i as bilong dispela pasin wanbel. Tru, ol Witnes Bilong Jehova i save ol i no ken strong long ol man na tokim ol long samting ol i mas mekim. Tasol ol i amamas long ol inap kirapim ol man long kisim save long Baibel na bai ol samting bilong lotu ol i tingting long bihainim em i ken stret wantaim ol tok bilong Baibel. Long dispela rot, planti manmeri moa ol inap kisim ol gutpela samting i save kamap long pasin bilong lotuim God ‘long spirit na long tok i tru.’
Long nau i gat planti samting bilong pulim ol man long bihainim ol tingting na pasin i save nogutim man. Olsem na em i bikpela samting long bung wantaim ol lain God i orait long ol. Baibel i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting,” na “sapos yumi poroman wantaim ol man nogut, bai ol i bagarapim gutpela pasin bilong yumi.” (Sindaun 13:20; 1 Korin 15:33) Taim yumi bung wantaim ol manmeri i save lotu tru long God, dispela i save lukautim yumi. Olsem na Baibel i tok: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi . . . no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:24, 25) Em i gutpela samting moa taim ol pren tru, ol brata na sista bilong spirit, i mekim pasin sori na narapela i helpim narapela long mekim ol wok em God i tok long ol i mas mekim!
Ottmar i wanbel long dispela tingting. Em i go bikpela insait long wanpela famili Katolik long Jemani, na bihain em i lusim pasin bilong go long lotu. Em i tok: “Taim mi go long haus lotu na mi lotu pinis na kam ausait, mi pilim yet olsem i stap bilong mi i no gat as bilong en.” Tasol em i bilip yet long God. Orait bihain em i bungim ol Witnes Bilong Jehova na em i kisim strongpela tingting olsem ol i wokman tru bilong God. Em i lukim olsem em i mas bung wantaim ol. Nau em i tok: “Mi mekim wok insait long wanpela oganaisesen i stap long olgeta hap, olsem na tingting na bel bilong mi i stap isi. Oltaim ol i wok long helpim mi long kisim stretpela save moa long Baibel. Dispela em i wanpela gutpela samting tru long mi.”
Singautim Ol Man i Wok Long Painim Lotu i Tru
Ol man i gat wankain tingting na i wok gut wantaim olsem wanpela lain, ol inap mekim bikpela wok moa, winim ol man i stap wanpis na mekim wok. Taim Jisas i laik lusim ol disaipel, em i tokim ol: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Olsem wanem ol inap mekim gut bikpela wok olsem sapos i no gat sampela bilong soim rot long ol o i no gat wanpela oganaisesen? Olsem wanem wanpela man inap bihainim dispela tok bilong Baibel sapos em i laik i stap wanpis na mekim wok bilong God?
Long yia i go pinis ol Witnes Bilong Jehova long olgeta hap ol i tilim 91,933,280 buk na buklet, na 697,603,247 nius em ol i kamapim ol tok bilong Baibel, na long dispela rot planti handet milion manmeri i stap long 235 kantri ol i kisim tok bilong Baibel. Dispela i kamapim klia tru olsem taim ol man i stap wanbel na wok gut olsem wanpela lain ol inap mekim bikpela wok moa, winim ol man i stap wanpis na mekim wok na i no gat man i helpim ol!
Na ol Witnes Bilong Jehova i no save tilim ol buk samting bilong Baibel long ol man na em tasol. Ol i save mekim Baibel stadi long ol man, no gat pe, bilong helpim ol long save gut long ol samting God i laik bai ol i mas mekim. Long yia i go pinis, ol i bin mekim 5,726,509 Baibel stadi long olgeta wik wantaim ol manmeri wan wan o long 2-pela o 3-pela wantaim. Dispela skul ol i kisim long Baibel i bin helpim planti milion manmeri long makim wanem lotu ol i laik bihainim na i stret wantaim tok bilong Baibel. Mipela i laik singautim yu long kisim save long ol samting God i laik bai yumi mas mekim olsem i stap long Baibel. Orait nau yu ken makim wanem lotu bai yu bihainim.—Efesus 4:13; Filipai 1:9; 1 Timoti 6:20; 2 Pita 3:18.
Sapos yu laik mekim ol samting God i laikim, yu mas insait long wanpela lotu—tasol yu no ken go insait nating long wanpela lain bilong lotu, nogat. Taim yu laik makim wanem lotu bai yu insait long en, yu mas i gat stretpela save long ol tok bilong Baibel na i no long ol bilip yu bin kisim o harim na i no gat as bilong en. (Sindaun16:25) Kisim save long ol samting yu mas mekim bilong i stap insait long lotu i tru. Skelim ol dispela samting wantaim ol bilip bilong yu yet. Orait nau yu ken makim wanpela lotu i stret wantaim dispela save yu bin kisim.—Lo 30:19.
[Ol Piksa long pes 7]
Ol Witnes Bilong Jehova i save stap wanbel namel long ol lain bilong dispela graun i bruk bruk