Ol Hevi Long Sindaun Bilong Yu i Bosim Laip Bilong Yu?
NAU long dispela ‘taim bilong planti hevi nogut tru,’ planti samting i save kamap na i givim hevi long ol man. (2 Timoti 3:1) Sampela hevi ol i bilong liklik taim tasol na bihain ol bai pinis. Tasol sampela hevi i save stap planti mun o planti yia. Olsem na planti i pilim olsem man bilong raitim song, em Devit, em i krai long Jehova olsem: “Pinisim olgeta bel hevi bilong mi, na bel bilong mi i ken i stap isi. Helpim mi, na ol hevi bai i no inap daunim mi.”—Song 25:17.
Olsem wanem long yu? Yu gat sampela bikpela hevi i laik daunim yu? Sapos olsem, ol tok bilong Baibel inap helpim yu na strongim bel bilong yu. Yumi ken tingim stori bilong tupela gutpela wokman bilong Jehova ol i gat sampela bikpela hevi tasol ol i no larim ol dispela hevi i daunim ol—em Josep na Devit. Yumi ken skelim pasin ol i bin mekim long ol dispela hevi, na dispela inap skulim yumi na helpim yumi long i stap strong na karim ol kain hevi olsem i save painim yumi long nau.
Ol Bikpela Hevi
Taim Josep i gat 17 krismas, em i gat wanpela bikpela hevi insait long famili bilong em yet. Ol bikbrata bilong em i lukim olsem papa bilong ol Jekop “i laikim tru Josep na em i no laikim ol tumas. Olsem na ol i bel nogut tru long Josep, na ol i no save mekim gutpela toktok long em.” (Stat 37:4) Yumi ken tingim bikpela hevi dispela samting i givim long Josep. Bihain ol brata bilong em i bel nogut moa yet long em, olsem na ol i salim em i go long wanpela lain na ol i baim em olsem wokboi nating bilong ol.— Stat 37:26-33.
Taim Josep i stap wokboi nating long Isip, meri bilong bos bilong em i laik slip wantaim em, tasol em i sakim meri. Meri i belhat long Josep i sakim em, olsem na em i sutim tok giaman long Josep olsem Josep i laik reipim em. Bos bilong Josep i “putim em long kalabus” na “ol i pasim strong ol sen long lek bilong en na lek i pen. Na ol i pasim bikpela ring ain long nek bilong en.” (Stat 39:7-20; Song 105:17, 18) Em bikpela hevi tru Josep i karim! Inap 13 yia olgeta, Josep i stap wokboi nating na em i stap kalabusman, long wanem, ol man i bin mekim pasin i no stret long em, na ol brata bilong em tu i mekim olsem.—Stat 37:2; 41:46.
Devit, em man bilong Israel long bipo, em tu i kisim sampela hevi taim em i yangpela yet. Inap sampela yia King Sol i bin raunim em olsem wanpela animal bilong bus na em i mas stap olsem wanpela ranaweman na hait nabaut. Long olgeta de bagarap inap painim Devit. Wanpela taim em i go long pris Ahimelek bilong kisim sampela kaikai. (1 Samuel 21:1-7) Bihain Sol i harim olsem Ahimelek i bin helpim Devit, olsem na em i tok na ol i kilim i dai Ahimelek wantaim olgeta narapela pris wantaim famili bilong ol. (1 Samuel 22:12-19) Man! Ating Devit i bel hevi stret long dispela samting nogut tru i kamap na i olsem em yet i as bilong en, a?
Tingim ol dispela planti yia Josep na Devit i bin karim bikpela hevi tru. Sapos yumi skelim ol samting ol i bin mekim long ol dispela hevi, dispela inap lainim yumi long sampela bikpela samting. Orait nau yumi ken skelim 3-pela pasin ol dispela man i bin mekim na yumi ken bihainim.
Lusim Pasin Bilong Bel Nogut
Namba wan, dispela tupela man i no laik bai pasin bilong bel nogut long narapela i stap olsem umben bilong kalabusim ol. Taim Josep i stap long kalabus, em inap tingim tingim pasin nogut ol brata bilong em i bin mekim long em, na em inap tingim pasin em bai mekim bilong bekim nogut long ol sapos bihain em i bungim ol gen. Orait olsem wanem yumi ken save Josep i sakim dispela kain tingting inap bagarapim em? Yumi ken tingim pasin em i bin mekim taim ol brata bilong em i kam long Isip bilong baim kaikai na nau em i gat rot tru long bekim nogut long ol. Baibel i tok: “Josep i harim toktok bilong ol na em i lusim ol na i go krai. . . . Bihain Josep i tokim ol wokboi long pulimapim wit long ol bek bilong ol brata bilong en, na long putim mani bilong ol insait long ol wan wan bek bilong ol. Na tu, ol wokboi i mas givim kaikai long ol bilong helpim ol long rot.” Bihain, taim Josep i salim ol brata bilong em i go bilong kisim papa bilong ol i kam long Isip, em i strongim bel bilong ol na i tok: “Yupela go na yupela i no ken kros namel long yupela yet.” Long tok na pasin bilong em, Josep i soim olsem em i no larim pasin bilong bel nogut i bagarapim i stap bilong em.—Stat 42:24, 25; 45:24.
Na Devit tu, em i no bel nogut long King Sol na tingim tingim i stap, nogat. Inap tupela taim Devit i gat rot long kilim Sol i dai. Tasol taim ol man bilong Devit i strong long em i mas mekim olsem, Devit i tok: “Bikpela i no ken larim mi i bagarapim king bilong mi, long wanem, Bikpela yet i bin makim em na putim em i stap king. Mi no ken mekim wanpela pasin nogut long dispela king Bikpela i bin makim.” Devit i larim dispela hevi i stap long han bilong Jehova, na em i tokim ol man bilong em: “Long nem bilong Bikpela i stap oltaim, mi tokim yu, bai Bikpela yet i kilim Sol o Sol yet bai i dai long taim bilong en o ol birua bai i kilim em long pait.” Bihain Devit i raitim wanpela singsing sori long taim Sol na pikinini bilong em Jonatan i dai long pait. Olsem Josep, Devit i no larim pasin bilong bel nogut i kamap strong long em na bosim em, nogat.—1 Samuel 24:3-6; 26:7-13; 2 Samuel 1:17-27.
Orait taim sampela i mekim pasin i no stret long yumi na yumi bel hevi long en, yumi save bel nogut long dispela na tingim tingim i stap? Dispela samting inap kamap. Sapos yumi larim pasin bilong bel nogut i bosim yumi, em inap nogutim yumi moa yet, winim dispela pasin i no stret ol i bin mekim long yumi. (Efesus 4:26, 27) Tru, ating yumi no inap bosim samting ol narapela i mekim, tasol yumi inap bosim samting yumi yet i mekim. I no hatwok tumas long lusim pasin bilong bel nogut taim yumi bilip olsem Jehova yet bai stretim dispela samting long taim em yet i bin makim.—Rom 12:17-19.
Wok Wantaim Hevi Bilong Yu
Namba tu samting yumi ken lainim i olsem: Yumi no ken larim ol samting i kamap long yumi i pasim yumi long mekim ol samting yumi save mekim. Sapos oltaim yumi tingim tingim ol samting yumi no inap mekim, bai yumi no inap tingting long ol samting yumi inap mekim. Em nau, dispela hevi i kirap bosim sindaun bilong yumi. Dispela pasin inap painim Josep. Tasol em i wok wantaim dispela hevi bilong em. Taim em i stap wokboi nating, “[bos bilong em] i amamas tru long Josep na mekim em i kamap mankimasta bilong em stret. Na em i givim Josep wok bilong bosim haus na olgeta samting bilong en.” Josep i mekim wankain pasin taim em i stap long haus kalabus. Jehova i mekim gut long Josep, na tu, Josep em i man bilong wok strong, olsem na “dispela man [i bosim haus kalabus] i makim Josep long lukautim olgeta kalabusman. Na Josep i bosim olgeta wok bilong haus kalabus.”—Stat 39:4, 21-23.
Insait long ol yia Devit i bin stap olsem ranaweman, em tu i no larim hevi i daunim em—em i wok wantaim dispela hevi bilong em. Taim em i stap long ples drai nating bilong Paran, em wantaim lain bilong em ol i lukautim ol lain sipsip bilong Nabal na bai ol lain stilman i no ken stilim. Wanpela man bilong was long ol sipsip bilong Nabal i tok: “Devit i lukautim mipela gut long san na long nait.” (1 Samuel 25:16) Bihain, taim Devit i stap long Siklak, em i go pait long ol taun long hap saut i stap long han bilong ol birua, na long dispela pasin em i strongim ol boda bilong graun bilong Juda.—1 Samuel 27:8; 1 Stori 12:20-22.
Olsem wanem? Yumi mas wok strong moa bambai yumi ken wok wantaim ol hevi bilong yumi na ol i no ken daunim yumi? Tru i hatwok, tasol yumi inap mekim. Aposel Pol i tingting bek long i stap bilong em na em i tok: “Mi save pinis long pasin bilong i stap isi, maski wanem kain samting i kamap long mi. . . . Mi save pinis long pasin bilong i stap isi, maski mi gat planti kaikai o mi stap hangre, na maski mi gat planti samting o mi sot long ol samting.” Olsem wanem Pol i bin kisim dispela kain tingting? Oltaim em i bilip na wetim Jehova. Em i tokaut olsem: “[“Em,” NW ] i save strongim mi, na long strong bilong em mi inap mekim olgeta samting.”—Filipai 4:11-13.
Wetim Jehova
Namba 3 samting i olsem: Yumi no ken mekim ol samting i no stret wantaim tok bilong Baibel bambai ol hevi bilong yumi i ken pinis, nogat. Yumi mas wetim Jehova. Disaipel Jems i tok: “Oltaim yupela i mas sanap strong na karim hevi, bai dispela pasin i ken kamap strong tru long yupela. Olsem na bai yupela i stap gut, na yupela bai i no sot long wanpela pasin bilong God. Nogat. Pasin bilong yupela bai i gutpela na i stret olgeta.” (Jems 1:4) Yumi mas karim hevi bilong yumi i go inap long pinis, olsem bai pasin bilong sanap strong na karim hevi “i ken kamap strong tru” long laip bilong yumi na yumi no mekim ol samting i no stret wantaim Baibel bilong pinisim kwik dispela hevi. Olsem na bai yumi traim bilip bilong yumi, em i strong o nogat, na yumi mekim i kamap gutpela moa, na bai strong bilong en long helpim yumi i kamap ples klia. Josep na Devit i gat dispela kain pasin bilong sanap strong na karim hevi. Ol i no wok long painim rot bilong stretim hevi em ating Jehova bai i no orait long en, nogat. Ol i wok wantaim ol hevi bilong ol. Ol i wetim Jehova, olsem na em i mekim gut tru long ol! Jehova i mekim wok long rot bilong tupela long kisim bek lain bilong Em na soim rot long ol.—Stat 41:39-41; 45:5; 2 Samuel 5:4, 5.
Sampela taim hevi inap bungim yumi tu na yumi laik painim sampela rot i no stret wantaim tok bilong Baibel bambai yumi ken stretim dispela hevi. Olsem: Ating yu bel hevi, long wanem yu no painim yet wanpela poroman bilong marit long en? Sapos olsem, orait givim baksait long ol traim i laik kirapim yu long sakim tok bilong Jehova long “maritim man i bilip long Bikpela” tasol. (1 Korin 7:39) Yu gat sampela hevi long marit bilong yu? Yu no ken bihainim tingting bilong dispela graun i laik kirapim ol marit long lusim poroman na katim marit. Yu mas wok gut wantaim poroman bilong yu long stretim hevi bilong yutupela. (Malakai 2:16; Efesus 5:21-33) Olsem wanem? Yu sot long mani na yu gat hatwok long lukautim famili bilong yu? Sapos yu wetim Jehova, bai yu no wok long mekim sampela samting i no stret long lo bilong gavman na bai yu inap painim mani. (Song 37:25; Hibru 13:18) Tru tumas, yumi olgeta i mas wok strong long karim ol hevi long sindaun bilong yumi na mekim yet wok bilong yumi na bai Jehova i ken mekim gut long yumi. Taim yumi wok long mekim olsem, yumi mas strong long wetim Jehova i kamapim klia gutpela rot tru bilong stretim ol dispela hevi.—Maika 7:7.
Jehova Bai Helpim Yu
Sapos yumi tingim tingim long bel olsem wanem ol man em stori bilong ol i stap long Baibel, olsem Josep na Devit, i bin karim ol hevi na hatwok i bin painim ol na ol i sanap strong yet, dispela inap strongim yumi. Tru, yumi inap ritim kwik stori bilong ol i stap long sampela pes tasol bilong Baibel, tasol ol hevi bilong ol i bin i stap inap planti yia. Askim yu yet: ‘Olsem wanem ol dispela wokman bilong Jehova i bin lain long karim ol dispela hevi long i stap bilong ol? Olsem wanem ol inap i stap belgut yet? Wanem ol pasin ol i mas wok strong long kisim?’
Na yumi mas tingim tu pasin bilong ol wokman bilong Jehova long nau em ol i save sanap strong na karim hevi. (1 Pita 5:9) Wastaua na Kirap! i save kamapim planti stori bilong ol man long olgeta yia. Yu save ritim na tingim tingim long bel ol stori bilong ol dispela Kristen i stap gut long God na ol i stap olsem gutpela piksa? Na long ol kongrigesen bilong yumi tu i gat ol Kristen i save sanap strong na karim ol hevi i kamap long ol. Yu save bung oltaim wantaim ol long ol miting bilong kongrigesen na kisim sampela save long ol long pasin bilong karim hevi na sanap strong yet?—Hibru 10:24, 25.
Taim sampela hevi i kamap long i stap bilong yu, yu ken bilip tru olsem Jehova i save tingim yu na em bai helpim yu. (1 Pita 5:6-10) Wok strong bambai yu no ken larim ol hevi bilong yu i bosim laip bilong yu. Bihainim pasin bilong Josep, Devit, na sampela moa na lusim pasin bilong bel nogut long ol samting ol narapela i bin mekim, na karim ol hevi i kamap long i stap bilong yu na wok yet i go, na wetim Jehova i kamapim klia gutpela rot tru bilong stretim. Go klostu long Jehova long rot bilong beten na mekim ol wok bilong spirit. Long dispela rot, yu tu bai lukim olsem yu inap i stap belgut na amamas maski taim nogut i painim yu.—Song 34:8.
[Piksa long pes 20, 21]
Josep i wok wantaim ol hevi i kamap long i stap bilong em
[Piksa long pes 23]
Devit i wetim Jehova i stretim ol hevi bilong em