Ripot Long Wok Bilong Kingdom
‘Yu Mas Kam Helpim Mipela’
LONG Julai 2000, wanpela singaut i go long ol Witnes i save tok Jeman i stap long Ostria, Jemani, na Swiselan long i go long Bolivia. Bilong wanem i gat dispela singaut? Long wanem, i gat ol liklik grup bilong lotu Menonait, em ol i mekim tok Jeman, na ol i stap nabaut nabaut long ol fam ausait long Santa Cruz, Bolivia. Sampela i stap klostu long taun, sampela longwe inap 300 kilomita. Na sampela bilong ol i gat laik long save long ol tok bilong Baibel.
Inap olsem 140 Witnes i bihainim dispela singaut na ol i go. Sampela i stap mekim wok inap sampela wik, sampela i mekim wok inap wanpela yia samting. Taim ol i mekim olsem, ol i kamapim pasin wankain olsem ol misineri long taim bilong ol aposel em ol i bin bihainim dispela singaut: ‘Yu mas kam long Masedonia na helpim mipela.’—Aposel 16:9, 10.
Wok autim tok long dispela hap i olsem wanem? Wanpela elda long wanpela kongrigesen long hap i tok: “Bilong i go long wanpela bilong ol 43 ples ol Menonait i stap long en, yu mas lusim olsem etpela aua long ron long 4-wil draiv trak long ol rot nogut. Na bilong i go long ol ples i longwe, winim ol narapela ples, planti taim mipela i lusim fopela de na slip long ol haus sel long sampela nait. Tasol mipela i no hatwok nating, long wanem, i no gat wanpela bilong ol dispela manmeri i bin harim gutnius bipo.”
Pastaim, planti ol Menonait i no amamas long ol Witnes i kam lukim ol. Tasol taim ol Witnes i go bek lukim ol planti taim, dispela i bin helpim ol long luksave long ol samting ol Witnes i go bilong tokim ol long en. Olsem: Wanpela fama i tok em i bin ritim Kirap! inap wanpela yia. Bihain em i tok moa olsem: “Mi save planti manmeri long hia i no amamas long tok yupela i mekim, tasol mi save dispela tok em i tok i tru.” Long narapela hap, wanpela man i tok: “Sampela neiba bilong mi i tok olsem yupela ol profet giaman, sampela narapela i tok yupela i gat tok i tru. Mi yet mi laik painimaut long dispela samting.”
Long nau, i gat wanpela kongrigesen long tok ples Jeman long Bolivia, na i gat 35 pablisa, na 14 bratasista i save autim tok fultaim. I kam inap long nau, 14 bratasista em bipo ol i bilong lain Menonait ol i kamap ol man bilong autim tok bilong Kingdom, na 9-pela moa i save go oltaim long ol miting. Wanpela lapun man em i bin kisim baptais i no longtaim i go pinis i tok: “Mipela i luksave klia olsem Jehova i stiaim dispela wok. Em i bin salim ol brata na sista i gat save na ol i save tok Jeman i kam helpim mipela. Mipela i tenkyu tru.” Pikinini meri bilong dispela man em i gat 17 krismas, em tu i baptais pinis, i tok: “Amamas bilong ol yangpela brata na sista em ol i bin kam hia, i kirapim tru bel bilong mi. Planti bilong ol em ol painia, na ol i lusim taim na mani bilong ol long helpim ol narapela. Dispela i kirapim mi long mekim wankain pasin.”
Tru tumas, ol lain husat i wok strong long i go helpim ol narapela ol i wok long kisim bikpela amamas.