“No Ken Lusim Wok Bilong Autim Tok Long Ol Haus”
Stori bilong Jacob Neufeld
“Maski wanem wanem samting i kamap, no ken lusim wok bilong autim tok long ol haus.” Mi tingim dispela tok taim mi wokabaut i go olsem 5 kilomita bilong kamap long wanpela viles. Taim mi kamap long hap, mi pret long i go long namba wan haus. Mi hatwok tru, olsem na mi go long bus na beten strong long God long strongim bel bilong mi long autim tok. Orait, nau mi inap go long namba wan haus na autim tok.
WANEM samting i mekim na mi go long dispela viles i stap long ples drai bilong Paragwai na mi wanpela i laik autim tok? Mi bai stori long samting i bin kamap paslain long dispela. Mi bon long Novemba 1923 long Kronstalʹ, Yukren. Em wanpela komiuniti bilong lain Menonait bilong Jemani. Long 1780 samting, ol Menonait i bin lusim Jemani na i kam sindaun long Yukren. Gavman bilong Yukren i larim ol i holim yet lotu bilong ol (tasol i tambu long ol i kirapim ol narapela man long joinim lotu bilong ol), ol i gat rait long bosim ol yet insait long komiuniti bilong ol, na gavman i no fosim ol long insait long ami.
Taim Gavman Komiunis i kirap bosim Yukren, ol i tekewe olgeta raits bilong ol Menonait. Long 1928 samting, gavman i kirap bosim ol bikpela fam bilong ol Menonait. Ol i no givim kaikai long ol manmeri inap long ol manmeri i wok bung wantaim gavman, na sapos wanpela man i bikhet long gavman, gavman bai mekim save long em. Namel long 1930 na 1939 samting, lain KGB, em ol polis bilong Soviet Yunion bilong bipo, i save kam long nait na kisim planti man long ples. Olsem na long planti ples wan wan man tasol i stap. Long dispela rot ol i bin kisim papa bilong mi long 1938, taim mi gat 14 krismas, na mi no bin harim sampela stori long em o lukim em gen. Tupela yia bihain, ol i kisim bikbrata bilong mi tu i go.
Long 1941, ami bilong Hitler i kisim Yukren. Dispela i mekim na gavman Komiunis i no bosim mipela moa. Tasol 8-pela famili Juda i save stap long ples bilong mi, wantu ol i no stap moa. Olgeta dispela samting i kamapim planti askim long tingting bilong mi. Bilong wanem ol dispela samting i kamap?
Stretpela Pasin i Helpim Mi Long Abrusim Bagarap
Long 1943, ami bilong Jemani i lusim Yukren na ol i kisim planti famili Jeman na famili bilong mi tu bilong sapotim woa. Long dispela taim, ol i bin singautim mi pinis long joinim ami, na ol i makim mi long wok long lain SS bilong Jemani (Schutzstaffel, em nambawan lain gad bilong Hitler) long Romenia. Long dispela taim wanpela samting i bin kamap long mi, na dispela i mekim bikpela samting long laip bilong mi bihain.
Kepten bilong grup mi stap long en i laik traim mi bilong save mi bai bihainim stretpela pasin o nogat. Em i tokim mi long kisim yunifom bilong em i go long hap bilong klinim ol klos. Em i bin putim sampela mani insait long poket bilong yunifom, na mi bin painim. Taim mi kisim dispela mani i go bek long em, em i tok em i no bin lusim wanpela samting insait long yunifom bilong em. Mi strong olsem mi bin painim dispela mani long poket bilong em. Bihain liklik, mi kisim wok olsem helpim bilong em na mi bosim ol pepa wok, makim wok bilong ol gad, na lukautim mani bilong grup bilong mipela.
Long wanpela nait, ami bilong Rasia i kam holim olgeta long grup bilong mipela, tasol ol i no holim mi; mi bin stap bek long ples wok long pinisim sampela wok bilong kepten. I luk olsem mi wanpela tasol, ol i no bin kisim, long wanem, mi bin mekim stretpela pasin na long dispela as mi kisim dispela wok. Sapos nogat, ol bai holim mi tu.
Long 1944, ol i tok mi bai kisim malolo, tasol ol i no makim wanem taim mi bai stat wok gen. Mi go bek long ples long lukim mama bilong mi. Taim mi wet yet long kisim toksave bilong go bek long wok, mi kamap aprentis bilong wanpela man bilong wokim ol haus brik, na dispela skul mi kisim i helpim mi bihain. Long Epril 1945, ami bilong Amerika i kam insait long taun bilong mipela klostu long Magdeburg. Wanpela mun bihain woa i pinis, na mipela i abrusim bagarap na i stap laip. I luk olsem sindaun bilong mipela long bihain bai kamap gutpela.
Wanpela de long mun Jun, mipela i harim man bilong mekim toksave bilong taun i tok olsem: “Ami bilong Amerika i bin lusim taun asde long nait, na ami bilong Rasia bai kam nau long 11 klok moning.” Mipela i bel hevi, long wanem, mipela i save olsem mipela bai stap gen long hap ol Komiunis i bosim. Wantu, mi wantaim kasen brata bilong mi i wokim plen long ranawe. Long Julai samting, mipela i go insait long hap ol Amerika i bosim. Orait, long Novemba, maski i gat bikpela hatwok tru na mipela inap kisim bikpela hevi, mipela i go bek long hap Rasia i bosim na long pasin hait mipela i kisim famili i go na brukim boda.
“Putim Gut Yau, na Skelim”
Mipela i kam sindaun long hap bipo em Wes Jemani. Sampela taim bihain, mi kisim pasin bilong laikim tru tok bilong Baibel. Long ol Sande, mi save go long bus na ritim Baibel. Tasol samting mi ritim i narapela kain tru, na ol dispela stori i bin kamap long bipo tru. Na tu, mi go long ol klas bilong lotu bilong redi long kisim baptais olsem wanpela Menonait. Mi bin kirap nogut long lukim tok insait long buk bilong lotu, olsem “Papa em i God, Pikinini em i God, na Holi Spirit em i God,” na i gat dispela askim, “I gat 3-pela God i stap?” Na ol i raitim bekim long daunbilo olsem: “Nogat, dispela tripela ol i wanpela tasol.” Mi askim pasto, olsem wanem na dispela i olsem. Em i tok, “Yangpela man, no ken tingting tumas long dispela samting, sampela man i mekim olsem na ol i go longlong.” Long dispela taim stret, mi wokim tingting olsem mi no inap kisim baptais.
Sampela de bihain, mi harim wanpela man i toktok long kasen susa bilong mi. Mi laik save long tok ol i mekim na mi go toktok wantaim ol na tromoi sampela askim. Long dispela taim mi no bin save olsem dispela man em Eric Golatsik, em i bin kalabus long banis kalabus nogut long Wewelsburg. Em i askim mi sapos mi laik kisimgut save long tok bilong Baibel. Taim mi tok yes, em i tokim mi olsem olgeta tok em bai skulim mi long en, em ol tok i stap long Baibel bilong mi yet.
Bihain long Eric i kam lukim mi sampela taim tasol, em i singautim mi long i go long wanpela kibung bilong ol Witnes Bilong Jehova. Mi ting dispela em namba wan kibung ol i bin mekim bihain long woa. Mi laikim tru ol tok mi harim na mi raitim olgeta skripsa ol brata bilong mekim tok i ritim o kolim. I no longtaim na mi luksave olsem man i lainim tok bilong Baibel i gat sampela wok em i mas mekim, olsem na mi lusim stadi. Na tu, mi hatwok long luksave olsem i gat wanpela trupela lotu tasol i stap. Taim Eric i luksave olsem mi wokim tingting pinis long i go bek long olpela lotu bilong mi, em i mekim dispela tok: “Putim gut yau, na skelim.”
Tupela taim tasol mi bin i go lukim ol pasto long lotu bilong mi, na mi luksave olsem ol yet i no save long ol samting ol i tokim ol man long en, na tok i tru i no stap long ol. Mi raitim pas i go long sampela pasto na givim ol askim bilong Baibel long ol. Wanpela i bekim olsem: “Yu no gat rait long painimaut ol tok bilong Baibel, long wanem, yu no bon-agen.”
Mi prenim wanpela yangpela meri, na em i subim mi long mekim wanpela disisen i hatwok long mekim. Em i memba bilong ol bon-agen Menonait. Famili bilong em i save heitim ol Witnes Bilong Jehova, olsem na em i bihainim laik bilong ol na i tokim mi olsem sapos mi no lusim dispela nupela lotu, em bai i no prenim mi moa. Long dispela taim mi kliagut long tok i tru na mi save i gat wanpela samting tasol mi mas mekim—mi no ken prenim em moa.
I no longtaim na Eric i kam bek lukim mi. Em i tok ol i makim taim bilong baptais long wik antap, na em i askim mi sapos mi laik kisim baptais. Nau mi save pinis olsem ol Witnes Bilong Jehova i skulim ol man long tok i tru, na mi laik mekim wok bilong God Jehova. Olsem na mi tok yes na long Me 1948 mi kisim baptais long wanpela rum waswas.
I no longtaim bihain long baptais bilong mi, famili bilong mi i tok long i go sindaun long Paragwai, long Saut Amerika, na Mama i laik tru olsem mi mas i go. Mi gat tupela tingting, long wanem, mi laik stadi moa long Baibel na kisim sampela moa trening. Wanpela taim mi go long brens ofis bilong ol Witnes Bilong Jehova long Wiesbaden, na mi bungim August Peters. Em i kirapim mi long tingim olsem mi gat wok tu long lukautim famili bilong mi. Na tu, em i givim dispela tok long mi: “Maski wanem wanem samting i kamap, no ken lusim wok bilong autim tok long ol haus. Tasol sapos yu lusim, yu bai wankain olsem ol memba bilong ol lotu Kristendom.” I kam inap long nau, mi save olsem dispela tok i bikpela samting, na tu, yumi mas autim tok long “olgeta haus.”—Aposel 20:20, 21.
Wanpela “Profet Giaman” Long Paragwai
I no longtaim bihain long mi bungim August Peters, mi wantaim famili bilong mi i kalap long sip na i go long Saut Amerika. Mipela i go sindaun long Gran Chaco, long Paragwai, na mipela i stap gen insait long komiuniti bilong lain Menonait. Tupela wik bihain long mipela i kam kamap, mi wanpela i go raun autim tok long wanpela ples i stap klostu, olsem mi bin kamapim long kirap bilong dispela stori. Tok i raun hariap olsem i gat wanpela “profet giaman” i kam wantaim ol dispela nupela lain i kam.
Em nau, skul mi bin kisim olsem man bilong wokim haus brik i helpim mi. Ol wan wan famili i bin lusim as ples bilong ol, ol i nidim haus. Mi wokim ol haus long brik em ol i bin tanim wantaim graun na kunai na draim long san, na mi wokim ol rup long kunai. Inap 6-pela mun moa, mi wokim planti haus, na dispela i givim rot long mi long autim tok planti taim. Ol manmeri i mekim gut long mi, tasol taim haus i sanap pinis, ol i amamas long mi go.
Ol sip i bringim sampela moa Menonait refiuji bilong Jemani i kam. Namel long ol i gat wanpela yangpela meri, Katerina Schellenberg, husat i bin bungim ol Witnes inap sotpela taim na wantu em i luksave long tok i tru. Taim em i stap long sip, em i tok olsem em i wanpela Witnes Bilong Jehova maski em i no baptais yet. Long dispela as, ol i tambuim em long i go sindaun long komiuniti bilong ol Jeman. Ol i lusim em wanpis long Asunción, em biktaun bilong Paragwai. Em i kisim wok olsem wanpela hausmeri, na em i lainim tok ples Spen. Em i painim pinis ol Witnes na em i kisim baptais. Long Oktoba 1950, dispela yangpela meri i gat strongpela bel i kamap meri bilong mi. Inap planti yia em i bin stap olsem gutpela sapot na helpim bilong mi long olgeta samting i bin painim mitupela.
Insait long sotpela haptaim, mi bungim inap mani long baim wanpela karis na tupela hos, na mi save mekim wok long en long wok autim tok, na oltaim mi tingim tok bilong Brata Peters. Long dispela taim, liklik susa bilong mi tu i kamap wanpela Witnes na em i joinim mitupela. Planti taim mipela tripela i save kirap long 4 klok bikmoning na raun inap 4-pela aua long kamap long ples bilong autim tok, na autim tok inap 2-pela o 3-pela aua, na bihain go bek long haus.
Mi bin ritim long buk na nius bilong yumi olsem ol i save mekim ol pablik tok, olsem na mi redim wanpela bung bilong mekim pablik tok. Mi no bin go long wanpela miting bilong kongrigesen long Jemani, olsem na mi traim tasol long hau ol i save mekim na mi stori long Kingdom Bilong God. Etpela manmeri i kam long dispela bung, na dispela i mekim na ol pasto bilong Menonait Sios i no amamas. Ol i bungim wanpela grup long i go kisim olgeta buk na nius bilong Baibel em mipela i bin lusim wantaim ol manmeri, na ol i tokim ol olsem ol i no ken tok gude long mipela.
Ol i singautim mi long i go long hetkota bilong dispela komiuniti, na inap sampela aua bikman bilong ol na tupela pasto i bin kam long Kanada, ol i sutim planti askim long mi. Na bihain wanpela bilong ol i tok: “Yangpela man, yu ken bilipim wanem wanem samting yu laikim, tasol yu mas promis olsem yu bai no toktok gen wantaim ol man long ol bilip bilong yu.” Mi no inap mekim dispela kain tok promis. Olsem na ol i tokim mi long lusim dispela komiuniti, long wanem, ol i no laikim wanpela “giaman profet” i stap namel long ol strongpela Menonait. Taim mi no laik mekim olsem, ol i tok ol bai baim trak long kisim olgeta famili bilong mi i go. Tasol mi no senisim tingting, na mi no lusim dispela hap.
Long taim bilong san long 1953, mi go long wanpela kibung long Asunción. Long dispela hap mi toktok wantaim Nathan Knorr, em i stap long hetkota bilong ol Witnes Bilong Jehova long Brooklyn, New York. Em i tokim mi long go sindaun long biktaun na wok wantaim liklik lain misineri long dispela hap, long wanem, wok bilong mipela long autim tok long komiuniti bilong ol Menonait i no karim kaikai.
Putim Kingdom i Stap Namba Wan
Long dispela taim, i gat olsem 35 Witnes long Paragwai. Mi toktok wantaim meri bilong mi, na maski em i no amamas tumas long i go sindaun long biktaun, em i tok em i redi long mekim olsem. Long 1954, mi na Katerina i sanapim wanpela haus brik—mitupela yet i wokim dispela haus long fri taim bilong mipela. Mitupela i no bin lusim wanpela miting, na long ol wiken, mipela i save toktok wantaim ol man long tok bilong Baibel.
Wanpela wok bilong mi, em long raun wantaim wasman sekit, olsem wokman bilong lotu i save strongim ol kongrigesen, na tanim tok bilong em i go long tok Jeman taim em i visitim sampela ples long Paragwai we ol man i save mekim tok Jeman. Mi save liklik tasol long tok Spen, olsem na namba wan taim mi tanim tok Spen i go long tok Jeman, dispela i hatwok tru winim olgeta narapela wok mi bin kisim.
Helt bilong meri bilong mi i no gutpela, olsem na mipela i go sindaun long Kanada long 1957. Na long 1963, mitupela i go sindaun long Amerika. Maski wanem wanem hap mipela i go sindaun long en, mipela i traim long putim Kingdom i stap namba wan samting long laip bilong mipela. (Matyu 6:33) Mi tenkyu tru long God Jehova olsem em i bin opim rot long mi long lainim tok i tru long Baibel long taim mi bin yangpela man. Skul mi bin kisim long Baibel i bin helpim tru mi long planti samting long laip olgeta bilong mi!
Em i wanpela gutpela samting tru long helpim ol narapela long kisim save long ol gutpela tok i tru bilong Baibel i bin mekim gut bel bilong mi. Mi kisim bikpela amamas long lukim olgeta pikinini na tumbuna pikinini bilong mi i bin kisim helpim long Baibel kirap long taim ol i bebi yet. Olgeta i bihainim yet tok bilong Brata Peters, em bipo em i bin tokim mi: “Maski wanem wanem samting i kamap, no ken lusim wok bilong autim tok long ol haus.”
[Rait long pes 22]
Mi kisim bikpela amamas long lukim olgeta pikinini na tumbuna pikinini bilong mi i bin kisim helpim long Baibel kirap long taim ol i bebi yet
[Ol Piksa long pes 20, 21]
Mi na Katerina, paslain long weding bilong mipela long 1950
[Piksa long pes 21]
Wantaim fesbon bilong mipela long haus bilong mipela long Paragwai long 1952
[Piksa long pes 23]
Wantaim olgeta famili bilong mi long nau
[Kredit Lain]
Photo by Keith Trammel © 2000
[Piksa Kredit Lain long pes 19]
Photo by Keith Trammel © 2000